କଟକ: ରାଜଧାନୀ ଭୁବନେଶ୍ବର ଭଳି ସ୍ମାର୍ଟ ସିଟି ହେବ ହଜାରେ ବର୍ଷର ସହର କଟକ । କଟକ ଗସ୍ତ ବେଳେ ଏପରି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଟ୍ବିନ ସିଟି କହିଲେ କଟକ ଓ ଭୁବନେଶ୍ବରକୁ ବୁଝାଯାଏ, ସେହି ଅନୁସାରେ ବିଜେପି ସରକାର ଟ୍ବିନସିଟିକୁ ସ୍ମାର୍ଟ ସିଟି ଭାବରେ ଗଢିତୋଳିବେ ବୋଲି କହିଛନ୍ତି ମୁଖ୍ୟମନ୍ତ୍ରୀ ।
କଟକ ହେବ ସ୍ମାର୍ଟସିଟି:
କଟକ ସିଟିକୁ ସ୍ମାର୍ଟ ସିଟି କରାଯିବ ଆଜି କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଭୁବନେଶ୍ବର ସ୍ମାର୍ଟ ସିଟି ହୋଇଥିବା ବେଳେ କଟକକୁ ସ୍ମାର୍ଟ ସିଟି କରିବା ପାଇଁ ଦୀର୍ଘ ଦିନରୁ ଦାବି ହୋଇଆସୁଛି । ଆଗକୁ କଟକକୁ ସ୍ମାର୍ଟ ସିଟି ଗଢି ତୋଳାଯିବ ବୋଲି କହିଛନ୍ତି ।
ମୁଖ୍ୟମନ୍ତ୍ରୀଙ୍କ କଟକ ବୁଲା:
ଆଜି ମଣ୍ଡପରେ ଚାଲିଛି ମହାମାୟାଙ୍କ ମହାନବମୀ ପୂଜା । ଏହି ଅବସରରେ କଟକ ଗସ୍ତରେ ଆସିଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ମହାନବମୀ ତିଥିରେ କଟକର ବିଭିନ୍ନ ପୂଜା ମଣ୍ଡପ ବୁଲି ମାଆଙ୍କୁ ଦର୍ଶନ କରିଥିଲେ ମୋହନ। ଏଥି ସହିତ ମୁଖ୍ୟ ମନ୍ତ୍ରୀ ମା’ଙ୍କର ଆଶୀର୍ବାଦ କାମନା କରି ରାଜ୍ୟବାସୀଙ୍କର ସୁଖ ଦୁଃଖ ଏବଂ ରାଜ୍ୟର ସମୃଦ୍ଧି କାମନା କରିଥିଲେ । ମୁଖ୍ୟମନ୍ତ୍ରୀ ପୂଜା ମଣ୍ଡପରେ ପହଞ୍ଚିବା ପରେ ତାଙ୍କୁ ସ୍ଵାଗତ କରାଯାଇଥିଲା । ବିଭିନ୍ନ ପୂଜା କମିଟିର କର୍ମକର୍ତ୍ତା ମୁଖ୍ୟମନ୍ତ୍ରୀଙ୍କୁ ପ୍ରତ୍ୟେକ ମଣ୍ଡପକୁ ପାଛୋଟି ନେଇଥିଲେ ।
40ଟି ମଣ୍ଡପ ବୁଲିଲେ ମୋହନ:
ଆଜି 40ଟି ପୂଜା ମଣ୍ଡପ ବୁଲି ମା’ ଦୁର୍ଗାଙ୍କ ଆଶିଷ ନେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ପ୍ରଥମେ ମୁଖ୍ୟମନ୍ତ୍ରୀ ଗୋପାଳପୁର, ଚାଉଳିଆଗଞ୍ଜ,ନୂଆବଜାର, ପୋତାପୋଖରୀ,ଶିଖରପୁର, ଯୋବ୍ରା, ରାଣୀହାଟ, କଲେଜ ଛକ, ମଙ୍ଗଳାବାଗ, ଖାନନଗର, ମଧୁପାଟଣା, ଛତ୍ରବଜାର, ଚୌଧୁରୀ ବଜାର, ଚାନ୍ଦିନୀ ଚୌକ ଆଦି ୪୦ଟି ପୂଜାମଣ୍ଡପ ବୁଲିଥିଲେ ।
ମୁଖ୍ୟମନ୍ତ୍ରୀଙ୍କ ପାଇଁ 35 ପ୍ରକାର ବ୍ୟଞ୍ଜନ:
ମୁଖ୍ୟମନ୍ତ୍ରୀଙ୍କ ପାଇଁ 35 ପ୍ରକାର ବ୍ୟଞ୍ଜନ ପ୍ରସ୍ତୁତ କରାଯାଇଥିଲା । ଦହିବରାକୁ ମିଶାଇ 34 ପ୍ରକାର ଆଇଟମ ପରସା ଯାଇଥିଲା । ଏହାକୁ ଖାଇ ବେଶ ଖୁସି ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି, ‘ଭାରଚାରା ସହର କଟକର ଐତିହାସିକ ଦୁର୍ଗାପୂଜା ହେଉଛି ସ୍ଵତନ୍ତ୍ର। ମୁଖ୍ୟମନ୍ତ୍ରୀ ହେବା ପରେ ଏହି ଦର୍ଶନ ମୋ ପାଇଁ ପରମ ସୌଭାଗ୍ୟର ବିଷୟ । ଆଗାମୀ ଦିନରେ ଭୁବନେଶ୍ବର ଭଳି କଟକ ମଧ୍ୟ ସ୍ମାର୍ଟ ସିଟି ହେବ। ଯେହେତୁ ଟ୍ବିନସିଟିରେ କଟକ ଓ ଭୁବନେଶ୍ବରକୁ ବୁଝାଯାଏ । ସେହି ଅନୁସାରେ ବିଜେପି ସରକାର ଟ୍ବିନସିଟିକୁ ସ୍ମାର୍ଟ ସିଟି ଭାବରେ ଗଢିତୋଳିବେ’ ।
ଇଟିଭି ଭାରତ, କଟକ
