ଭୁବନେଶ୍ୱର: ନୂଆବର୍ଷରେ ଫୁଲ ସାଜିଛି ଶୁଭେଚ୍ଛାର ପ୍ରତୀକ । ରାଜଧାନୀରେ ଫୁଲ ଦୋକାନରେ ପ୍ରବଳ ଭିଡ । ମନ ମୋହୁଛି ରଙ୍ଗବେରଙ୍ଗର ତୋଡ଼ା, ଭଲ ବ୍ୟବସାୟ ପାଇଁ ଆଶା ବାନ୍ଧିଛି ବ୍ୟବସାୟୀ ।
ଫୁଲତୋଡା ସହ ନବବର୍ଷର ଶୁଭେଚ୍ଛା
ନୂଆ ସୂର୍ଯ୍ୟୋଦୟ ସହ ଆସିଛି ଏକ ନୂତନ ବର୍ଷ । ବିଦାୟ ନେଇଛି ୨୦୨୪ । ବିଳମ୍ବିତ ରାତିରୁ ବେଶ ଧୁମଧାମରେ ଇଂରାଜୀ ନବବର୍ଷକୁ ସ୍ୱାଗତ କରିଛନ୍ତି ରାଜ୍ୟବାସୀ । ଛୁଟିଛି ଶୁଭେଚ୍ଛାର ସୁଅ । କିଏ ସୋସିଆଲ ମିଡିଆରେ ନୂତନ ବର୍ଷର ଅଭିନନ୍ଦନ ଜଣାଉଛି ତ କିଏ ଗ୍ରିଟିଙ୍ଗ କାର୍ଡ ଓ ଫୁଲତୋଡା ଧରି ପ୍ରତ୍ୟେକ୍ଷ ଭାବେ ପହଞ୍ଚି ନିଜ ପ୍ରିୟଜନଙ୍କୁ ଶୁଭେଚ୍ଛା ଜଣାଉଛି । ଯେଉଁଥିପାଇଁ ସକାଳୁ ସକାଳୁ ରାଜଧାନୀର ଫୁଲ ଦୋକାନ ଗୁଡିକରେ ଦେଖିବାକୁ ମିଳିଛି ପ୍ରବଳ ଭିଡ ।
ଗୋଲାପ ଠାରୁ ଆରମ୍ଭ କରି ଡାଲିଆ ଓ ଅର୍ଚିଡ୍ ଭଳି ଦେଶୀ ବିଦେଶୀ ଫୁଲକୁ ସଜେଇ ଫୁଲ ଦୋକାନୀ ତୋଡାଟିଆ ବାନ୍ଧି ଦେଉଥିବା ବେଳେ ସେହି ତୋଡ଼ାକୁ ନେଇ ବେଶ ଶ୍ରଦ୍ଧାର ସହ ଶୁଭେଚ୍ଛା ଓ ଶୁଭକାନା ଜଣାଉଛନ୍ତି ରାଜ୍ୟବାସୀ । ଶୁଭେଚ୍ଛାର ଏହି ପର୍ବକୁ ଫୁଲ ତୋଡ଼ା ଓ ଫୁଲର ଉପହାର ସହ ମନେଇବାକୁ ନେଇ ରାଜ୍ୟର ବିଭିନ୍ନ ଫୁଲ ଦୋକାନରେ ଭିଡ ଲାଗିଛି । ଧଳା ନାଲି ନୀଳ ଫୁଲ ଗୁଚ୍ଛକୁ ସଜେଇ ଦୋକାନୀ ଗ୍ରାହକଙ୍କୁ ତୋଡାଟିଆ ଧରାଇଦେଉଥିବା ବେଳେ ଗ୍ରାହକ ନିଜ ମନ ପସନ୍ଦର ଫୁଲ କିଣି ନେଉଛି ।
ଭଲ ରୋଜଗାର ଆଶାରେ ବ୍ୟବସାୟୀ
ସେପଟେ ନୂଆବର୍ଷରେ ଭଲ ବ୍ୟବସାୟ ହେବାର ଆଶା ବାନ୍ଧି ବସିଛି ଫୁଲ ଦୋକାନୀ । ୨୦ ଟଙ୍କାରୁ ଆରମ୍ଭ କରି ୩ ହଜାର ପର୍ଯ୍ୟନ୍ତ ଫୁଲ ତୋଡାର ଦାମ ରହିଥିବା ବେଳେ ଲୋକଙ୍କ ମନ ପସନ୍ଦର ଫୁଲ ଧରାଇ ଭଲ ବ୍ୟବସାୟ କରିଛି ବ୍ୟବସାୟୀ । ଓଡିଶା, କୋଲକାତା ଓ ବାଙ୍ଗାଲୁରୁରୁ ଏହି ଫୁଲ ଆସୁଥିବା ବେଳେ ଗ୍ରାହକମାନେ ମଧ୍ୟ ଏହି ଫୁଲକୁ ବେଶ ପସନ୍ଦ କରୁଥିବା କହିଛନ୍ତି ବ୍ୟବସାୟୀ ।
ଏହାମଧ୍ୟ ପଢନ୍ତୁ... ଜଗା ଦର୍ଶନ ସହ ନୂଆବର୍ଷ ଆରମ୍ଭ, ଜନସମୁଦ୍ର ଶ୍ରୀକ୍ଷେତ୍ର ବିଦାୟ ନେଲା 2024, ଜିରୋ-ନାଇଟ ସେଲିବ୍ରେସନରେ ଝୁମିଲା ରାଜଧାନୀ 2025କୁ ସ୍ୱାଗତ କଲେ ଓଲିଉଡ଼ ସେଲିବ୍ରିଟି, 2024କୁ ଏମିତି ଦେଲେ ବିଦାୟ |
ରାଜଧାନୀର ଜଣେ ଫୁଲ ଦୋକାନୀ କହିଛନ୍ତି, "ଲୋକାଲ ଫୁଲ ଅପେକ୍ଷା ବାହାର ଫୁଲର ଅଧିକ ଦାମ ରହିଛି । ଚଳିତ ବର୍ଷ ବୁଧବାର ନୂଆବର୍ଷ ପଡୁଥିବାରୁ ଆଶା ଅଛି ଭଲ ବ୍ୟବସାୟ ହେବ । ଗତ ବର୍ଷ ନୂଆବର୍ଷ ରବିବାର ଛୁଟିଦିନରେ ପଡିଥିବାରୁ ସେତେଟା ଭଲ ବ୍ୟବସାୟ ହୋଇନଥିଲା ।"
ଇଟିଭି ଭାରତ, ଭୁବନେଶ୍ୱର
