ଭୁବନେଶ୍ବର: ବାତ୍ୟାରେ ପରିଣତ ହେଲା ପୂର୍ବ-କେନ୍ଦ୍ରୀୟ ବଙ୍ଗୋପସାଗରରେ ସୃଷ୍ଟ ଗଭୀର ଅବପାତ । ପାଣିପାଗ ବିଭାଗର ପୂର୍ବାନୁମାନ ଅନୁସାରେ, ଗତକାଲି ରାତିରେ ଏହା ଗଭୀର ଅବପାତରେ ପରିଣତ ହୋଇସାରିଥିବା ବେଳେ ଆଜି ପ୍ରାୟ ଭୋର ସମୟରେ ଏହା ବାତ୍ୟାରେ ପରିଣତ ହୋଇଛି । ବାତ୍ୟା 'ଦାନା'ର ଆଖି ଦୃଶ୍ୟମାନ ହୋଇଥିବା ବେଳେ, ଏହା କ୍ରମଶଃ ଉତ୍ତର, ଉତ୍ତର-ପଶ୍ଚିମ ଦିଗରେ ଗତି କରି ଓଡିଶା-ପଶ୍ଚିମବଙ୍ଗ ଉପକୂଳ ମୁହାଁ ହେବ । ଭାରତୀୟ ପାଣିପାଗ ବିଭାଗ (ଆଇଏମଡି)ର ସଦ୍ୟ ସୂଚନା ଅନୁସାରେ, ବାତ୍ୟାଟି ପାରାଦୀପ ଉପକୂଳରୁ ପ୍ରାୟ 560 କିଲୋମିଟର ଦକ୍ଷିଣ, ପଶ୍ଚିମବଙ୍ଗର ସାଗରଦ୍ୱୀପର 630 କିଲୋମିଟର ଦକ୍ଷିଣ-ପୂର୍ବ ଏବଂ ବାଂଲାଦେଶର ଖେପୁପାରାରୁ ପ୍ରାୟ 630 କିଲୋମିଟର ଦକ୍ଷିଣ-ଦକ୍ଷିଣ ପୂର୍ବରେ କେନ୍ଦ୍ରୀଭୂତ ରହିଛି । ଏହା ପ୍ରାୟ ୩ କି.ମି ପ୍ରତିଘଣ୍ଟା ମନ୍ଥର ଗତିରେ ଆଗକୁ ବଢୁଛି ।
- ଆସନ୍ତାକାଲି ଭୀଷଣ ବାତ୍ୟା
‘ଆଇଏମଡି’ ଏହା ମଧ୍ୟ ସ୍ପଷ୍ଟ କରିଛି ଯେ, ଏହି ବାତ୍ୟା ଉତ୍ତର-ପଶ୍ଚିମ ଦିଗକୁ ଗତି କରିବ । ଆସନ୍ତାକାଲି (24 ତାରିଖ) ସକାଳେ ଉତ୍ତର-ପଶ୍ଚିମ ବଙ୍ଗୋପସାଗରରେ ଭୀଷଣ ସାମୁଦ୍ରିକ ବାତ୍ୟାରେ ପରିବର୍ତ୍ତନ ହେବ । ଆସନ୍ତାକାଲି ମଧ୍ୟରାତ୍ରି କିମ୍ବା ୨୫ ତାରିଖ ଭୋର ସମୟରେ ଏହା ପୁରୀରୁ ସାଗରଦ୍ବୀପ ମଧ୍ୟରେ ଲ୍ୟାଣ୍ଡଫଲ୍ କରିବାର ସର୍ବାଧିକ ଆଶଙ୍କା ରହିଛି ।
- ଲ୍ୟାଣ୍ଡଫଲ ବେଳେ ୧୦୦ ରୁ ୧୧୦ କିଲୋମିଟର ବେଗରେ ପବନ
ବିଶେଷ ଭାବେ ପଶ୍ଚିମବଙ୍ଗ ଅପେକ୍ଷା ଓଡିଶା ଉପକୂଳରେ ଏହାର ପ୍ରଭାବ ଅଧିକ ଅନୁଭୂତ ହେବ । ଆଜି ସଂଧ୍ୟାଠାରୁ ଓଡିଶା ଉପକୂଳରେ ପାଗରେ ପରବର୍ତ୍ତନ ହେବା ସହ ସମୁଦ୍ର କ୍ରମଶଃ ଅଶାନ୍ତ ହେବା ଆରମ୍ଭ କରିବ । ଲ୍ୟାଣ୍ଡଫଲ ସମୟରେ ପବନର ବେଗ ଘଣ୍ଟାପ୍ରତି ୧୦୦ ରୁ ୧୧୦ କିଲୋମିଟର ରହିବ । ସ୍ଥଳବିଶେଷରେ ଝଟକା ପବନ ୧୨୦ କି.ମି ଘଣ୍ଟା ପ୍ରତି ରହିପାରେ । ଫଳରେ ବଡ ବଡ ଗଛ, କଚ୍ଚା ଘର ଓ ବିଜୁଳି ଖୁଣ୍ଟ ଆଦି ଭାଙ୍ଗିବାର ଆଶଙ୍କା ରହିଛି । ଉପକୂଳ ଓ ଉତ୍ତର ଉପକୂଳ ଜିଲ୍ଲାଗୁଡିକରେ ପବନ ସହ ୨୫ ତାରିଖ ପର୍ଯ୍ୟନ୍ତ ପ୍ରବଳ ବର୍ଷା ହେବା ନେଇ ରେଡ ଓ୍ବାର୍ଣ୍ଣିଂ ଜାରି କରାଯାଇଛି ।
- ଜିରୋ-କାଜୁଆଲିଟି ମୋଡରେ ମୁକାବିଲା ପ୍ରସ୍ତୁତି:-
ବାତ୍ୟା ‘ଦାନା’ର ମୁକାବିଲା ପାଇଁ ରାଜ୍ୟ ସରକାର ‘ଜିରୋ-କାଜୁଆଲିଟି ମୋଡ’ରେ ତମାମ ପ୍ରସ୍ତୁତି କରିଛନ୍ତି । ରାଜ୍ୟର ସମସ୍ତ ପ୍ରଶାସନିକ ଓ ଅନ୍ୟ ବିଭାଗୀୟ ଅଧିକାରୀ ଓ କର୍ମଚାରୀଙ୍କ ଛୁଟି ବାତିଲ କରାଯାଇଛି । ‘ଏସଆରସି’ ଅଫିସରେ ଏକ ଜରୁରୀକାଳୀନ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ଖୋଲାଯାଇ ପାଣିପାଗ ବିଭାଗ, ଜିଲ୍ଲା ପ୍ରଶାସନ, ପୋଲିସ ଓ ଅନ୍ୟ ସମସ୍ତ ଜରୁରୀ ତଥା ଉଦ୍ଧାରକାରୀ ବିଭାଗ ସହ ନିୟମିତ ଯୋଗାଯୋଗରେ ରହିଛନ୍ତି ରାଜ୍ୟ ସରକାର । ଜାତୀୟ ବିପର୍ଯ୍ୟୟ ପ୍ରଶମନ ବଳ ‘ଏନଡିଆରଏଫ’କ ଏକାଧିକ ଅତିରିକ୍ତ ୟୁନିଟ ବାହାର ରାଜ୍ୟରୁ ଆସି ପହଞ୍ଚି ସାରିଛନ୍ତି । ଓଡ୍ରାଫ, ଅଗ୍ନିଶମ ଓ ପୋଲିସ ବିଭାଗ ମଧ୍ୟ ସମସ୍ତ ପ୍ରସ୍ତୁତି ଶେଷ କରି ଉପକରଣ ସହ ଗ୍ରାଉଣ୍ଡ ଜିରୋ ଅଭିମୁଖେ ବାହାରି ସାରିଛନ୍ତି ।
Yesterday’s deep depression over Eastcentral Bay of Bengal moved west-northwestwards with a speed of 18 kmph during past 6 hours intensified into a cyclonic storm “DANA” (pronounced as Dana), and lay centred at 0530 hrs IST of today, the 23rd October, over the same region near… pic.twitter.com/zsaO5gcczd
— India Meteorological Department (@Indiametdept) October 23, 2024
- ଆଜି ସଂଧ୍ୟା ସୁଦ୍ଧା ସ୍ଥାନାନ୍ତର ହେବେ ୧୦ ଲକ୍ଷ ଲୋକ
ଉପକୂଳ ଓଡିଶାର ଏକାଧିକ ଜିଲ୍ଲାରୁ ପ୍ରାୟ 10 ଲକ୍ଷ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବା ପାଇଁ ପ୍ରକ୍ରିୟା ଆରମ୍ଭ ହୋଇଛି । ଆଜି ସଂଧ୍ୟା ସୁଦ୍ଧା ସେମାନଙ୍କୁ ପ୍ରସ୍ତୁତ ହୋଇଥିବା 6,244ଟି ରିଲିଫ ଓ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯିବ । ରାଜ୍ୟ ପ୍ରଶାସନର 6 ସଚିବଙ୍କୁ 6ଟି ସମ୍ଭାବ୍ୟ ପ୍ରଭାବିତ ଜିଲ୍ଲାର ବାତ୍ୟା ପରିଚାଳନା ଦାୟିତ୍ବ ଦିଆଯାଇଛି । ସେପରି ସର୍ବାଧିକ ପ୍ରଭାବିତ ଜିଲ୍ଲାଗୁଡିକର ରିଲଫ, ରେସକ୍ୟୁ ଓ ରିଷ୍ଟୋରେସନ କାମ ନିଜେ ବରିଷ୍ଠ ମନ୍ତ୍ରୀମାନେ ସମୀକ୍ଷା କରିବେ । ରାଜ୍ୟର ସମସ୍ତ ବିଧାୟକ/ବିଧାୟିକାମାନେ ସେମାନଙ୍କ ଅଞ୍ଚଳରେ ରହିବା ସହ ବାତ୍ୟା ମୁକାବିଲାରେ ଲୋକଙ୍କୁ ସାହାଯ୍ୟ କରିବା ଓ ପ୍ରଶାସନକୁ ସହଯୋଗ କରିବା ପାଇଁ ମୁଖ୍ୟମନ୍ତ୍ରୀ ମୋହନ ମାଝୀ ଅନୁରୋଧ କରିଛନ୍ତି ।
ଇଟିଭି ଭାରତ, ଭୁବନେଶ୍ବର
