ରାୟଗଡା: ମଦ୍ୟପାନ କରି ସାମାନ୍ୟ ବଚସାରୁ ଯୁବକଙ୍କ ଉନ୍ମୁକ୍ତ କାଣ୍ଡ । କାଚ ବୋତଲରେ ଭୁସି ହତ୍ୟା କଲା ଯୁବକ । ରାୟଗଡା ସହରରେ ବୁଧବାର ଦିନ ଏହି ଅଭାବନୀୟ ଘଟଣା ଦେଖିବାକୁ ମିଳିଛି । ହତ୍ୟାକାଣ୍ଡ ଶିକାର ହୋଇଥିବା ଯୁବକଙ୍କ ନାଁ କ୍ରିଷ୍ଣା କଣ୍ଡାଗରି (୩୦) ଓ ତାଙ୍କ ଘର ରାୟଗଡ଼ା ସହରର ରେଳବାଇ କୋଲୋନୀରେ ବୋଲି ଜଣାପଡିଛି । କ୍ରିଷ୍ଣା କଣ୍ଡାଗରିକୁ ଘାସିରାମ ଝୋଡିଆ ନାମକ ଯୁବକ ହତ୍ୟା କରିଛି ।
ଏହା ମଧ୍ୟ ପଢନ୍ତୁ... ବହୁ ଚର୍ଚ୍ଚିତ ଡାକ୍ତର ଦମ୍ପତି ହତ୍ୟାକାଣ୍ଡ ରାୟ ପ୍ରକାଶ, ୫ ଦୋଷୀଙ୍କୁ ଆଜୀବନ କାରାଦଣ୍ଡାଦେଶ - Life Imprisonment In Murder Case
ସୂଚନା ଅନୁଯାୟୀ, କ୍ରିଷ୍ଣା କଣ୍ଡାଗିରି ଗତକାଲି(ବୁଧବାର) ମଧ୍ୟାହ୍ନରେ ଝୋଡିଆ ସାହି ଦେଶୀ ମଦ ପିଇବାକୁ ଯାଇଥିଲେ । ସେଠାରେ ଘାସିରାମ ସହିତ କୌଣସି କାରଣରୁ ସାମାନ୍ୟ ବଚସା ହୋଇଥିଲା । ବୁଧବାର ନିଶାସକ୍ତ ଅବସ୍ଥାରେ ମଧ୍ୟାହ୍ନ ପ୍ରାୟ ୧୨ଟା ବେଳେ ପୁଣି ଉଭୟଙ୍କ ମଧ୍ୟରେ ବଚସା ହୋଇଥିଲା । ଏଥିରେ ଉତ୍ୟକ୍ତ ହୋଇ ଘାସିରାମ ନିଜେ ଧରିଥିବା ଏକ ମଦ କାଚ ଭାଙ୍ଗି କ୍ରିଷ୍ଣାଙ୍କ ଶରୀରରେ ଆକ୍ରମଣ କରିଥିଲା । ଶରୀରର ବିଭିନ୍ନ ସ୍ଥାନରେ କ୍ଷତ ହେବା ଫଳରେ ଗୁରୁତର ଆହତ ହୋଇ ତଳେ ପଡ଼ି ଥିବା ବେଳେ ପ୍ରଚୁର ରକ୍ତସ୍ରାବ ହୋଇଥିଲା । ସ୍ଥାନୀୟ ଲୋକଙ୍କ ଠାରୁ ଖବର ପାଇ ପୋଲିସ ଓ ଆମ୍ବୁଲାନ୍ସ ପହଞ୍ଚି କ୍ରିଷ୍ଣାଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟ ପଠାଇଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଘଟଣା ସଂପର୍କରେ ଖବର ପାଇ ଏସଡିପିଓ ରଶ୍ମି ରଂଜନ ସେନାପତି ଓ ସାଇଣ୍ଟିଫିକ ଟିମ ଘଟଣାସ୍ଥଳରେ ପହଁଞ୍ଚି ତଦନ୍ତ କରିଥିଲେ । ଘଟଣାକୁ ନେଇ ରାୟଗଡ଼ା ଥାନାରେ ଏକ ମାମଲା ରୁଜୁ ହେବା ସହ ଘାସିରାମକୁ ଗିରଫ କରାଯାଇଛି । ମୃତଦେହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯାଇଛି । ସେପଟେ ସ୍ଥାନୀୟ ଲୋକେ ରାୟଗଡାରେ ହେଉଥିବା ବେଆଇନ ମଦ ବେପାରକୁ ନେଇ କ୍ଷୋଭ ପ୍ରକାଶ କରିଛନ୍ତି । ଏହା ସହ ଅବକାରୀ ବିଭାଗ ଏହା ଉପରେ ନିୟନ୍ତ୍ରଣ ଆଣିଲେ ଯୁବପିଢିଙ୍କୁ ରକ୍ଷା କରାଯାଇପାରିବ ବୋଲି କହିଛନ୍ତି ସ୍ଥାନୀୟ ଲୋକ ।
ଇଟିଭି ଭାରତ, ରାୟଗଡା
