ଭୁବନେଶ୍ବର: ବିଜୁ ପଟ୍ଟନାୟକ ଆନ୍ତର୍ଜାତୀୟ ବିମାନ ବନ୍ଦରରେ ବୋମା ଆତଙ୍କ । ବିମାନ ବନ୍ଦରରେ ବୋମା ଥିବା ଧମକ ମିଳିଛି । ଧମକ ମିଳିବା ପରେ ହାଇ ଆଲର୍ଟ କରାଯାଇଛି । ବୋମା ଆତଙ୍କ ପରେ କଡା ଯାଞ୍ଚ ଆରମ୍ଭ କରିଛନ୍ତିି ବିମାନବନ୍ଦର କର୍ତ୍ତୃପକ୍ଷ । ୨୦ଟି ବିମାନରେ ବୋମା ଥାଇପାରେ ବୋଲି ଆତଙ୍କ ସୃଷ୍ଟି ହେବା ପରେ ବିମାନବନ୍ଦର ମୁଖ୍ୟ ସେଠାରେ ପହଞ୍ଚି ଘଟଣାର ଖୋଳତାଡ ଆରମ୍ଭ କରିଛନ୍ତି । ସେପଟେ ଝାରସୁଗୁଡ଼ା ବୀର ସୁରେନ୍ଦ୍ର ସାଏ ବିମାନ ବନ୍ଦରକୁ ମଧ୍ୟ ବୋମା ଧମକ ମିଳିଛି ।
ଟୁଇଟରରେ ଆସିଥିଲା ଧମକ ପୂର୍ଣ୍ଣ କଲ:
ଏନେଇ ଭୁବନେଶ୍ବର ଆନ୍ତର୍ଜାତୀୟ ବିମାନ ବନ୍ଦରର ନିର୍ଦ୍ଦେଶକ ପ୍ରସନ୍ନ ପ୍ରଧାନ କହିଛନ୍ତି, "ଏକ ବିମାନରେ ବୋମା ରହିଥିବା ନେଇ ଟ୍ବିଟରରେ ଏକ ମେସେଜ ଆସିଥିଲା । ଯାହା ବାଙ୍ଗାଲୋର-ଭୁବନେଶ୍ଵରର ଏୟାର ଆକାଶ ବିମାନ ଥିଲା । ଦୀର୍ଘ ସମୟ ପରେ ଜଣାପଡ଼ିଲା ଯେ, ଏହା ଏକ ହୋକ୍ସ କଲ । ବିମାନକୁ ଯାଞ୍ଚ କରି କ୍ଲିୟରାନ୍ସ ଦିଆଯାଇଥିଲା । ଏହି ବିମାନ ୪:୩୦ରେ ଆସିଥିବା ବେଳେ ଯାଞ୍ଚ ପରେ ପୁଣି ଥରେ ବାଙ୍ଗାଲୋରକୁ ଚାଲିଯାଇଛି ।"
ଧମକପୂର୍ଣ୍ଣ କଲ ଆସିଲା ପରେ କ'ଣ ରହିଛି ପ୍ରୋସେଶ:
ବିମାନ ବନ୍ଦରର ନିର୍ଦ୍ଦେଶକ ଆହୁରି କହିଛନ୍ତି, "ଫେକ୍ କଲ ବା ତଥ୍ୟ ଆସିଲା ପରେ ଏକ ପ୍ରାଥମିକ ସ୍ତରରେ ଯାଞ୍ଚ କରାଯିବ । ବିଟିଏସ ରହିଥାଏ ଯାହା ବମ୍ ଥ୍ରେସ୍ଟ ଆସେଶମେଣ୍ଟ କମିଟି ରହିଛି । ତଥ୍ୟ ବା କଲ ଆଧାରରେ ଯାଞ୍ଚ କରିଥାନ୍ତି । ପରବର୍ତ୍ତୀ ସମୟରେ ଯଦି କିଛି ସମସ୍ୟା ଥାଏ ତେବେ ଏହା ପାଇଁ ମଧ୍ୟ ନିର୍ଦ୍ଦେଶାବଳୀ ରହିଥାଏ। ଏପରିକି ଯଦି କିଛି ଅସୁବିଧା ନଥାଏ ତେବେ ଏହା ପାଇଁ ମଧ୍ୟ ଏକ ନିର୍ଦ୍ଦେଶାବଳୀ ରହିଥାଏ । ପରବର୍ତ୍ତୀ ସମୟରେ ବିମାନକୁ ଯାଞ୍ଚ କରାଯାଇ ଥାଏ । ତେବେ ଏଥିରେ କୌଣସି ଯାତ୍ରୀଙ୍କ କୌଣସି ଅସୁବିଧା ହୋଇନାହିଁ । ବିମାନର ମଧ୍ୟ ଅସୁବିଧା ହୋଇନାହିଁ । ଏହା ଏକ ହୋସ୍କ ଥିଲା ।"
ବୀର ସୁରେନ୍ଦ୍ର ସାଏ ବିମାନ ବନ୍ଦରକୁ ବି ଧମକ:
ସେହିପରି ଝାରସୁଗୁଡ଼ା ବୀର ସୁରେନ୍ଦ୍ର ସାଏ ବିମାନ ବନ୍ଦରକୁ ମଧ୍ୟ ବୋମା ଧମକ ମିଳିଥିଲା । ବେଙ୍ଗାଲୁରୁ-ଝାରସୁଗୁଡ଼ା ଇଣ୍ଡିଗୋ ବିମାନରେ ବୋମା ଥିବା ନେଇ ଧମକ ମିଳିଥିଲା । ବିମାନଟି ଆଜି ଦିନ ୧୨ଟା ୩୫ରେ ଝାରସୁଗୁଡ଼ା ବିମାନ ବନ୍ଦରରେ ପହଞ୍ଚିଥିବା ବେଳେ ୧ଟା ୧୦ ମିନିଟରେ ଛାଡିବାର୍ ଥିଲା । କିନ୍ତୁ ବୋମା ସୂଚନା ମିଳିବା ପରେ ବିମାନକୁ ଅଟକାଇ ତନ୍ନତନ୍ନ କରି ଯାଞ୍ଚ କରାଯାଇଥିବା ବେଳେ ସମସ୍ତ ଯାତ୍ରୀଙ୍କୁ ମଧ୍ୟ ଆଉଥରେ ଯାଞ୍ଚ କରାଯାଇଥିଲା । ତେବେ ବିମାନରୁ ସେଭଳି କୌଣସି ବୋମା ମିଳି ନଥିବା ନେଇ ଝାରସୁଗୁଡା ବୀର ସୁରେନ୍ଦ୍ର ସାଏ ବିମାନ ବନ୍ଦର ନିର୍ଦ୍ଦେଶକ କହିଛନ୍ତି ।
ଇଟିଭି ଭାରତ, ଭୁବନେଶ୍ବର
