ପୁରୀ: ଶ୍ରୀମନ୍ଦିରରେ ଅନଲାଇନ ସ୍ଲଟ ବୁକିଂ ପ୍ରସ୍ତାବକୁ ବିରୋଧ । ଶ୍ରୀମନ୍ଦିରରେ ଅନଲାଇନ ସ୍ଲଟ ମାଧ୍ୟମରେ ଭକ୍ତ ଦର୍ଶନ କଲେ ଭିଡ କମିବ ବୋଲି ଗଜପତି ମହାରାଜା ସରକାରଙ୍କୁ ପ୍ରସ୍ତାବ ଦେଇଛନ୍ତି । ହେଲେ ଏହି ଅନଲାଇନ ବୁକିଂରେ ମହାପ୍ରଭୁଙ୍କୁ ଦର୍ଶନ ବ୍ୟବସ୍ଥାକୁ ନେଇ ଭକ୍ତ ଓ ସେବାୟତ ବିରୋଧ କରିଛନ୍ତି । ଭକ୍ତ କହିଛନ୍ତି ଯେ, ଏହି ଅନଲାଇନ ବ୍ୟବସ୍ଥା ଶ୍ରୀମନ୍ଦିରରେ ହୋଇ ପାରିବନାହିଁ । ଏହା ଲାଗୁ ହେଲେ ଭକ୍ତଙ୍କ ସମସ୍ୟା ଆହୁରି ବଢିବ ବୋଲି ଅନେକ ଭକ୍ତ କହିଛନ୍ତି ।
ସେହିପରି ଆଉ ଜଣେ ଭକ୍ତ କହିଛନ୍ତି, "ଶ୍ରୀମନ୍ଦିରରେ ମହାପ୍ରଭୁଙ୍କ ଅନେକ ନୀତିକାନ୍ତି ଥିବାରୁ ନୀତି ବିଳମ୍ବ ହେଲେ ଅନ ଲାଇନରେ ବୁକିଂ କରିଥିବା ବ୍ୟକ୍ତିଙ୍କୁ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡ଼ିବ । ଦୂରରୁ ଆସିଥିବା ଭକ୍ତ ମହାପ୍ରଭୁଙ୍କ ଦର୍ଶନ ନପାଇ ନିରାଶ ହୋଇ ଫେରିବେ ।" ତେବେ ଶ୍ରୀମନ୍ଦିରରେ ଅନଲାଇନ ବୁକିଂରେ ଦର୍ଶନ ବ୍ୟବସ୍ଥା ଗ୍ରହଣୀୟ ନୁହେଁ ବୋଲି ଭକ୍ତ କହିଛନ୍ତି । ଭକ୍ତ ମାନେ ଅନଲାଇନରେ ବୁକିଂ କରିଥିଲେ ଧାର୍ଯ୍ୟ ସମୟରେ ଆସି ନପାରିଲେ ମହାପ୍ରଭୁଙ୍କ ଦର୍ଶନ ପାଇବେ ନାହିଁ ବୋଲି କହିଛନ୍ତି ।
ଆଉ ଜଣେ ଭକ୍ତ କହିଛନ୍ତି, "ତିରୁପତି ଭଳି ମନ୍ଦିରରେ ପୂଜା ବ୍ୟବସ୍ଥା ସମ୍ପୂର୍ଣ୍ଣ ଅଲଗା । ମହାପ୍ରଭୁଙ୍କର ଦିନ ସାରା ପୂଜା ଅନୁଷ୍ଠିତ ହେବା ସହିତ ଅଲଗା ଅଲଗା ନୀତିକାନ୍ତି ରହିଛି । ଏଣୁ ଅନଲାଇନରେ ଦର୍ଶନ ବ୍ୟବସ୍ଥା ଦ୍ବାରା ଭକ୍ତ ଅଧିକ ଅସୁବିଧା ଭୋଗିବେ ।" ସେପଟେ ବୁଦ୍ଧିଜୀବୀ ମଧ୍ୟ ଗଜପତିଙ୍କ ଏହି ପ୍ରସ୍ତାବକୁ ବିରୋଧ କରିଛନ୍ତି । ସେ କହିଛନ୍ତି "ଶ୍ରୀମନ୍ଦିର ଏକ ସ୍ବତନ୍ତ୍ର ସ୍ଥାନ । ପର୍ବପର୍ବାଣୀରେ ଲକ୍ଷ ଲକ୍ଷ ଲୋକ ଶ୍ରୀମନ୍ଦିରକୁ ଆସୁଛନ୍ତି । ଲକ୍ଷ ଲକ୍ଷ ଲୋକଙ୍କୁ ଅନଲାଇନରେ ବୁକିଂ କରାଇ ଗୋଟିଏ ଦିନରେ ଦର୍ଶନ କରାଇବା ଅସମ୍ଭବ । ସେହିପରି ଭକ୍ତ ଓ ଭଗବାନ ମଧ୍ୟରେ ସମ୍ପର୍କ ଅତ୍ୟନ୍ତ ଅନନ୍ୟ । ଏଣୁ ଅନଲାଇନରେ ବୁକ୍ କରି ଭକ୍ତ ମହାପ୍ରଭୁଙ୍କୁ ଦର୍ଶନ କରିବା ପରମ୍ପରା ବିରୋଧୀ ।" ଏହି ପ୍ରସ୍ତାବରୁ ଗଜପତି ଓହୋରି ଯାଆନ୍ତୁ ବୋଲି ବୁଦ୍ଧିଜୀବୀ କହିଛନ୍ତି ।
ସେପଟେ ଶ୍ରୀମନ୍ଦିର ବରିଷ୍ଠ ସେବାୟତ ହଜୁରୀ କୃଷ୍ଣ ଚନ୍ଦ୍ର ଖୁଣ୍ଟିଆ ଅନଲାଇନ ବୁକିଂ ମାଧ୍ୟମରେ ମହାପ୍ରଭୁଙ୍କ ଦର୍ଶନ ବ୍ୟବସ୍ଥାକୁ ଦୃଢ଼ ବିରୋଧ କରିଛନ୍ତି । ସେ କହିଛନ୍ତି "ଏହା ଶ୍ରୀମନ୍ଦିରରେ ଅସମ୍ଭବ । ଏହି ବ୍ୟବସ୍ଥା ଦ୍ଵାରା ଭକ୍ତଙ୍କୁ ଠକିବା ଓ ଭୁଆଁ ବୁଲାଇବା ସଦୃଶ । ଅନଲାଇନରେ ଯଦି ଗୋଟିଏ ପରିବାରର ସବୁ ସଦସ୍ୟଙ୍କୁ ବୁକିଂ ନମିଳେ ତାହାଲେ ଭକ୍ତ ହଇରାଣ ହେବେ । ଶ୍ରୀମନ୍ଦିର ଚାରି ଦ୍ଵାରା ଖୋଲିବା ଦ୍ଵାରା ଭକ୍ତ ବେଶ ଖୁସି । ତେବେ ଶ୍ରୀମନ୍ଦିର ଭିତରେ ଭିଡ ନିୟନ୍ତ୍ରଣ କରିବାକୁ ହେଲେ ମହାପ୍ରଭୁଙ୍କୁ ଦର୍ଶନ ବେଳେ ଲାଇନ୍ ବ୍ୟବସ୍ଥା ସହ ଯେପରି ଭକ୍ତ ନ ଠିଆ ହୁଅନ୍ତି ଏବଂ ଲାଇନ୍ କ୍ରମାଗତ ଚାଲୁ ରହିଲେ ଶ୍ରୀମନ୍ଦିରରେ ଭିଡ଼ ହେବ ନାହିଁ ଓ ଭକ୍ତ ଭଲରେ ଦର୍ଶନ ପାଇବେ ।"
ଇଟିଭି ଭାରତ, ପୁରୀ
