ଭୁବନେଶ୍ବର: କଂଗ୍ରେସକୁ ଏକାଧିକ ପ୍ରଶ୍ନ କରି ଟାର୍ଗେଟ କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଜାମ୍ମୁ ଓ କାଶ୍ମୀର ବିଧାନସଭା ନିର୍ବାଚନ ପାଇଁ ଅବଦୁଲ୍ଲା ପରିବାର ଦ୍ୱାରା ପରିଚାଳିତ ‘ନ୍ୟାସନାଲ କନଫରେନ୍ସ’ ସହ ମେଣ୍ଟ କରି କଂଗ୍ରେସ ଦେଶରେ ସୁରକ୍ଷା ଓ ଦେଶବାସୀଙ୍କ ସ୍ବାର୍ଥକୁ ବିପଦରେ ପକାଇଛି ବୋଲି କହି ଟାର୍ଗେଟ କରିଛନ୍ତି ମୁଖ୍ୟମନ୍ତ୍ରୀ । ଏହା ସହ କଂଗ୍ରେସକୁ 10ଟି ପ୍ରଶ୍ନ ମଧ୍ୟ କରି କଂଗ୍ରେସ ନିଜର ଆଭିମୁଖ୍ୟ ସ୍ପଷ୍ଟ କରୁ ବୋଲି କହିଛନ୍ତି । । ସମସ୍ତ ପ୍ରଶ୍ନ ଜମ୍ମୁ କାଶ୍ମୀର ନିର୍ବାଚନରେ ଫାରୁକଙ୍କ ଦଳ ନ୍ୟାସନାଲ କନଫରେନ୍ସ ସହ ମେଣ୍ଟ କରିବା ସମ୍ପର୍କରେ ରହିଛି ।
- ଭିଡିଓ ବାର୍ତ୍ତାରେ କଂଗ୍ରେସ ଓ ରାହୁଲଙ୍କୁ ଟାର୍ଗେଟ:-
ଗତକାଲି ମୁଖ୍ୟମନ୍ତ୍ରୀ ମୋହନ ଏକ ଭିଡିଓ ବାର୍ତ୍ତା ଜାରି କରି କଂଗ୍ରେସ ଉପରେ ବର୍ଷିଛନ୍ତି । କହିଛନ୍ତି,‘‘କ୍ଷମତା ଲୋଭରେ ଅନ୍ଧ କଂଗ୍ରେସ ଦଳ । କ୍ଷମତା ପାଇଁ ଦେଶରେ ଅରାଜକତା, ବିଶୃଙ୍ଖଳା, ଅସ୍ଥିରତା, ବିଦ୍ୱେଷ ସୃଷ୍ଟି କରିବାକୁ ଆଦୌ ପଛଘୁଞ୍ଚା ଦିଏନାହିଁ କଂଗ୍ରେସ ଦଳ । ଦେଶ ବିଭାଜନକାରୀ ଓ ରାଷ୍ଟ୍ରବିରୋଧୀ ତତ୍ତ୍ବ ସହ ହାତ ମିଳାଇ ବାରମ୍ବାର ଦେଶବାସୀଙ୍କ ସ୍ୱାର୍ଥ ଓ ରାଷ୍ଟ୍ରର ସୁରକ୍ଷାକୁ ବିପଦରେ ପକାଇଛି କଂଗ୍ରେସ ଦଳ । ଏପରିକି ଦେଶର ସୁରକ୍ଷା, ସାର୍ବଭୌମତ୍ୱ ଏବଂ ଏକତାକୁ ବିପଦରେ ପକାଇଛି । ନିଜ ସ୍ୱାର୍ଥକୁ ଚରିତାର୍ଥ କରିବା ପାଇଁ ଆଗାମୀ ଜାମ୍ମୁ ଓ କାଶ୍ମୀର ବିଧାନସଭା ନିର୍ବାଚନରେ ଅବଦୁଲ୍ଲା ପରିବାର ଦ୍ୱାରା ପରିଚାଳିତ ‘ନ୍ୟାସନାଲ କନଫରେନ୍ସ’ ସହ ମେଣ୍ଟ କରି ବହୁ ପ୍ରଶ୍ନବାଚୀ ସୃଷ୍ଟି କରିଛି । ନ୍ୟାସନାଲ କନଫରେନ୍ସ ନିଜ ନିର୍ବାଚନ ଇସ୍ତାହାରରେ ଦେଇଥିବା ପ୍ରତିଶ୍ରୁତି ପ୍ରସଙ୍ଗରେ କଂଗ୍ରେସ ଦଳର ନେତା ରାହୁଲ ଗାନ୍ଧୀ ଦେଶବାସୀଙ୍କୁ ସ୍ପଷ୍ଟୀକରଣ ଦେବା ଉଚିତ୍ ।’’
- ଧାରା 370 ପ୍ରସଙ୍ଗରେ କଣ କଂଗ୍ରେସର ଆଭିମୁଖ୍ୟ :-
‘ଏକ ଦେଶ ମେ ଦୋ ନିଶାନ’ ଜାମ୍ମୁ ଓ କାଶ୍ମୀରରେ ପୃଥକ ପତାକା ପାଇଁ ନ୍ୟାସନାଲ କନଫରେନ୍ସର ପ୍ରତିଶ୍ରୁତିକୁ କଂଗ୍ରେସ ଦଳ ସମର୍ଥନ କରୁଛି କି ? ପୁଣି ଥରେ ଧାରା-୩୭୦ ଓ ୩୫ (କ)ର ପୁନଃସ୍ଥାପିତ କରିବାକୁ ନ୍ୟାସନାଲ କନଫରେନ୍ସର ପ୍ରତିଶ୍ରୁତିକୁ କଂଗ୍ରେସ ଦଳ ସମର୍ଥନ କରୁଛି କି? ଏହା ଦ୍ୱାରା ଜାମ୍ମୁ ଓ କାଶ୍ମୀରରେ ପୁଣି ଥରେ ଆତଙ୍କବାଦୀ କାର୍ଯ୍ୟକଳାପ ବୃଦ୍ଧି କରି, ଅଶାନ୍ତ ବାତାବରଣ ସୃଷ୍ଟି କରାଯିବାକୁ ସମର୍ଥନ କରୁଛି କି ? ଜାମ୍ମୁ ଓ କାଶ୍ମୀରବାସୀଙ୍କ ସହ କଥାବାର୍ତ୍ତା ହୋଇ ଶାନ୍ତି ସୈାହାର୍ଦ୍ଦ୍ୟ ପ୍ରତିଷ୍ଠା ବଦଳରେ ଚରମ ଶତୃ ପାକିସ୍ଥାନ ସହ କଥାବାର୍ତା କରି ବିଛିନ୍ନତାବାଦୀଙ୍କୁ ପ୍ରୋତ୍ସାହନ ଦେବା ପ୍ରତି କଂଗ୍ରେସର ସମର୍ଥନ ଅଛି କି ? ବୋଲି ମୁଖ୍ୟମନ୍ତ୍ରୀ ପ୍ରଶ୍ନ କରିଛନ୍ତି । କଂଗ୍ରେସ ଦଳ ଏବଂ ତାଙ୍କ ନେତା ରାହୁଲ ଗାନ୍ଧୀ ଦେଶବାସୀଙ୍କୁ ସ୍ପଷ୍ଟୀକରଣ ଦିଅନ୍ତୁ ବୋଲି ମୁଖ୍ୟମନ୍ତ୍ରୀ ମୋହନ କହିଛନ୍ତି ।
କଂଗ୍ରେସ କହିଲେ ଟେଲି-ପ୍ରମ୍ପଟର ମୁଖ୍ୟମନ୍ତ୍ରୀ:-
ଅନ୍ୟପଟେ କଂଗ୍ରେସ କ୍ୟାମ୍ପରୁ ମଧ୍ୟ ମୁଖ୍ୟମନ୍ତ୍ରୀଙ୍କୁ ପାଲଟା କଟାକ୍ଷ କରାଯାଇଛି । କଂଗ୍ରେସ କହିଛି, ମୁଖ୍ୟମନ୍ତ୍ରୀ ହେଉଛନ୍ତି ଟେଲି-ପ୍ରମ୍ପଟର ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀଙ୍କ ପ୍ରତିକ୍ରିୟା ଆସିବା ପରେ ମୁଖପାତ୍ର କଂଗ୍ରେସ ବିଶ୍ୱରଞ୍ଜନ ମହାନ୍ତି ପ୍ରତିକ୍ରିୟା ରଖି କହିଛନ୍ତି,‘‘ଆମ ରାଜ୍ୟର ଟେଲି-ପ୍ରମ୍ପଟର ମୁଖ୍ୟମନ୍ତ୍ରୀଙ୍କ ପାଖେ ନିଜ ରାଜ୍ୟ ଚଳାଇବାକୁ ସମୟ ନାହିଁ, ନିଜ ରାଜ୍ୟର ଶାସନ ଚଳାଇବାକୁ ଦିଲ୍ଲୀଠୁ ନିର୍ଦ୍ଦେଶ ପାଇବାକୁ ଅପେକ୍ଷା କରନ୍ତି, କିନ୍ତୁ ତାଙ୍କ ପାଖେ କାଶ୍ମୀର ଓ କଂଗ୍ରେସ ଦଳ ବିଷୟରେ ଆଲୋଚନା କରିବାକୁ ସମୟ ଅଛି ।’’
- ନିଜ ରାଜ୍ୟ କଥା ଚିନ୍ତା କରୁନ୍ତୁ ମୁଖ୍ୟମନ୍ତ୍ରୀ :-
କଂଗ୍ରେସ କହିଛି କେଉଁ ଦଳ ବାଜପେୟୀଙ୍କ ସରକାର ରେ ନେସନାଲ କନେଫରେନ୍ସ ସହ ଗଠବନ୍ଧନ କରିଥିଲା ? କେଉଁ ଦଳ ପିଡ଼ିପି ସହ ଗଠବନ୍ଧନ କରିଥିଲା ? କେଉଁ ଦଳର ନେତା ପାକିସ୍ତାନ ଯାଇ ବନ୍ଧୁତ୍ୱ ବସ୍ ଆରମ୍ଭ କରିଥିଲେ, ଯାହାର ଫଳ କାରଗିଲ ଯୁଦ୍ଧ ଥିଲା ? କେଉଁ ଦଳର ନେତା ପାକିସ୍ତାନ ବିନା ନିମନ୍ତ୍ରଣରେ ଯାଇ ବିରିୟାନୀ ଖାଇଥିଲେ ?ସେ ନେଇ ବିଜେପି ସ୍ପଷ୍ଟ କରୁ । ଦଳ ଆହୁରି ମଧ୍ୟ କହିଛି,
ସତ୍ୟ କଥା ହେଲା, ଯେବେ କଂଗ୍ରେସ ପାର୍ଟି ରାଜ୍ୟର ମୌଳିକ ସମସ୍ୟାକୁ ଲୋକଲୋଚନକୁ ଆଣୁଛି, ଦରଦାମ ବୃଦ୍ଧି, ବେକାରୀ ଓ ଦାଦନ ସମସ୍ୟା ଉପରେ ପ୍ରଶ୍ନ କରୁଛି, ବିଧାନସଭାରେ ସରଂକ୍ଷଣ ଉପରେ ପ୍ରଶ୍ନ କରୁଛି, ସେବେ ଆମ ରାଜ୍ୟର ମୁଖ୍ୟମନ୍ତ୍ରୀ କାଶ୍ମୀର କଥା କହି ରାଜ୍ୟର ଜନତାଙ୍କୁ ଭୂଆଁ ବୁଲାଇବାକୁ ଚେଷ୍ଟା କରୁଛନ୍ତି ! ମୋହନ ବାବୁ, ପ୍ରଥମେ ଆପଣ ରାଜ୍ୟର ହତାଶ କୃଷକ, ଶ୍ରମିକ, ଗରିବ ମଧ୍ୟବିତ୍ତଙ୍କ ଦୁଃଖ, ଉପରେ କୁହନ୍ତୁ, ରାଜ୍ୟବାସୀଙ୍କ ସମସ୍ୟା ସମାଧାନ କରନ୍ତୁ ।’’
ଇଟିଭି ଭାରତ, ଭୁବନେଶ୍ବର
