ରାୟଗଡା: ବର୍ଷା ଋତୁ ଆରମ୍ଭ ନହେଉଣୁ ରାୟଗଡା ଜିଲ୍ଲା କାଶୀପୁର ବ୍ଲକରେ ଡରାଇଛି ଅଜଣା ରୋଗ । ଏହି ରୋଗରେ ଆକ୍ରାନ୍ତ ହୋଇ ଏବେ ପର୍ଯ୍ୟନ୍ତ 5 ଜଣ ଶିଶୁଙ୍କର ମୃତ୍ୟୁ ହେଲାଣି । ଏବେ ସାମ୍ନାକୁ ଆସିଛି ଏହି ଅଜଣା ରୋଗର ପରିଚୟ । ଏହା କୌଣସି ଅଜଣା ରୋଗ ନୁହେଁ, ବରଂ ଡିପଥେରିଆ ବୋଲି କହିଛନ୍ତି ବିଶେଷଜ୍ଞ ଦଳ । ସ୍ୱତନ୍ତ୍ର ଡାକ୍ତରୀ ଦଳ ଯାଇ ଉକ୍ତ ଅଞ୍ଚଳରେ ଅକ୍ରାନ୍ତଙ୍କ ରକ୍ତ ଓ ସ୍ୱାବ୍ ପରୀକ୍ଷା କରିବା ପରେ ଏହା ସ୍ପଷ୍ଟ ହୋଇଛି । ଏଠାରେ ସୂଚନା ଯୋଗ୍ୟ, କାଶୀପୁର ବ୍ଲକ ଡଙ୍ଗାସିଲ ପଞ୍ଚାୟତର ମାନୁଷପଦର ଗାଁରେ ଅଜଣା ରୋଗର ଆତଙ୍କ ଲାଗି ରହିଥିଲା ।
କାଶୀପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଅଧିକାରୀ ଡାଃ ନେତ୍ରାନନ୍ଦ ନାୟକଙ୍କ ନେତୃତ୍ବରେ ଏକ ୫ ଜଣିଆ ଡାକ୍ତରୀ ଦଳ ସେଠାରେ କ୍ୟାମ୍ପ କରି ସ୍ଥିତି ଅନୁଧ୍ୟାନ କରିଛନ୍ତି । ଆସନ୍ତା ୨୦ ଦିନ ଯାଏଁ ପ୍ରତିଦିନ ସେହି ଗାଁକୁ ଡାକ୍ତରୀ ଦଳ ଯାଇ ସମସ୍ତଙ୍କ ସ୍ବାସ୍ଥ୍ୟ ପରୀକ୍ଷା କରିବା ସହ ନୂତନ ଆକ୍ରାନ୍ତଙ୍କ ସମ୍ପର୍କରେ ତଥ୍ୟ ସଂଗ୍ରହ କରିବ ପାଇଁ ସିଡିଏମଓ ନିର୍ଦ୍ଦେଶ ଦେଇଛନ୍ତି । ସେଠାରେ ଏକ ସର୍ଭିଲାନ୍ସ ଦଳ ସଜାଗ ରହିଛି । ସମସ୍ତଙ୍କୁ ଟୀକାକରଣ କରିବା ଉପରେ ଗୁରୁତ୍ୱାରୋପ କରାଯାଇଛି । ଶତପ୍ରତିଶତ ଟୀକାକରଣ ହେଲେ ଏହି ରୋଗ ବ୍ୟାପିବ ନାହିଁ । ଏହି ରୋଗ ଯେପରି ନବ୍ୟାପିବ ସେଥିପ୍ରତି ତୀକ୍ଷ୍ଣ ଦୃଷ୍ଟି ରଖାଯାଇଛି ବୋଲି କହିଛନ୍ତି ରାୟଗଡା ଜିଲ୍ଲାପାଳ ମନୋଜ ସତ୍ୟବାନ ମହାଜନ ।
ଅନ୍ୟପଟେ ଏହି ଦୁଃଖ ଖବର ପରେ ନବନିର୍ବାଚିତ ରାୟଗଡା ବିଧାୟକ ଆପଲସ୍ବାମୀ କାଡ୍ରାକା, ବିଜେପି ନେତା କାଳିରାମ ମାଝୀ ଏବଂ ବିଜେଡି ନେତ୍ରୀ ଅନୁସୟା ମାଝୀ ପ୍ରମୁଖ ମାନୁଷପଦର ଗାଁରେ ପହଞ୍ଚି ଆକ୍ରାନ୍ତଙ୍କ ପରିବାରକୁ ଭେଟି ସମବେଦନା ଜଣାଇଛନ୍ତି । ଗତକାଲି ଅଜଣା ରୋଗର କାରଣ ଖୋଜିବାକୁ ସ୍ବାସ୍ଥ୍ୟ ବିଭାଗ ଓ ଆରଏମଆରସିକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ । ସୂଚନା ଥାଉକି ଏବେ ବି ବହୁ ଆକ୍ରାନ୍ତ ଚିକିତ୍ସିତ ହେଉଥିବାରୁ ତୁରନ୍ତ ସ୍ୱାସ୍ଥ୍ୟ ସେବା ଯୋଗାଇ ଦେଇ ସ୍ଥିତି ଉପରେ ନିୟନ୍ତ୍ରଣ ଆଣିବାକୁ ସ୍ୱାସ୍ଥ୍ୟ ବିଭାଗକୁ ନିର୍ଦ୍ଦେଶ ଦିଆଯାଇଛି । ସେହିପରି ମାନୁଷପଦର ଗାଁକୁ ରାସ୍ତା ଓ ବିଶୁଦ୍ଧ ପାନୀୟ ଜଳ ଯୋଗାଇ ଦେବାକୁ ପଞ୍ଚାୟତିରାଜ ବିଭାଗକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ ।
ଇଟିଭି ଭାରତ, ରାୟଗଡ଼ା
