ପୁରୀ: ଶ୍ରୀମନ୍ଦିରରୁ ବାହାରୁଥିବା ବର୍ଜ୍ୟବସ୍ତୁରୁ ପ୍ରସ୍ତୁତ ହେବ ଜୈବିକ ଖତ ଓ ବାୟୋଗ୍ୟାସ । ପୁରୀର ମାଳତିପାଟପୁର ଠାରେ ଏଥିପାଇଁ ପ୍ରତିଷ୍ଠା କରାଯାଇଛି ବାୟୋଫିକ୍ସ ପ୍ଲାଣ୍ଟ । ସେପଟେ ମହାପ୍ରସାଦରୁ ଜୈବିକ ଖତ ତିଆରିକୁ ସେବାୟତ ନାପସନ୍ଦ କରିଛନ୍ତି । ତେବେ କେମିତି ହେବ ପ୍ରକ୍ରିୟା କରଣ ? ଏବଂ ଏହାଦ୍ବାରା କ'ଣ ସବୁ ଫାଏଦା ମିଳିବ, ଆସନ୍ତୁ ଜାଣିବା ।
କେଉଁ ବର୍ଜ୍ୟବସ୍ତୁରୁ ପ୍ରସ୍ତୁତ ହେବ ବାୟୋଗ୍ୟାସ:
ଶ୍ରୀମନ୍ଦିରରୁ ବାହାରୁଥିବା କଠିନ ବର୍ଜ୍ୟବସ୍ତୁର ବିନିଯୋଗ ନେଇ ରାଜ୍ୟ ସରକାରଙ୍କ ପକ୍ଷରୁ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇଛି । ପ୍ରସ୍ତୁତ ହେବ ଜୈବିକ ଖତ ଓ ବାୟୋଗ୍ୟାସ । ଏନେଇ ପୁରୀର ମାଳତିପାଟପୁର ଠାରେ ପ୍ରତିଷ୍ଠା କରାଯାଇଛି ବାୟୋଫିକ୍ସ ପ୍ଲାଣ୍ଟ । ଏହି ପ୍ଲାଣ୍ଟରେ ଶ୍ରୀମନ୍ଦିରରୁ ଦୈନିକ ଠାକୁରଙ୍କ ବ୍ୟବହାର ପରେ ବାହାରୁଥିବା ପୂଜା ଫୁଲ, ତୁଳସୀ ନଷ୍ଟ ହୋଇଯାଇଥିବା ମହାପ୍ରସାଦ, ନଡିଆ କତା, କଦଳୀପତ୍ର ସମେତ ରୋଷଘରୁ ବାହାରୁଥିବା ପରିବା ଚୋପା ପ୍ରଭୃତି ବ୍ୟବହାର କରାଯାଇ ଜୈବିକ ଖତ ଓ ବାୟୋଗ୍ୟାସ ପ୍ରସ୍ତୁତ କରାଯିବ । ପିଜିସିଆଇଏଲ ଇଣ୍ଡିଆ ସହାୟତାରେ ଏହି ପ୍ଲାଣ୍ଟ ମାଳତିପାଟପୁରରେ ପ୍ରତିଷ୍ଠା କରାଯାଇଛି । ଏହି ପ୍ଲାଣ୍ଟର କ୍ଷମତା ଦୈନିକ ୩ ଟନ ବର୍ଜ୍ୟବସ୍ତୁ ପରିଚାଳନା ରହିଛି ।
ଏସବୁ ବର୍ଜ୍ୟବସ୍ତୁରୁ ପ୍ରସ୍ତୁତ ହେବ ବାୟୋଗ୍ୟାସ:
- ଶ୍ରୀମନ୍ଦିରରୁ ବାହାରୁଥିବା ପୂଜା ଫୁଲ
- ମହାପ୍ରସାଦ
- ନଡିଆ କତା
- କଦଳୀପତ୍ର
- ରୋଷଘରୁ ବାହାରୁଥିବା ପରିବା ଚୋପା
ଚାଷ କାମରେ ବ୍ୟବହାର ହେବ ଜୈବିକ ଖତ:
ଏଠାରୁ ପ୍ରସ୍ତୁତ ଜୈବିକ ଖତ ଚାଷୀଙ୍କ କାମରେ ଆସିବ । ଶ୍ରୀମନ୍ଦିରରୁ ବାହାରୁଥିବା ବର୍ଜ୍ୟବସ୍ତୁ ବାୟୋମାଇନ ଜରିଆରେ ପ୍ରାକୃତିକ ଗ୍ୟାସ୍ ଓ ଜୈବିକ ଖତ ହେବ । ଜୈବିକ ଖତ ଶ୍ରୀମନ୍ଦିରରେ ଭିତରେ ଥିବା ଉପବନ ନିମନ୍ତେ ବ୍ୟବହାର ହେବ । ଶ୍ରୀମନ୍ଦିରରୁ ବାହାରୁଥିବା ଆବର୍ଜନା ସଠିକ ଭାବରେ ପରିଚାଳନା ହୋଇପାରୁନାହିଁ । ଶ୍ରୀମନ୍ଦିରର ଉତ୍ତର ଦ୍ୱାର ଓ ଦକ୍ଷିଣ ଦ୍ୱାର ପଟେ ଶ୍ରୀମନ୍ଦିରରୁ ବାହାରୁଥିବା ଆବର୍ଜନା ପଡି ରହୁଛି । ଫଳରେ ଦୁର୍ଗନ୍ଧରେ ଭକ୍ତମାନେ ବେଶ ଅସୁବିଧା ଭୋଗୁଛନ୍ତି । ଶ୍ରୀମନ୍ଦିରରୁ ନିର୍ଗତ ବର୍ଜ୍ୟଜଳ ଅନେକ ସମୟରେ ପରିକ୍ରମା ମାର୍ଗରେ ଭାସୁଛି । ଯାହାକୁ ନେଇ ଭକ୍ତମାନେ ଏକ ତିକ୍ତ ଅନୁଭୂତି ନେଇ ଫେରୁଛନ୍ତି । ତେବେ ନୂଆ ନିର୍ମାଣ ହୋଇଥିବା ବାୟୋଫିକ୍ସ ପ୍ଲାଣ୍ଟ ଦ୍ୱାରା ଶ୍ରୀମନ୍ଦିରରୁ ବାହାରୁଥିବା ସବୁ ପ୍ରକାର ବର୍ଜ୍ୟବସ୍ତୁ ସଠିକ ଭାବରେ ପରିଚାଳନା ହେବ ବୋଲି ସମସ୍ତେ ଆଶା ରଖିଛନ୍ତି ।
୧୫୦ ୟୁନିଟ ବିଦ୍ୟୁତ ଉତ୍ପାଦନ:
ଗୁଜୁରାଟ ସୁରତର ବାୟୋଫିକ୍ସ ପ୍ରାଇଭେଟ ଲିମିଟେଡ କମ୍ପାନୀ ପୁରୀ ମାଳତିପାଟପୁରରେ ହୋଇଥିବା କମ୍ପୋଷ୍ଟ ଓ ବାୟୋଗ୍ୟାସ ପ୍ଲାଣ୍ଟର ପରିଚାଳନା ଭାର ନେଇଛି । ଏହି କମ୍ପାନୀ ସାରା ଭାରତରେ ୧୭୦ ରୁ ଅଧିକ ପ୍ଲାଣ୍ଟ ସ୍ଥାପନ କରି ବର୍ଜ୍ୟବସ୍ତୁ ପରିଚାଳନା କରୁଛି । ପୁରୀରେ କାର୍ଯ୍ୟକ୍ଷମ ହୋଇଥିବା କମ୍ପୋଷ୍ଟ ଓ ବାୟୋଗ୍ୟାସ ପ୍ଲାଣ୍ଟ ୩ ଟନ ପର୍ଯ୍ୟନ୍ତ ବର୍ଯ୍ୟବସ୍ତୁ ପରିଚାଳନା କରିପାରିବ । ମୋଟ ୧୨ ଜଣ କର୍ମଚାରୀ ଏହି ପ୍ଲାଣ୍ଟକୁ ପରିଚାଳନା କରିବେ । ତେବେ ବର୍ଜ୍ୟବସ୍ତୁରୁ ବାୟୋଗ୍ୟାସ ଓ ବାୟୋଗ୍ୟାସରୁ ବିଦ୍ୟୁତ ଉତ୍ପାଦନ କରାଯାଇ ଉକ୍ତ ପ୍ଲାଣ୍ଟକୁ ପରିଚାଳନା କରାଯିବ । ୧୫୦ ୟୁନିଟ ବିଦ୍ୟୁତ ଉତ୍ପାଦନ ହୋଇପାରିବ । ଏହାକୁ ପ୍ଲାଣ୍ଟରେ ବ୍ୟବହାର କରାଯିବ ।
'ସ୍ୱଚ୍ଛ ଓଡି଼ଶା ଲକ୍ଷ୍ୟ'
ପ୍ରଥମେ ବର୍ଜ୍ୟବସ୍ତୁକୁ ଅଣାଯିବା ପରେ ମେସିନ ସାହାଯ୍ୟରେ ଅଲଗା କରାଯିବ । ପରେ ଏହାକୁ କ୍ରସିଂ କରାଯିବ । କ୍ରସିଂ ହୋଇଥିବା ବର୍ଯ୍ୟବସ୍ତୁକୁ ଡାଇଜେଷ୍ଟର ନିଆଯାଇ ବାୟୋଗ୍ୟାସରେ ରୂପାନ୍ତରଣ କରାଯିବ । ପ୍ଲାଣ୍ଟ ଇନ ଚାର୍ଜ ରୁଦ୍ର ପ୍ରସାଦ ମିଶ୍ର କହିଛନ୍ତି , "ଶ୍ରୀମନ୍ଦିରରୁ ଆସୁଥିବା ବର୍ଜ୍ୟବସ୍ତୁକୁ ପ୍ରକ୍ରିୟାକରଣ କରି ସେଥିରୁ ଆମେ ବାୟୋଗ୍ୟାସ ବାହାର କରିବୁ । ଏଥି ସହିତ ବିଦ୍ୟୁତ ଉତ୍ପାଦନ ସହିତ ଜୈବିକ ଖତ ବାହାର କରିବୁ । ଏହି ପ୍ରକଳ୍ପ ନିଶ୍ଚିତ ବେଶ ଫାଇଦା ଦେବ । ଆମ କମ୍ପାନୀ ଓଡ଼ିଶାରେ ୧୨ ପ୍ରକଳ୍ପ କରି ବର୍ଜ୍ୟବସ୍ତୁ ପରିଚାଳନା କରୁଛି । ତେବେ ପୁରୀରେ ଏହା ଆମର ସବୁଠୁ ବଡ ପ୍ଲାଣ୍ଟ । ତେବେ ରାଜ୍ୟ ସରକାର ଯଦି ଚାହିଁବେ ଅଗାମୀ ଦିନରେ ଆମ କମ୍ପାନୀ ଆହୁରି ବଡ ପ୍ରକଳ୍ପ କରିବ । ବାୟୋଗ୍ୟାସରୁ ବିଦ୍ୟୁତ ଉତ୍ପାଦନ କରାଯାଇ ଶ୍ରୀମନ୍ଦିରରେ ଏହା ଯୋଗାଣ ପାଇଁ ଲକ୍ଷ୍ୟ ରଖାଯାଇଛି । ତେବେ ଶ୍ରୀମନ୍ଦିର ପ୍ରଶାସନ ଯାହା ଆମକୁ ନିର୍ଦ୍ଦେଶ ଦେବେ ତାହା ଆମେ ପାଳନ କରିବୁ । ଯଦି ସରକାର ଆମକୁ ଅନୁମତି ଦେବେ CNG ମଧ୍ୟ ଆମେ ଉତ୍ପାଦନ ଆମେ କରିପାରିବୁ । ଓଡି଼ଶାକୁ ସ୍ୱଚ୍ଛ ରଖିବା ଆମର ମୁଖ୍ୟ ଲକ୍ଷ୍ୟ ରହିଛି ।"
୧୫ ସିଲିଣ୍ଡର ଗ୍ୟାସ ଉତ୍ପାଦନ:
ପ୍ଲାଣ୍ଟ ଇଞ୍ଜିନିୟର ରାୱଲ ହର୍ଷ କହିଛନ୍ତି, "ଆମର ବାୟୋଫିକ୍ସ କମ୍ପାନୀ ୩ ଟନ କ୍ଷମତା ବିଶିଷ୍ଟ ପ୍ଲାଣ୍ଟ ପୁରୀରେ ସ୍ଥାପନ କରାଯାଇଛି । ଶ୍ରୀମନ୍ଦିରରୁ ଦୈନିକ ୩ ହଜାର କେଜି ପର୍ଯ୍ୟନ୍ତ ବର୍ଜ୍ୟବସ୍ତୁ ପ୍ରକ୍ରିୟାକରଣ କରି ବାୟୋ ଗ୍ୟାସ, ଖତ, ବିଦ୍ୟୁତ ଉତ୍ପାଦନ କରାଯାଇପାରିବ । ଆମେ ବାୟୋଗ୍ୟାସରୁ ୧୫୦ ୟୁନିଟ ବିଦ୍ୟୁତ ଦୈନିକ ଉତ୍ପାଦନ କରିପାରିବୁ । ଶ୍ରୀଜଗନ୍ନାଥ ମନ୍ଦିରକୁ ସମ୍ପୂର୍ଣ୍ଣ ବର୍ଜ୍ୟମୁକ୍ତ କରିବା ଆମର ଲକ୍ଷ୍ୟ ରହିଛି । ସେହିପରି ଜୈବିକ ଖତକୁ ଶ୍ରୀମନ୍ଦିର ପ୍ରଶାସନ ଚାଷୀଙ୍କୁ ବିକ୍ରି କରିବା ନେଇ ଲକ୍ଷ୍ୟ ରହିଛି । ଜୈବିକ ଖତକୁ ଶ୍ରୀମନ୍ଦିର ଉପବନ ସମେତ ବିଭିନ୍ନ ଗଛରେ ବ୍ୟବହାର କରାଯାଇପାରିବ । ଦୈନିକ ୧୫ ସିଲିଣ୍ଡର ଗ୍ୟାସ ଉତ୍ପାଦନ ମଧ୍ୟ ବ୍ୟବସ୍ଥା ରହିଛି । ତେବେ ଓଡିଶାରେ ଏକାଧିକ ବର୍ଜ୍ୟବସ୍ତୁ ପରିଚାଳନା ପ୍ଲାଣ୍ଟ ସ୍ଥାପନ କରାଯାଇଛି । ଓଡି଼ଶାର ପୁରୀ ସମେତ ଅନ୍ୟ ସହରକୁ ସ୍ୱଚ୍ଛ ରଖିବା ଆମ କମ୍ପାନୀର ମୂଳ ଲକ୍ଷ୍ୟ ।"
ମହାପ୍ରସାଦରୁ ଖତ ପ୍ରସ୍ତୁତକୁ ସେବାୟତଙ୍କ ନାପସନ୍ଦ:
ଶ୍ରୀମନ୍ଦିରର ବରିଷ୍ଠ ସେବାୟତ ଗୌରହରି ପ୍ରଧାନ କହଛନ୍ତି, "ଶ୍ରୀମନ୍ଦିରରୁ ବହୁତ ବର୍ଜ୍ୟବସ୍ତୁ ବାହାରୁଛି । ସେସବୁରୁ ଜୈବିକ ଖତ, ବାୟୋଗ୍ୟାସ ଉତ୍ପାଦନ ପାଇଁ ବ୍ୟବସ୍ଥା କରିଛନ୍ତି । ଯାହାକି ସ୍ୱାଗତଯୋଗ୍ୟ ପଦକ୍ଷେପ । ପୁରୀକୁ ପ୍ରତିଦିନ ହଜାର ହଜାର ଭକ୍ତ ଆସୁଛନ୍ତି । ଏଣୁ ପ୍ରତିଦିନ ବହୁତ ବର୍ଜ୍ୟବସ୍ତୁ ବାହାରୁଛି । ଏହାର ପ୍ରକ୍ରିୟା କରଣ ପାଇଁ ସରକାର ପଦକ୍ଷେପ ନେବା ଭଲ କଥା । ହେଲେ ମହାପ୍ରସାଦକୁ ପ୍ରକ୍ରିୟା କରଣ କରାଯାଇ ଖତ ପ୍ରସ୍ତୁତ କରାଯିବା ଯୋଜନା ଠିକ ନୁହେଁ । ମହାପ୍ରସାଦ ଏକ ପବିତ୍ର ଜିନିଷ । ଏହାକୁ କମ୍ପୋଷ୍ଟ କରି ସାର ପ୍ରସ୍ତୁତ କରିବା ଗ୍ରହଣୀୟ ନୁହେଁ । ଏହାକୁ ଅନ୍ୟ କୌଣସି ଉପାୟରେ ସମ୍ମାନର ସହ ନଷ୍ଟ କରାଯାଉ । ମହାପ୍ରସାଦରୁ ଖତ ପ୍ରସ୍ତୁତ କରାଯିବା ସେବାୟତ କେବେବି ଗ୍ରହଣ କରିବେ ନାହିଁ।"
| ଏହା ବି ପଢନ୍ତୁ...ମହାପ୍ରଭୁଙ୍କୁ ଲାଗି ହେଲା 'ଜୈବିକ ଚାଉଳ'ରେ ମହାପ୍ରସାଦ ଏହା ବି ପଢନ୍ତୁ...ଓଡ଼ିଶାରେ ହେବ ‘ବାୟୋ ଏଆଇ ହବ୍’: ସୁଦୃଢ ହେବ ସ୍ବାସ୍ଥ୍ୟ, କୃଷି ଓ ବାୟୋଟେକ୍ନଲୋଜି କ୍ଷେତ୍ର - ILS BIO AI HUB |
ଭକ୍ତ ଓ ସେବାୟତଙ୍କ ଭାବାବେଗକୁ ଧ୍ୟାନ ଦିଆଯିବ: ଜିଲ୍ଲାପାଳ
ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁ କହିଛନ୍ତି , "ଶ୍ରୀମନ୍ଦିରରୁ ବାହାରୁଥିବା ବର୍ଜ୍ୟବସ୍ତୁକୁ ଉପଯୋଗ କରାଯାଇ ବାୟୋଗ୍ୟାସ , ଜୈବିକ ଖତ ଉତ୍ପାଦନ କରାଯିବ । ଏନେଇ ପୁରୀରେ ଏକ ସ୍ୱତନ୍ତ୍ର ପ୍ଲାଣ୍ଟ ପ୍ରତିଷ୍ଠା କରାଯାଇଛି । ଖୁବଶୀଘ୍ର ଏହା କାର୍ଯ୍ୟକାରୀ ହେବ । ତେବେ ମହାପ୍ରସାଦ କେବେବି ନଷ୍ଟ ହୁଏ ନାହିଁ । ଏଥିରୁ ନିର୍ମାଲ୍ୟ ତିଆରି ହୁଏ । ଏଣୁ ଏହା ଭକ୍ତ ଓ ସେବାୟତଙ୍କ ଭାବାବେଗ କଥା । ଏହାକୁ ନିଶ୍ଚିତ ରୂପରେ ଧ୍ୟାନ ଦିଆଯିବ । ତେବେ ପୁରୀ ଓ କୋଣାର୍କରେ ମଧ୍ୟ ବାହାରୁଥିବା ବର୍ଜ୍ୟବସ୍ତୁକୁ ପ୍ରକ୍ରିୟା କରଣ କରାଯାଇ ବାୟୋଗ୍ୟାସ ଓ ଜୈବିକ ଖତ ତିଆରି କରାଯିବ । ଏଥିପାଇଁ ଏକ କମ୍ପୋଷ୍ଟ ଓ ବାୟୋଗ୍ୟାସ ପ୍ଲାଣ୍ଟ ସ୍ଥାପନ ପାଇଁ ଜମି ଚିହ୍ନଟ ହୋଇଛି । ଏହାକୁ ମଧ୍ୟ ଖୁବଶୀଘ୍ର କାର୍ଯ୍ୟକାରୀ କରାଯିବ।"
ପୁରୀରୁ ଶକ୍ତି ପ୍ରସାଦ ମିଶ୍ରଙ୍କ ରିପୋର୍ଟ
