ମାଲକାନଗିରି: ସର୍ଚ୍ଚ ଅପରେସନ ବେଳେ ବିଏସଏଫକୁ ମିଳିଲା ବଡ ସଫଳତା । ଜିଲ୍ଲାର ପଡିଆ ଥାନା ଅନ୍ତର୍ଗତ ସିଲାକୋଟା ସଂରକ୍ଷିତ ଜଙ୍ଗଲ ମଧ୍ୟରେ ବିପୁଳ ମାଓ ସାମଗ୍ରୀ ଜବତ ହେବା ସହ ବିଏସଏଫ ଯବାନ ବୋମା ନିଷ୍କ୍ରିୟ କରିଛନ୍ତି । ଆଜି (ଶନିବାର) ସକାଳେ ବିଏସଏଫ ୧୪୨ ବାଟାଲିୟନ ଯବାନମାନେ ବାପନପାଲ୍ଲୀ ଓ ସିଲାକୋଟା ମଧ୍ୟରେ ଥିବା ଜଙ୍ଗଲରେ କମ୍ବିଂ ଅପରେସନ ଆରମ୍ଭ କରିଥିଲେ ।
ମିଳିଥିବା ସୂଚନା ଅନୁସାରେ ବିଏସଏଫ ଯବାନା ମାନେ ସର୍ଚ୍ଚ ଅପରେସନ ସମୟରେ ସିଲାକୋଟ ସଂରକ୍ଷିତ ଜଙ୍ଗଲର ଗୋଟିଏ ଗଛ ମୂଳେ ମାଓ ସାମଗ୍ରୀ ଥିବା ଜାଣିବାକୁ ପାଇଥିଲେ । ଉକ୍ତ ଅଞ୍ଚଳରେ ତଲାସି କରିବା ପରେ ସେହି ଅଞ୍ଚଳରୁ ୩ଟି ପ୍ରେସର ବୋମା, ୨୦ ମିଟର କୋଡେକ୍ସ ତାର, ୨୪ ଗୋଟି ଜିଲଟିନ ଷ୍ଟିକ୍, ୨ ବଣ୍ଡଲ ବିଦ୍ୟୁତ ତାର ଜବତ କରିଛନ୍ତି । ତେବେ ଏହି ସାମଗ୍ରୀ ଗୁଡିକ ସିଲାକୋଟା ଜଙ୍ଗଲର ଆରମ୍ଭରୁ ୩୦୦ ମିଟର ମଧ୍ୟରେ ତିନୋଟି ସ୍ଥାନରେ ସାମଗ୍ରୀ ଗୁଡିକ ମାଟି ତଳେ ପୋତା ହୋଇ ରଖାଯାଇଥିଲ।
ପ୍ରକାଶ ଥାଉକି ୨୦୧୧ ମସିହାରେ ସିଲାକୋଟା ଏକଦା ମାଓବାଦୀଙ୍କ ଆଡ୍ଡା ଭାବେ ପରିଚିତ ଥିଲା । ଏହି ଜବତ ସାମଗ୍ରୀ ଗୁଡିକ ବହୁ ବର୍ଷ ପୂର୍ବରୁ ଯବାନ ମାନଙ୍କୁ ଟାର୍ଗେଟ କରି ମାଟି ତଳେ ପୋତା ହୋଇଥିବା ସନ୍ଦେହ କରାଯାଉଛି । ପରେ ବିଏସଏଫର ବୋମା ନିଷ୍ଟ୍ରିୟକାରୀ ଟିମ ଆସି ଖଞ୍ଜାଯାଇଥିବା ବୋମାଗୁଡିକୁ ସେହି ସ୍ଥାନରେ ନିଷ୍କ୍ରିୟ କରିଥିବା ଏକ ଭିଡିଓ ଗଣମାଧ୍ୟମକୁ ପ୍ରଦାନ କରିଛି ।
ଏହା ବି ପଢନ୍ତୁ- ବୌଦ୍ଧରେ ମାଓବାଦୀ-ଯବାନ ଗୁଳି ବିନିମୟ: ମାଓ କ୍ୟାମ୍ପ ଧ୍ୱଂସ, ବିପୁଳ ଅସ୍ତ୍ରଶସ୍ତ୍ର ଜବତ
ଏହା ବି ପଢନ୍ତୁ- ବୁଢ଼ାଖୋଲ ଜଙ୍ଗଲରେ ମାଓ କ୍ୟାମ୍ପ ଠାବ, ବିସ୍ଫୋରକ ଓ ଅସ୍ତ୍ରଶସ୍ତ୍ର ଜବତ
ମାଲକାନଗିରି ଜିଲ୍ଲାରେ ୨୦୦୭ରୁ ୨୦୦୮ ମସିହା ମଧ୍ୟରେ ମାଓବାଦୀଙ୍କ ଉପଦ୍ରବ ବହୁତ ବଢିବା ପରେ ୨୦୧୦ ମସିହାରେ ମାଲକାନଗିରି ଜିଲ୍ଲାରେ ବିଏସଏଫ ମୁତୟନ କରାଯାଇଥିଲା । ଏହାପରେ ମାଓବାଦୀଙ୍କ ଉପଦ୍ରବ କମିଥିଲା । କିନ୍ତୁ ୨୦୧୧ ମସିହାରେ ଚିତ୍ରକୁଣ୍ଡା ଘାଟିରେ ମାଓବାଦୀଙ୍କ ଆକ୍ରମଣରେ ବିଏସଏଫ ୧୦୭ ବାଟାଲିୟନର ଜଣେ କମାଣ୍ଡାଣ୍ଟ ଓ ଦୁଇ ଜଣ ଅଫିସରଙ୍କ ସହ ଜଣେ ଯବାନ ଶହୀଦ ହୋଇଥିଲେ । ଏହା ପରଠାରୁ ବିଏସଏଫ ଓ ଜିଲ୍ଲା ପୋଲିସର ବାରମ୍ବାର ମିଳିତ ଅପରେସନ କରି ମାଓବାଦୀମାନଙ୍କୁ ଦମନ କରାଯାଇଛି । ମୋଟାମୋଟି ଦେଖିବାକୁ ଗଲେ ଜିଲ୍ଲାରେ ବିଏସଏଫ ମୁତୟନ ପରେ ମାଓବାଦୀଙ୍କ ଉପଦ୍ରବ ବହୁ ମାତ୍ରାରେ କମିଥିବା ଜଣାପଡିଛି ।
ଇଟିଭି ଭାରତ, ମାଲକାନଗିରି
