ଭୁବନେଶ୍ବର: ରାମ ଜନ୍ମଭୂମି ଅଯୋଧ୍ୟାରେ ଆଜି ପ୍ରଭୁ ଶ୍ରୀରାମଙ୍କ ବହୁପ୍ରତୀକ୍ଷିତ ପ୍ରାଣ ପ୍ରତିଷ୍ଠା ଉତ୍ସବ ସମ୍ପନ୍ନ ହୋଇଛି । ଦେଶ ଓ ବିଦେଶରୁ ପ୍ରାୟ 7 ହଜାର ନିମନ୍ତ୍ରିତ ଅତିଥି ଏହି ଭବ୍ୟ ସମାରୋହରେ ସାମିଲ ହୋଇଛନ୍ତି । ତେବେ ଦେଶବ୍ୟାପୀ କୋଟି କୋଟି ଶ୍ରଦ୍ଧାଳୁ ଦୂରଦର୍ଶନ ମାଧ୍ୟମରେ ଏହି ଭବ୍ୟ କ୍ଷଣର ସାକ୍ଷୀ ହୋଇଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜ ଭୁବନେଶ୍ବରସ୍ଥିତ ବାସଭବନ ନବୀନ ନିବାସରେ ଟିଭିରେ ପ୍ରାଣ ପ୍ରତିଷ୍ଠା ଉତ୍ସବର ସିଧା ପ୍ରସାରଣ ଦେଖିଛନ୍ତି । ତାଙ୍କ ସହ ତାଙ୍କର ପୂର୍ବତନ ବ୍ୟକ୍ତିଗତ ସଚିବ ତଥା 5ଟି ଅଧ୍ୟକ୍ଷ ପାଣ୍ଡିଆନ ମଧ୍ୟ ସାମିଲ ଥିଲେ । ନବୀନ ପ୍ରାଣ ପ୍ରତିଷ୍ଠା କାର୍ଯ୍ୟକ୍ରମ ଦେଖିବା ବେଳେ ବେଶ ଭକ୍ତିର ସହ ଯୋଡ଼ହସ୍ତରେ ପ୍ରଣାମ କରୁଥିବା ଦେଖିବାକୁ ମିଳିଥିଲା । ଏହା ପରେ ସେ ନିଜ ‘ଏକ୍ସ’ ହ୍ୟାଣ୍ଡେଲରେ ମଧ୍ୟ ଟ୍ବିଟ କରିଛନ୍ତି । ପ୍ରଭୁ ରାମଲାଲାଙ୍କ ପ୍ରାଣ ପ୍ରତିଷ୍ଠାରେ ସେ ବେଶ ଆନନ୍ଦିତ ବୋଲି ଲେଖିଛନ୍ତି ନବୀନ ।
ରାମ ମନ୍ଦିର ପ୍ରତିଷ୍ଠାର ମାତ୍ର 5 ଦିନ ପୂର୍ବରୁ (17 ତାରିଖ)ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶ୍ରୀକ୍ଷେତ୍ର ପୁରୀରେ ‘ଶ୍ରୀମନ୍ଦିର ପରିକ୍ରମା ପ୍ରକଳ୍ପ’ର ଲୋକାର୍ପଣ କରିଥିଲେ । 5-ଟି ଅଧ୍ୟକ୍ଷ ଭି.କେ ପାଣ୍ଡିଆନଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ଶେଷ ହୋଇଥିବା ଏହି ବହୁଚର୍ଚ୍ଚିତ ପ୍ରକଳ୍ପର 5ବର୍ଷ ପୂର୍ବେ ମୁଖ୍ୟମନ୍ତ୍ରୀ ନବୀନଙ୍କ ଦ୍ବାରା ଭିତ୍ତିପ୍ରସ୍ତର ସ୍ଥାପନ ହୋଇଥିଲା । ଏଥିରେ ପ୍ରାୟ 7ଶହ କୋଟି ଟଙ୍କା ଖର୍ଚ୍ଚ ହୋଇଛି ।
ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ବାରା ରାମମନ୍ଦିର ଗର୍ଭଗୃହରେ ରାମଲାଲାଙ୍କ ଶ୍ରୀବିଗ୍ରହଙ୍କ ପ୍ରାଣ ପ୍ରତିଷ୍ଠା ନୀତି ଶେଷ ହୋଇଛି । 40 ମିନିଟ ଧରି ପ୍ରାଣ ପ୍ରତିଷ୍ଠା ବିଧି ଚାଲିଥିବା ବେଳେ ମାତ୍ର ମାତ୍ର 84 ସେକେଣ୍ଡ ମଧ୍ୟରେ ମୁଖ୍ୟ ନୀତି ସମାପିତ ହୋଇଥିଲା । ପ୍ରଧାନମନ୍ତ୍ରୀଙ୍କ ସହ ସଂଘ ପ୍ରମୁଖ ମୋହନ ଭାଗବତ ମଧ୍ୟ ଗର୍ଭଗୃହରେ ଉପସ୍ଥିତ ଥିଲେ । ୧୨.୧୫ ମିନିଟରୁ ୧୨.୪୫ ମିନିଟ ମଧ୍ୟରେ ପ୍ରାଣ ପ୍ରତିଷ୍ଠା ଉତ୍ସବ ଶେଷ ହୋଇଥିଲା । ଏହା ପରେ ପ୍ରଧାନମନ୍ତ୍ରୀ ମୋଦି, ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ପ୍ରମୁଖ କାର୍ଯ୍ୟକ୍ରମକୁ ସମ୍ବୋଧିତ କରିଥିଲେ । ପରେ ପ୍ରଥମେ ସାଧୁସନ୍ଥମାନେ ଦର୍ଶନ କରିବା ପରେ ଅନ୍ୟ ନିମନ୍ତ୍ରିତ ଅତିଥିମାନେ ରାମଲାଲାଙ୍କୁ ଦର୍ଶନ କରୁଛନ୍ତି । ସଂଧ୍ୟା ଆଳତି ହେବା ପର୍ଯ୍ୟନ୍ତ ଅତିଥିମାନେ ଗର୍ଭଗୃହରେ ଦର୍ଶନ କରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
