ବ୍ରହ୍ମପୁର: ଭିଜିଲାନ୍ସ ଜାଲରେ ପୁଣି ଜଣେ ସରକାରୀ ବାବୁ । ବାଲେଶ୍ୱରରେ କାର୍ଯ୍ୟରତ ଆରଡବ୍ଲୁ ବିଭାଗର ମୁଖ୍ୟଯନ୍ତ୍ରୀଙ୍କ ଘରେ ଭିଜିଲାନ୍ସ ରେଡ । ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ମୁଖ୍ୟଯନ୍ତ୍ରୀ ଏନ୍.ଭି. ହରିହର ରାଓଙ୍କ ବାସଭବନ ସମେତ ୧୧ଟି ସ୍ଥାନରେ ଏକକାଳୀନ ଚଢାଉ କରାଯାଇଛି । ଭୁବନେଶ୍ୱର, ବ୍ରହ୍ମପୁର, ବାଲେଶ୍ୱର, କେନ୍ଦୁଝର ଏବଂ ଫୁଲବାଣୀରେ ଚଢାଉ ଜାରି ରଖିଛି ଭିଜିଲାନ୍ସ ଟିମ୍ ।
୧୧ ଠିକଣାରେ ଚଢାଉ :
ରାଜଧାନୀ ଭୁବନେଶ୍ୱରରେ ସ୍ୱତନ୍ତ୍ର କୋର୍ଟ ବିଚାରପତିଙ୍କ ପକ୍ଷରୁ ଜାରି କରାଯାଇଥିବା ସର୍ଚ୍ଚ ୱାରେଣ୍ଟ ଅନୁଯାୟୀ ଭିଜିଲାନ୍ସ ବିଭାଗ ପକ୍ଷରୁ ମୁଖ୍ୟଯନ୍ତ୍ରୀଙ୍କ ୧୧ଟି ଠିକଣାରେ ଏକକାଳୀନ ଚଢାଉ କରାଯାଇଛି । ଏଥିରେ ୧୧ ଜଣ ଡିଏସପି, ସାତ ଜଣ ଇନ୍ସପେକ୍ଟର , ୧୧ ଜଣ ଏଏସ୍ଆଇ ଏବଂ ଭିଜିଲାନ୍ସ ବିଭାଗର କର୍ମଚାରୀ ଏହି ଚଢାଉରେ ସାମିଲ ହୋଇଛନ୍ତି । ବର୍ତ୍ତମାନ ସୁଦ୍ଧା କେତେ ପରିମାଣର ସମ୍ପତ୍ତି ଜବତ ହୋଇଛି ସେନେଇ ଭିଜିଲାନ୍ସ ବିଭାଗ ପକ୍ଷରୁ କୌଣସି ସ୍ପଷ୍ଟ ସୂଚନା ଦିଆୟାଇ ନାହିଁ ।
ଏହି ସବୁ ସ୍ଥାନରେ ରେଡ୍:
ବାଲେଶ୍ୱରରେ କାର୍ଯ୍ୟରତ ଗ୍ରାମ୍ୟ ଉନ୍ନୟନ ବିଭାଗ ମୁଖ୍ୟଯନ୍ତ୍ରୀ ଏନ୍.ଭି.ହରିହର ରାଓଙ୍କ ବ୍ରହ୍ମପୁର ସହର ଉପକଣ୍ଠ ଭାବବିନିପୁର ଅଞ୍ଚଳର ପ୍ଲଟ ନଂ -୪୫୯୨ ରେ ରହିଛି ଗୋଟିଏ ଦୁଇ ମହଲା କୋଠା । ରାଜଧାନୀ ଭୁବନେଶ୍ୱରର ପାତ୍ରପଡାର ପ୍ଲଟ ନଂ ୨୮୪ ନଂ ରେ ରହିଛି ଏକ ମହଲା ବିଶିଷ୍ଟ ଘର , ବ୍ରହ୍ମପୁର ସହରର କମାପଲ୍ଲୀ ବୈଦ୍ୟନାଥପୁର ଥାନା ଅଞ୍ଚଳର ସ୍ପେଟରମ୍ ଗ୍ରୀନ୍ ଆପାର୍ଟମେଣ୍ଟର ପ୍ରଥମ ମହଲାରେ ରହିଛି ୩-ବି.ଏଚ୍.କେ ବିଶିଷ୍ଟ ଫ୍ଲାର୍ଟ । ଏହି ସବୁ ସ୍ଥାନରେ ଚଢାଉ ଜାରି ରହିଛି । ସେହିପରି ବ୍ରହ୍ମପୁରର ତୁଳସିନଗର ଏବଂ ଶାନ୍ତିନଗର ଅଞ୍ଚଳରେ ରହିଥିବା ମୁଖ୍ୟଯନ୍ତ୍ରୀଙ୍କ ସମ୍ପର୍କୀୟଙ୍କ ବାସଭବନ ସମେତ ଫୁଲବାଣୀ ଅଞ୍ଚଳରେ ରହିଥିବା ମୁଖ୍ୟଯନ୍ତ୍ରୀଙ୍କ ପୈତୃକ ବାସଭବନ, ବାଲେଶ୍ୱରରେ ରହିଥିବା ଗ୍ରାମ୍ୟ ଉନ୍ନୟନ ବିଭାଗର ସରକାରୀ କାର୍ଯ୍ୟାଳୟ, କ୍ୱାଟର ସମେତ କେନ୍ଦୁଝର ଅଞ୍ଚଳର ବଳଦେବ ଜିଉ କୋଲେନୀରେ ରହିଥିବା ସଂପର୍କୀୟଙ୍କ ଘରେ ଛାପା ମାରିଛି ଭିଜିଲାନ୍ସ ।
ଆକ୍ସନ ମୋଡରେ ଭିଜିଲାନ୍ସ:
ରାଜ୍ୟରେ ଜାରି ରହିଛି ଭିଜିଲାନ୍ସ ରେଡ । ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଦୁର୍ନୀତି ଖୋର ସରକାରୀ ବାବୁଙ୍କ ଘରେ ରେଡ୍ କରୁଛି ଭିଜିଲାନ୍ସ । ଯନ୍ତ୍ରୀଙ୍କଠାରୁ ଆରମ୍ଭ କରି ବିଇଓଙ୍କ ପରି ଅନେକ ସରକାରୀ ଅଧିକାରୀଙ୍କ ଘରେ ରେଡ କରି ସେମାନଙ୍କ ନିକଟରୁ କୋଟି କୋଟି ଟଙ୍କାର ସମ୍ପତ୍ତି ଠାବ କରାଯାଉଛି । ଆଜି ମୁଖ୍ୟଯନ୍ତ୍ରୀଙ୍କ ବାସଭବନ ଚଢାଉ ହୋଇଥିବା ବେଳେ କେତେ ପରିମାଣର ସମ୍ପତ୍ତି ଠାବ ହେଉଛି ତାହା , ଖାନତଲାସି ପରେ ସ୍ପଷ୍ଟ ହେବ ।
ଇଟିଭି ଭାରତ, ବ୍ରହ୍ମପୁର
