ରାୟଗଡ଼ା: ବିଳମ୍ବରେ ହେଉ ପଛେ ରାୟଗଡ଼ା ଜିଲ୍ଲା ସ୍ବାସ୍ଥ୍ୟ ବିଭାଗର ନିଦ ଭାଙ୍ଗିଛି । କାଶୀପୁର ବ୍ଲକ ମୁନୁଷପଦରରେ ଡିପ୍ଥେରିଆ ବ୍ୟାପୀ ୫ ଶିଶୁଙ୍କ ଜୀବନ ଯିବା ପରେ ଆଜିଠାରୁ ଆରମ୍ଭ ହୋଇଛି ବିଧବଦ୍ଧ ଟୀକାକରଣ । ପ୍ରଥମ ଦିନରେ ଗୁମୁଡ଼ିମୁଣ୍ଡି ଗାଁରେ ଘର ଘର ବୁଲି ସ୍ବାସ୍ଥ୍ୟକର୍ମୀମାନେ ଟିଡି ଇଞ୍ଜେକ୍ସନ ସହ ଡିପିଟି ଡୋଜ୍ ଦେଉଛନ୍ତି । ଶିଶୁଙ୍କଠାରୁ ଆରମ୍ଭ କରି ବୃଦ୍ଧଙ୍କ ପର୍ଯ୍ୟନ୍ତ ସମସ୍ତଙ୍କୁ ଏହି ଟିକା ଦିଆଯାଉଛି ।
ଆଗ୍ରାରୁ ସ୍ବତନ୍ତ୍ର ଡୋଜ୍ ଆସି ପହଞ୍ଚିବା ପରେ ଏହି କାର୍ଯ୍ୟକ୍ରମ ହାତକୁ ନିଆଯାଇଛି । ସମସ୍ତଙ୍କୁ ମାକ୍ସ ବ୍ୟବହାର ସହ ଡାକ୍ତରଙ୍କ ପରାମର୍ଶ ନେବାକୁ ସଚେତନ କରାଯାଇଛି । ଅନ୍ୟପକ୍ଷରେ ମୁନୁଷପଦର, ଜଡ଼କିମୁଣ୍ଡା ଓ ଗୁମାମୁରକା ଗାଁକୁ କଣ୍ଟେନମେଣ୍ଟ୍ ଜୋନରେ ରଖାଯାଇଛି । ସବୁ ବିଭାଗକୁ ନେଇ ଜିଲ୍ଲାପାଳ ମନୋଜ ସତ୍ୟବାନ ମହାଜନ ପରିସ୍ଥିତିର ସମୀକ୍ଷା କରିଛନ୍ତି । କରୋନା ସମୟରେ ଯେଉଁଭଳି ପଦକ୍ଷେପ ନିଆଯାଇଥିଲା, ଅନୁରୂପ ଢଙ୍ଗରେ କାମ କରିବାକୁ ନିର୍ଦ୍ଦେଶ ଦେଇଛନ୍ତି । ସେହି ଅନୁସାରେ, ଆଜି କାଶୀପୁର ତହସିଲ ପକ୍ଷରୁ ମୁନୁଷପଦର, ଜଡ଼କିମୁଣ୍ଡା ଓ ଗୁମାମୁରକା ଭଳି ୩ଟି ଗାଁକୁ ଜଣ୍ଟେନମେଣ୍ଟ୍ ଜୋନ୍ ଘୋଷଣା କରି ପୋଲିସ ମୁତୟନ କରାଯାଇଛି । ଅତି ଆବଶ୍ୟକ ନ ହେଲେ ଏହି ଗାଁରେ ଅନ୍ୟ ଗାଁ ଲୋକଙ୍କ ପ୍ରବେଶ ଉପରେ କଟକଣା ଜାରି କରାଯାଇଛି ।
ସେହିପରି ରୋଗ ବ୍ୟାପିଥିବା ୩ ଗାଁ ଲୋକଙ୍କ ଅନ୍ୟ ଗାଁକୁ ଯିବା ଉପରେ ବି ପ୍ରତିବନ୍ଧକ ଲଗାଯାଇଛି । ଡିପ୍ଥେରିଆ ଏକ ବାୟୁବାହିତ ରୋଗ ହୋଇଥିବାରୁ ଅନ୍ୟରୁ ବ୍ୟାପିବା ସମ୍ଭାବନା ଅଧିକ ରହିଛି । ଏଥିପାଇଁ ଜିଲ୍ଲା ପ୍ରଶାସନ ପକ୍ଷରୁ ଏହି କଡ଼ା ପଦକ୍ଷେପ ନିଆଯାଇଛି । ଏ ସମ୍ପର୍କରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡାକ୍ତର ଲାଲମାହନ ରାଉତରାୟ କହିଛନ୍ତି ଯେ, ବର୍ତ୍ତମାନ ସ୍ଥିତି ନିୟନ୍ତ୍ରଣରେ ଅଛି । ସବୁ ବିଭାଗ ମିଳିତ ଭାବେ କାର୍ଯ୍ୟ କରୁଛନ୍ତି । ଟୀକାକରଣ ମଧ୍ୟ ଠିକ୍ଠାକୁ ଚାଲିଛି ।
