ବ୍ରହ୍ମପୁର(ଗଞ୍ଜାମ): ଜମି ବିକ୍ରି କରିବା ନାଁରେ ୩୦ ଲକ୍ଷ ଟଙ୍କା ଠକେଇ ଅଭିଯୋଗ । ବ୍ରହ୍ମପୁର ପୋଲିସ ଦ୍ୱାରା ଗିରଫ ହେଲେ ଠକ ବାପା ଓ ପୁଅ । ଏନେଇ ଜଣେ ମହିଳା ବଡ଼ବଜାର ଥାନାରେ ଅଭିଯୋଗ କରିବା ପରେ ଠକ ବାପା ଓ ପୁଅକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଗିରଫ ଅଭିଯୁକ୍ତମାନେ ହେଲେ ବଡ଼ବଜାର ଥାନା ହନୁମାନ ସାହିର ବାଲାଜୀ ସାହୁ ଓ ତାଙ୍କ ପୁଅ ରଘୁରାଜ ସାହୁ ।
କ'ଣ ରହିଥିଲା ସମ୍ପୂର୍ଣ୍ଣ ଘଟଣା ?
ବ୍ରହ୍ମପୁର ଟାଉନ ଥାନା ଅନ୍ତର୍ଗତ ମିଲିଟାରୀ ଲାଇନର ସାରଦା ସାମଲ ନାମକ ଜଣେ ମହିଳା ଓ ତାଙ୍କ ସ୍ୱାମୀ ଭାପୁର ବଜାରଠାରେ ଥିବା ଏକ ପ୍ଲଟ କିଣିବାକୁ ୨୦୧୯ ମସିହାରେ ବାଲାଜୀ ଓ ରଘୁରାଜକୁ ୩୦ ଲକ୍ଷ ଟଙ୍କା ଦେଇଥିଲେ । ଏନେଇ ଉଭୟ ପକ୍ଷଙ୍କ ମଧ୍ୟରେ ଚୁକ୍ତିନାମା ହୋଇଥିଲା । ଟଙ୍କା ଗ୍ରହଣ କରିବାର ଦୀର୍ଘ ବର୍ଷ ପରେ ମଧ୍ୟ ଏହି ବାପା ଓ ପୁଅ ଉକ୍ତ ପ୍ଲଟକୁ ସାରଦାଙ୍କ ନାମରେ ପଞ୍ଜିକରଣ କରିନଥିଲେ କିମ୍ବା ଟଙ୍କା ଫେରସ୍ତ କରିନଥିଲେ । ଯାହାକି ପାଲଟା ସାରଦା ଟଙ୍କା ମାଗିବାରୁ ତାଙ୍କୁ ହତ୍ୟା ଧମକ ଦେଇଥିଲେ ।
ଗିରଫ ହେଲେ ଠକ ବାପା-ପୁଅ:
ଏନେଇ ସାରଦା ବଡ଼ବଜାର ଥାନାରେ ଲିଖିତ ଅଭିଯୋଗ ଦେଇଥିଲେ । ଅଭିଯୋଗକୁ ଭିତ୍ତି କରି ପୋଲିସ ତଦନ୍ତ ଆରମ୍ଭ କରିଥିବାବେଳେ ଗତ ବୁଧବାର ଦିନ ଏକ ଦାମୀ କାରରେ ଠକ ବାପା ଓ ପୁଅ ବୁଲୁଥିବାବେଳେ କମାପଲ୍ଲୀ ନିକଟରୁ ବଡ଼ବଜାର ଥାନା ପୋଲିସ ଉଭୟଙ୍କୁ କାବୁ କରିଥିଲା । ବଡ଼ବଜାର ଥାନାକୁ ନେଇ ଅଧିକ ପଚରାଉଚୁରା କରିବା ପରେ ଠକ ବାପା ଓ ପୁଅକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ ।
'ଗିରଫ ବାପା-ପୁଅ ନାଁରେ ରହିଛି ଏକାଧିକ ମାମଲା' :
ବ୍ରହ୍ମପୁର ଆରକ୍ଷୀ ଅଧୀକ୍ଷକ ଡା. ଶ୍ରର୍ବଣା ବିବେକ ଏମ୍ କହିଛନ୍ତି, "ଜମି ଦେବା ନାମରେ ୩୦ ଲକ୍ଷ ଟଙ୍କା ଠକେଇ ଅଭିଯୋଗରେ ବାପା-ପୁଅ ଗିରଫ ହୋଇଛନ୍ତି । ଗିରଫ ହୋଇଥିବା ବାପା ବାଲାଜୀ ସାହୁ ନାମରେ ପୂର୍ବରୁ ବଡ଼ବଜାର ଥାନାରେ ୬ଟି ମାମଲା ରହିଥିବାବେଳେ ପୁଅ ରଘୁରାଜ ସାହୁଙ୍କ ନାମରେ ୪ଟି ମାମଲା ରହିଛି । ଘଟଣାକୁ ନେଇ ପୋଲିସ ଅଧିକ ତଦନ୍ତ ଜାରି ରଖିଛି । ତାଙ୍କଠାରୁ ଏକ ଦାମୀ କାରକୁ ପୋଲିସ ଜବତ କରିଛି । ଯଦି ଗିରଫ ବାପା ଓ ପୁଅଙ୍କ ଦ୍ୱାରା ଅନ୍ୟ କେହି ଠକେଇର ଶିକାର ହୋଇଛନ୍ତି । ତେବେ ପୋଲିସ ନିକଟରେ ଅଭିଯୋଗ କରନ୍ତୁ ।"
ଇଟିଭି ଭାରତ, ବ୍ରହ୍ମପୁର
