ବ୍ରହ୍ମପୁର: ବ୍ରହ୍ମପୁର ମହାନଗର ନିଗମ (BeMC)ର କର୍ପୋରେଟର ଗୋଷ୍ଠୀଙ୍କ କନ୍ଦଳ ଦିନକୁ ଦିନ ଉଗ୍ର ହେବାରେ ଲାଗିଛି । ମହାନଗର ନିଗମର ସାଧାରଣ ପରିଷଦ ବୈଠକରେ ୨୬ ନମ୍ବର ଓ୍ବାର୍ଡ଼ର କର୍ପୋରେଟର, କମିଶନରଙ୍କୁ ଅଶାଳୀନ ବ୍ୟବହାର କରିଥିବା ଅଭିଯୋଗ । କର୍ପୋରେଟରଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ କମିଶନର, ମେୟରଙ୍କୁ ଚିଠି ଲେଖିଛନ୍ତି । ସେପଟେ ମେୟରଙ୍କ ସହ ତାଙ୍କ ସମର୍ଥକ କର୍ପୋରେଟର ଓ ଏକାଧିକ ବିଜେପି କର୍ପୋରେଟର ପ୍ରଥମେ ଗଞ୍ଜାମ ଜିଲ୍ଲାପାଳ ଏବଂ ପରେ ବ୍ରହ୍ମପୁର ଆରକ୍ଷୀ ଅଧିକ୍ଷକଙ୍କୁ ସାକ୍ଷାତ କରି ମହାନଗର ନିଗମର ବୈଠକରେ ହୋଇଥିବା ଘଟଣା ସମ୍ପର୍କରେ ଅବଗତ କରାଇଛନ୍ତି ।
ଏହାସହ ଗତ ୨ ମାସ ଧରି କିଛି କର୍ପୋରେଟର ନିଗମରେ ଗୁଣ୍ଡାଗର୍ଦ୍ଦି କରୁଥିବା ଅଭିଯୋଗ କରିଛନ୍ତି । ଅନ୍ୟପଟେ ମହାନଗର ନିଗମର କମିଶନରଙ୍କୁ ଅଶାଳୀନ ବ୍ୟବହାର ନୁହେଁ ବରଂ ବିଭିନ୍ନ ପ୍ରଶ୍ନ ପଚାରିବାରୁ ଉତ୍ତର ଦେଇ ନଥିଲେ । କମିଶନର ବୈଠକ ଛାଡ଼ି ଚାଲିଯାଇଥିଲେ । ମୋ ବିରୁଦ୍ଧରେ ହେଉଥିବା ଅଭିଯୋଗ ମିଥ୍ୟା ଏବଂ ଦୁଃଖଦାୟକ ବୋଲି କହିଛନ୍ତି ୨୬ ନମ୍ବର ଓ୍ବାର୍ଡ଼ର କର୍ପୋରେଟର ।
ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକଙ୍କୁ ସାକ୍ଷାତ କଲେ ମେୟର ଓ କର୍ପୋରେଟର:
ବ୍ରହ୍ମପୁର ମହାନଗର ନିଗମର ସାଧାରଣ ବୈଠକରେ ବିଜେଡିର ଗୋଟିଏ ଗୋଷ୍ଠୀର ନିର୍ଦ୍ଦିଷ୍ଟ କେତେକ କର୍ପୋରେଟର ହଟ୍ଟଗୋଳ କରିଥିବା ଅଭିଯୋଗ ହୋଇଥିଲା । ବୈଠକରେ ନିଗମର କମିଶନରଙ୍କୁ ଇଙ୍ଗିତ କରି ଦୁବ୍ୟବହାର ପ୍ରଦର୍ଶନ କରି ଗୋ-ବ୍ୟାକ୍ ନାରା ଦେଇଥିଲେ । ଏନେଇ ଘଟଣା ସଂପର୍କରେ ଗଞ୍ଜାମ ଜିଲ୍ଲାପାଳ ଏବଂ ବ୍ରହ୍ମପୁର ଆରକ୍ଷୀ ଅଧିକ୍ଷକଙ୍କ ଅବଗତ କରାଇଛନ୍ତି ନିଗମର ମେୟର, ଡେପୁଟି ମେୟରଙ୍କ ସମେତ ବହୁ କର୍ପୋରେଟର । ବ୍ରହ୍ମପୁର ମେୟରଙ୍କ ସହିତ ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକଙ୍କୁ ସାକ୍ଷାତ ସମୟରେ ବିଜେଡି ସହିତ ବିଜେପି ଦଳର କର୍ପୋରେଟର ମଧ୍ୟ ଯାଇଥିବା ଦେଖିବାକୁ ମିଳିଛି । ଏହି ଅବସରରେ ମେୟର ସଂଙ୍ଘମିତ୍ରା ଦଳେଇ ଜିଲ୍ଲାପାଳଙ୍କୁ ଘଟଣା ନେଇ ଅବଗତ କରାଇଛନ୍ତି । ସମସ୍ତ ଅଭିଯୋଗକୁ ଗ୍ରହଣ କରି ଆଇନ ଅନୁଯାୟୀ ପଦକ୍ଷେପ ନିଆଯିବ ବୋଲି କହିଛନ୍ତି ଜିଲ୍ଲାପାଳ । ନିଗମର ବୈଠକରେ ପ୍ରଶ୍ନ ପଚାରିବା କିମ୍ୱା ଆଲୋଚନା କରିବାରେ କାହାରିକୁ ବାରଣ କରାଯାଉନଥିବା ବେଳେ ତାହାକୁ ଶାଳୀନତା ଢଙ୍ଗରେ କରାଯିବାର ଆବଶ୍ୟକତା ରହିଥିବା କହିଛନ୍ତି ।
ମେୟରଙ୍କ ପ୍ରତିକ୍ରିୟା:
ଏନେଇ ବ୍ରହ୍ମପୁର ମହାନଗର ନିଗମ ମେୟର ସଂଘମିତ୍ରା ଦଳେଇ କହିଛନ୍ତି, "ମହାନଗର ନିଗମର ସାଧାରଣ ପରିଷଦ ବୈଠକରେ ହୋଇଥିବା ଘଟଣା ବିଷୟରେ ଆମେ ଜିଲ୍ଲାପାଳଙ୍କୁ ଅବଗତ କରିଛୁ । ଜିଲ୍ଲାପାଳ ଅଭିଯୋଗକୁ ଗ୍ରହଣ କରିଛନ୍ତି । ସେ କହିଛନ୍ତି ଯେ, ଯାହା ଆଇନ କାନୁନରେ ଆସିବ ଆମେ ତାକୁ ପାଳନ କରିବୁ । ରାଜ୍ୟ ସରକାର ଜଣଙ୍କୁ ନିଗମର କମିଶନର ଭାବରେ ଦାୟିତ୍ୱ ଦେଇଥିବା ବେଳେ ତାଙ୍କୁ ଭଦ୍ର ରୂପରେ ବ୍ୟବହାର କରାଯିବାର ଆବଶ୍ୟକତା ରହିଛି ।"
କାର୍ଯ୍ୟାନୁଷ୍ଠାନ ପାଇଁ ଚିଠି:
ହଟ୍ଟଗୋଳ ଘଟଣାରେ ୨୬ ନମ୍ବର ୱାର୍ଡର କର୍ପୋରେଟରଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବା ପାଇଁ ମେୟର ସଙ୍ଘମିତ୍ରା ଦଳେଇଙ୍କୁ ସରକାରୀ ଚିଠି ଲେଖିଛନ୍ତି ବିଇଏମସି କମିଶନର । ବୈଠକ ଚାଲିଥିବା ବେଳେ ୨୬ ନମ୍ବର ୱାର୍ଡର କର୍ପୋରେଟର, BeMC କମିଶନର ଓ ଅନ୍ୟ ଅଧିକାରୀଙ୍କୁ ଖରାପ ବ୍ୟବହାର ସହ ଅଶ୍ଳୀଳ ଭାଷା ପ୍ରୟୋଗ କରିଥିବା ଦ୍ୱାରା ମର୍ଯ୍ୟାଦାହାନୀ ହୋଇଛି । ଆଇନ ଅନୁଯାୟୀ, କର୍ପୋରେଟରଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ଚିଠିରେ ମେୟରଙ୍କୁ ଉଲ୍ଲେଖ କରିଛନ୍ତି ବିଇଏମସି କମିଶନର । ମେୟରଙ୍କ ସମେତ ଜିଲ୍ଲା ପ୍ରଶାସନ ଓ ଉପରିସ୍ଥ ଅଧିକାରୀଙ୍କୁ ମଧ୍ୟ ତାଙ୍କ ପ୍ରତି ହୋଇଥିବା କର୍ପୋରେଟରଙ୍କ ଅଶାଳୀନ ବ୍ୟବହାର ସମ୍ପର୍କରେ ଚିଠି ଲେଖିଛନ୍ତି କମିଶନର ।
ଅଭିଯୋଗ ମିଥ୍ୟା କହିଲେ କର୍ପୋରେଟର:
ସେପଟେ ବ୍ରହ୍ମପୁର ମହାନଗର ନିଗମର କମିଶନରଙ୍କ ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି ୨୬ ନମ୍ବର ୱାର୍ଡ଼ର କର୍ପୋରେଟର ଧିରେଶ ସାବତ । ସେ କହିଛନ୍ତି, "କମିଶନରଙ୍କୁ ପ୍ରଶ୍ନ ପଚାରିଲେ ସେ ଉତ୍କ୍ଷିପ୍ତ ହୋଇ ପ୍ରଶ୍ନର ଉତ୍ତର ନଦେଇ ଚାଲିଯାଉଛନ୍ତି । ପୁଣି ଚିଠି ଲେଖୁଛନ୍ତି ଯେ, କର୍ପୋରେଟର ତାଙ୍କୁ ଅଶାଳୀନ ବ୍ୟବହାର କରୁଛନ୍ତି । ତାଙ୍କୁ କୌଣସି ଅସଭ୍ୟ ଭାଷାରେ ଗାଳିଗୁଲୋଜ କରାଯାଇନାହିଁ । ସେଠାରେ ଅନ୍ୟ କର୍ପୋରେଟର ଓ ଗଣମାଧ୍ୟମ ପ୍ରତିନିଧି ମଧ୍ୟ ଉପସ୍ଥିତ ଥିଲେ । ଯଦି ମୁଁ ଅଶାଳୀନ ବ୍ୟବହାର କରିଥିବି ତେବେ ତାହାର ରେକର୍ଡ ଥିବ । ମୁଁ କେବଳ ପ୍ରଶ୍ନ ପଚାରିଛି । କୌଣସି ଅଶୋଭନୀୟ ବ୍ୟବହାର କରିନାହିଁ । ସେ ଆଣିଥିବା ଅଭିଯୋଗ ସମ୍ପୂର୍ଣ୍ଣ ମିଥ୍ୟା । ଆମେ ମଧ୍ୟ ଆଗକୁ ପଦକ୍ଷପ ନେବୁ ।"
ଏହା ମଧ୍ୟ ପଢ଼ନ୍ତୁ...BeMC କାର୍ଯ୍ୟାଳୟରେ ହାଇଡ୍ରାମା, BJDର ଦୁଇ କର୍ପୋରେଟର ଗୋଷ୍ଠୀ ମୁହାଁମୁହିଁ ଏହା ମଧ୍ୟ ପଢ଼ନ୍ତୁ...ଆୟଠାରୁ ବଢ଼ିଲା ବିଏମସିର ବ୍ୟୟ, ୱାର୍ଲଡ ବ୍ୟାଙ୍କରୁ ଋଣ ଆଣି ସୁଝିବ ବିଏମସି |
ଶାନ୍ତିଶୃଙ୍ଖଳା ରକ୍ଷା କଲେ ସମସ୍ତ ସମସ୍ୟାର ସମାଧାନ ହେବ:
ଏନେଇ ବ୍ରହ୍ମପୁରର ପୂର୍ବତନ ବିଧାୟକ ତଥା ଗଞ୍ଜାମ ଜିଲ୍ଲା ବିଜୁ ଜନତା ଦଳର ସଭାପତି ଡାକ୍ତର ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ କହିଛନ୍ତି, "ବ୍ରହ୍ମପୁର ମହାନଗର ନିଗମରେ ବିଜେଡି ଦଳର ୩୭ ଜଣ କର୍ପୋରେଟର ଅଛନ୍ତି । ମେୟର ଜଣେ ଉଚ୍ଚ ଶିକ୍ଷିତା ଏବଂ ଅଭିଜ୍ଞତା ସମ୍ପର୍ଣ୍ଣ । ମହାନଗର ନିଗମର ସମସ୍ତ କର୍ପୋରେଟରଙ୍କ ମଧ୍ୟରେ ଏକତା ରକ୍ଷା କରିବା ସହିତ ଶାନ୍ତିଶୃଙ୍ଖଳାର ସହିତ ଆଲୋଚନା କରି ଯେ କୌଣସି ସମସ୍ୟାର ସମାଧାନ କରାଯାଇପାରିବ । ଶୃଙ୍ଖଳା ରକ୍ଷାନକଲେ କୌଣସି ବିକାଶ ହେବନାହିଁ । ଆମ ମଧ୍ୟରେ ଏକତା ରଖିବାକୁ ପଡ଼ିବ । ପ୍ରଶ୍ନ ପଚାରିବା ସମସ୍ତଙ୍କ ଅଧିକାର ଅଛି, କିନ୍ତୁ ନିଜ ନିଜ ଯାଗାରେ ଶାନ୍ତିପୂର୍ଣ୍ଣ ଭାବରେ ପ୍ରଶ୍ନ ପଚାରିବା ।"
ଇଟିଭି ଭାରତ, ବ୍ରହ୍ମପୁର
