ଭୁବନେଶ୍ବର: ଓଡ଼ିଶା ଆକାଶରେ ଦୃଶ୍ୟମାନ ହେଲା ଧୂମକେତୁ । ଆଜି (ଅକ୍ଟୋବର ୧ ତାରିଖ, ମଙ୍ଗଳବାର) ଭୋର ସମୟରେ ରାଜ୍ୟ ତଥା ଦେଶର କେତେକ ସ୍ଥାନରେ ଅଳ୍ପ ସମୟ ପାଇଁ ୮୦ ହଜାର ବର୍ଷ ତଳର ଏକ ଉଲକା ବା ଧୂମକେତୁ 'ସି/୨୦୨୩ ଏ-୩' (Comet C/2023 A3 Tsuchinshan-ATLAS) ଆକାଶରେ ଦେଖିବାକୁ ମିଳିଛି । ଧୂମକେତୁକୁ ସାଧାରଣ ଦୂରବେକ୍ଷଣ ଓ ବାଇନାକୁଲାରରେ ଦେଖିବାକୁ ମିଳିବ । ଏହାର ଫଟୋ ମଧ୍ୟ ନିଆଯାଇଛି । ଫଟୋ ଜର୍ଣ୍ଣାଲିଷ୍ଟ ରାକେଶ କୁମାର ରାଉଳ ଏହି ଧୂମକେତୁର ଏକ ଫଟୋ ନେଇଛନ୍ତି । ଖୋର୍ଦ୍ଧା-ନୟାଗଡ଼ ରାସ୍ତାରୁ ଧୂମକେତୁର ଏହି ଫଟୋ ଉତ୍ତୋଳନ କରାଯାଇଛି।
ସି/୨୦୨୩ ଏ-୩' ଧୂମକେତୁ:
ସି/୨୦୨୩ ଏ-୩' ଧୂମକେତୁଟି ଅକ୍ଟୋବର ମାସ ୧୫ରୁ ୨୦ ତାରିଖ ଖାଲି ଆଖିକୁ ଦେଖାଯିବର ସମ୍ଭାବନା ରହିଛି । ଏହା ମାସ ଶେଷ ଯାଏଁ ଖାଲି ଆଖିକୁ ଦେଖାଯିବ ବୋଲି କିଛି ବୈଜ୍ଞାନିକ ଅନୁମାନ ମଧ୍ୟ କରିଛନ୍ତି । ଅକ୍ଟୋବର ମାସ ୧୬ ତାରିଖରେ ପ୍ରାୟ ୬ କୋଟି କିଲୋମିଟର ଦୂରତାରେ ଏହା ପୃଥିବୀର ନିକଟତମ ଅବସ୍ଥାକୁ ଆସିବ । ୧୫ ତାରିଖ ସନ୍ଧ୍ୟା ୬ଟା ୧୫ ସମୟରେ ପଶ୍ଚିମ ଦିଗବଳୟର ପ୍ରାୟ ୧୬ ଡିଗ୍ରୀ ଉପରେ ଏହା ଦେଖାଯିବ । ପରେ ଧିରେ ଧିରେ ତଳଆଡ଼କୁ ଗତିକରି ପ୍ରାୟ ଅଧଘଣ୍ଟା ପରେ ଅସ୍ତ ହୋଇଯିବ ।
ଏହି ଦିନରେ ଖାଲି ଆଖିରେ ଦେଖାଯିବ:
ପରବର୍ତ୍ତୀ ଦିନଗୁଡ଼ିକରେ ଏକା ସମୟ ଅର୍ଥାତ୍ ସନ୍ଧ୍ୟା ୬ଟା୧୫ ରେ ପୂର୍ବଦିନ ଠାରୁ ପ୍ରାୟ ୪ ଡିଗ୍ରୀ ଉପରେ ଦେଖାଯିବ ଓ ପୂର୍ବ ଦିନ ତୁଳନାରେ ଅସ୍ତ ହେବାକୁ ୧୦ରୁ ୧୭ ମିନିଟ୍ ଅଧିକ ସମୟ ନେବ । ଏହିପରି ଦିନ ପରେ ଦିନ ଧିରେ ଧିରେ ଏହା ଉପରରୁ ଉପରକୁ ଦେଖାଯାଇ ୨୦ ତାରିଖରେ ୩୬ ଡିଗ୍ରୀ ଉପରେ ପହଞ୍ଚିବ । ଧୂମକେତୁ ସୂର୍ଯ୍ୟଠାରୁ ଦୂରେଇ ଯାଉଥିବା ଫଳରେ ଏହାର ଉଜ୍ବଳତା କମି କମି ୨୦ ତାରିଖ ପରେ ଏହାକୁ ଖାଲି ଆଖିରେ ଦେଖିବା ସମ୍ଭବ ହେବନାହିଁ । ‘ସି/୨୦୨୩ ଏ-୩' ଧୂମକେତୁଟି ପୁଣି ଥରେ ୮୦ ହଜାର ବର୍ଷ ପରେ ପାଖକୁ ଆସିବ ।
ଇଟିଭି ଭାରତ, ଭୁବନେଶ୍ବର
