କଟକ: ସରିଲା ବାଲିଯାତ୍ରା । ଲୋକେ ବିକାକିଣା କଲେ । ଯିଏ ଯାହା ରାଜ୍ୟକୁ ଫେରିଲେ । ବାଲିଯାତ୍ରା ସରିବାର ଏ ମଧ୍ୟରେ 4 ଦିନ ବିତିଲାଣି । ହେଲେ ଏ ପର୍ଯ୍ୟନ୍ତ ସଫା ହୋଇପାରିନି ବାଲିଯାତ୍ରା ପଡିଆ । ଯୁଆଡେ ଚାହିଁଲେ କୁଢ କୁଢ ଅଳିଆ । ଆବର୍ଜନାରେ ଦୁର୍ଗନ୍ଧରେ ଫାଟି ପଡୁଛି ପରିବେଶ । ହେଲେ ସେ ପ୍ରତି ଯେମିତି କାହାର ନିଘା ନାହିଁ । ବାଲିଯାତ୍ରା ସରିବା ମାତ୍ରେ ଉଭୟ ପଡିଆକୁ ସଫା କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଥିଲେ । ସେହିପରି NGTର ନିର୍ଦ୍ଦେଶ ମଧ୍ୟ ରହିଛି । ମାତ୍ର ଏହି ନିର୍ଦ୍ଦେଶ କେବଳ କାଗଜ କଲମରେ ହିଁ ସୀମିତ ହୋଇ ରହିଯାଇଥିବା କଟକ ବାସିନ୍ଦା ଅଭିଯୋଗ କରିଛନ୍ତି । କେବଳ ସେତିକି ନୁହେଁ ବରଂ ଦଶହରା ଠାରୁ ବାଲିଯାତ୍ରା ପର୍ଯ୍ୟନ୍ତ ହାଇକୋର୍ଟ ଯେଉଁ ନିର୍ଦ୍ଦେଶ ଦେଇଥିଲେ ତାହା ଜିଲ୍ଲା ପ୍ରଶାସନ ଏବଂ ସିଏମସି ପାଳନ କରିନଥିବା ଆଇନଜୀବୀ ଅଭିଯୋଗ ଆଣିଛନ୍ତି । ଏହାକୁ ନେଇ ପ୍ରଶାସନ ଏବଂ ସିଏମସି ବିରୋଧରେ ଅଦାଲତ ଅବମାନନା ମାମଲା ରୁଜୁ ହେବ ବୋଲି ଚେତାବନୀ ଦେଇଛନ୍ତି ହାଇକୋର୍ଟ ଆଇନଜୀବୀ ।
ବାଲିଯାତ୍ରା ପଡିଆରେ ଖାଲି ଅଳିଆ ଆଉ ଅଳିଆ:
ବାଲିଯାତ୍ରା ସରିବା ପରେ ଅନେକ ବ୍ୟବସାୟୀ ଚାଲିଗଲେଣି । ଆଉ ଯେଉଁ କେତେଜଣ ଅଛନ୍ତି, ସେମାନେ ବି ଏବେ ଘର ମୁହାଁ ।
କିନ୍ତୁ ବଡ଼ କଥା ହେଉଛି ଯେ,ଗତ ଶନିବାରଠୁ ଆଜି ପର୍ଯ୍ୟନ୍ତ ସଫେଇ ପ୍ରକ୍ରିୟା ସମ୍ପୂର୍ଣ୍ଣ ବନ୍ଦ ରହିଛି । ଫଳରେ ଏବେ ଜରି ଓ ପଲିଥିନ୍ ଆବର୍ଜନାରେ ପୋତି ହୋଇଗଲାଣି ଉଭୟ ଉପର ଓ ତଳ ପଡିଆ । ଏମିତିକି ସବୁ ଆବର୍ଜନା ଉଡି ଏବେ ନଦୀରେ ମିଶୁଥିବାରୁ ନଦୀକୂଳ ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡିଛି । ଏହାସହ ଆବର୍ଜନା ଭିତରେ ପୂରା ପଡ଼ିଆ ଓ ଆଖପାଖ ଅଞ୍ଚଳ ଏବେ ଦୁର୍ଗନ୍ଧରେ ଫାଟି ପଡୁଛି । ସବୁ ପ୍ରକାରର କଟକଣାକୁ ଫୁ' କରି ପ୍ରଶାସନ ଏବେ ନିଜ ଦାୟିତ୍ଵ ଭୁଲିଯାଇଥିବା କଟକ ବାସିନ୍ଦା ଅଭିଯୋଗ କରିଛନ୍ତି ।
ଚଳିତ ବର୍ଷ ବାଲିଯାତ୍ରା, ଜିଲ୍ଲା ପ୍ରଶାସନ ଦ୍ବାରା ଆୟୋଜନ କରାଯାଇଥିଲା । ତେବେ ବାଲିଯାତ୍ରା ସଠିକ ଭାବରେ ପରିଚାଳନା କରିବାକୁ ହାଇକୋର୍ଟ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଥିଲେ । ସେହିପରି ଏନ୍ଜିଟିଙ୍କ ଗାଇଡଲାଇନ୍ସ ମଧ୍ୟ ରହିଛି । ମାତ୍ର ସେ ସବୁ ନିର୍ଦ୍ଦେଶନାମାକୁ ପ୍ରଶାସନ ଫୁ କରି ଦେଇଥିବା କଟକ ବାସିନ୍ଦା ଅଭିଯୋଗ କରିଛନ୍ତି ।
ସଫେଇକୁ ନେଇ ରହିଥିଲା କେଁ:
ଚଳିତ ବର୍ଷ ସଫେଇକୁ ନେଇ ଆରମ୍ଭରୁ କେଁ ଦେଖାଦେଇଥିଲା । ପରିଚାଳନା କମିଟି ବଦଳରେ କଟକ ମହାନଗର ନିଗମ (ସିଏମସି) ଏହି ଟେଣ୍ଡର୍ ଡାକିଥିଲା । ତାହା ପୁଣି ୫୨ ଲକ୍ଷର ଟେଣ୍ଡର୍ରେ ମାସେ ସଫେଇ କରିବାକୁ ଚୁକ୍ତି ଉଲ୍ଲେଖ ଥିଲା । ଏହାକୁ ବାତିଲ୍ କରାଯାଇ ସମାନ ମୂଲ୍ୟରେ ଜିଲ୍ଲା ପ୍ରଶାସନ ପୁଣି ଡାକିଲା ତାହା ପୁଣି ୧୭ଦିନ ପାଇଁ । ଏଥିରେ ବାଲିଯାତ୍ରା ଦୁଇ ଦିନ ପୂର୍ବରୁ ସଫେଇ ହେବ । ତାହାବାଦ୍ ବାଲିଯାତ୍ରା ବେଳେ ୩ ଓଳି କର୍ମଚାରୀ ନିୟୋଜିତ କରାଯିବ । ଏମିତିକି ବାଲିଯାତ୍ରା ସରିବାର ୮ ଦିନ ସଫେଇ ଚାଲିବ । ପୂରା ପଡିଆକୁ ସଫା ରଖିବା ପାଇଁ ୧୭ ଦିନର ସଫେଇ ଟେଣ୍ଡର୍ ହୋଇ ୫୨ ଲକ୍ଷରେ ନିର୍ଦ୍ଦିଷ୍ଟ ସଂସ୍ଥା ଜାଗୃତିକୁ ଦିଆଗଲା । ଉକ୍ତ ସଂସ୍ଥା ଗତ ୧୩ରୁ ୨୯ ତାରିଖ ପର୍ଯ୍ୟନ୍ତ ସଫେଇ କରିବାକୁ ଚୁକ୍ତି ହୋଇଛି । କିନ୍ତୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେ, ଆରମ୍ଭରୁ ଏହାକୁ ନେଇ ଅସନ୍ତୋଷ ପ୍ରକାଶ ପାଇଥିଲା । ଯଦିଓ ବାଲିଯାତ୍ରା ୮ମ ରାତି ପର୍ଯ୍ୟନ୍ତ ସଫେଇ ହୋଇଥିଲା ସେଥିରେ ସିଏମ୍ସିର ଗାଡି ଓ କର୍ମଚାରୀ ନିୟୋଜିତ ହୋଇଥିଲେ । ବାଲିଯାତ୍ରା ସରିବା ମାତ୍ରେ ଉଭୟ ପଡିଆ ସଫା କରିବା କଥା । ମାତ୍ର ଏହାକୁ ବି ଉଲ୍ଲଘଂନ କରାଯାଇଛି ।
ଅଦାଲତ ଅବମାନନା ମାମଲା ରୁଜୁ ଚେତାବନୀ:
ଅନ୍ୟପଟେ ହାଇକୋର୍ଟର ଆଇନଜୀବୀ ଆଲୋକ ମହାପାତ୍ର କହିଛନ୍ତି, ‘ହାଇକୋର୍ଟ ଏହି ପ୍ରସଙ୍ଗକୁ ନେଇ ଯେଉଁ ନିର୍ଦ୍ଦେଶ ଦେଇଥିଲେ ପ୍ରଶାସନ ତାହାକୁ ଉଲ୍ଲଙ୍ଘନ କରିଛି । ତେବେ ଏନେଇ ପ୍ରଶାସନ ଏବଂ ସିଏମସି ବିରୋଧରେ ଅଦାଲତ ଅବମାନନା ମାମଲା ରୁଜୁ ହେବ ।’
