କୋରାପୁଟ: ନଭେମ୍ବର ମାସ ଆସିଲେ ହସି ଉଠେ କୋରାପୁଟର ପାହାଡ଼, ପର୍ବତ, ଜଙ୍ଗଲ, ନଦୀ ନାଳ ଓ ରାସ୍ତାକଡ଼ । କେଉଁଠି କୁହୁଡି ରୂପାର ଚାଦର ଘୋଡାଇ ଦେଲା ଭଳି ଲାଗେ ତ ଆଉ କେଉଁଠି କ୍ଷେତରେ ଲହଡି ଭାଙ୍ଗୁଥିବା ଅଳସୀ ଫୁଲ ସୁନାର ଓଢଣୀ ବିଛାଇ ହୋଇ ପଡିଥିବାର ଅନୁଭୂତି ଆଣିଥାଏ । ସେପଟେ ହଳଦିଆ ରଙ୍ଗର ଫୁଲରେ ଭରିଯାଇଥିବା କ୍ଷେତରେ ଚାଲି ଦେଲେ ସେ ଫୁଲର ପରସରେ ପ୍ରେମିକାର ଉଡି ଯାଉଥିବା ସୁନାର ଓଢଣୀ ଛୁଇଁଦେଇ ଯିବାର ଅନୁଭୂତି ଆସେ କବିଙ୍କ ପ୍ରାଣରେ । ଏହି ସମୟରେ ଚାଲି ଆସନ୍ତି ବହୁ ପର୍ଯ୍ୟଟକ ଓ ଚଳଚିତ୍ର ନିର୍ମାତା ।
କୋରାପୁଟରେ ଅଳସ ଭାଙ୍ଗୁଛି ଅଳସୀ:
ମାଡି ଆସୁଥିବା ଶୀତର କୋହଲା ପବନରେ ଥିରି ଥିରି ହୋଇ ଚହଲି ଉଠିଥିବା ଫୁଲର ବାଡ଼ରେ ନାଚି ଉଠେ ଯୌବନ । ଦେଓମାଳିର ପାଦଦେଶରୁ କୋରାପୁଟ ଅଞ୍ଚଳର କୋଣ ଅନୁକୋଣ ଭରିଯାଏ ହଳଦିଆ ରଙ୍ଗରେ । ଚାଷୀ ତାର ପେଟ ପାଇଁ ଲଗାଇଥିବା ଅଳସୀ କ୍ଷେତ ପର୍ଯ୍ୟଟକଙ୍କୁ ବେଶ ଆକର୍ଶିତ କରିଥାଏ । ସକାଳ ସମୟରେ କୁହୁଡ଼ିର ଖେଳ ସାଙ୍ଗକୁ ଦିନ ତମାମ ଅଳସୀ ଫୁଲର ସୌନ୍ଦର୍ଯ୍ୟ ପର୍ଯ୍ୟଟକଙ୍କୁ ବାନ୍ଧି ରଖିଥାଏ । ଥରେ ଆସିଥିବା ଲୋକଟିଏ ବାରମ୍ବାର ଆସିବାର ଇଚ୍ଛା ପ୍ରକଟ କରିଥାଏ ବୋଲି କବି ପ୍ରିତିଧାରା ସାମଲ ମତ ରଖିଛନ୍ତି । ସେପଟେ କୋରାପୁଟ ଆସିନଥିବା ପର୍ଯ୍ୟଟକଙ୍କୁ ଏହି ସମୟରେ ଆଣିବା ପାଇଁ ରାଜ୍ୟର ପର୍ଯ୍ୟଟନ ବିଭାଗ କୌଣସି ପ୍ରକାର ପଦକ୍ଷେପ ଗ୍ରହଣ କରୁନଥିବା ଅଭିଯୋଗ କରିଛନ୍ତି ।
ଏହା ମଧ୍ୟ ପଢନ୍ତୁ...ହସ୍ତତନ୍ତ ବସ୍ତ୍ରରେ ପ୍ରାକୃତିକ ରଙ୍ଗ, ସ୍ବାବଲମ୍ବୀ ସହ ରୋଜଗାର ସମ୍ଭାବନା ଏହା ମଧ୍ୟ ପଢନ୍ତୁ...ଆୟୁର୍ବେଦ ଗବେଷକଙ୍କ ଉଦ୍ୟମ, ସଂରକ୍ଷଣ କଲେଣି ୩୦୦ ଔଷଧୀୟ ବୃକ୍ଷ ବିହନ ଏହା ମଧ୍ୟ ପଢନ୍ତୁ...ରାଷ୍ଟ୍ରପତିଙ୍କ ମନମୋହିଲା କୋରାପୁଟ ‘ଢେମସା’ ନୃତ୍ୟ |
ବ୍ୟାପକ ପ୍ରଚାର ପ୍ରସାର ଆବଶ୍ୟକ:
ବର୍ଷ ତମାମ ଓଡିଶା ପର୍ଯ୍ୟଟନ ମାନଚିତ୍ରରେ ପର୍ଯ୍ୟଟକଙ୍କ ପାଇଁ ଖୋରାକ ଯୋଗାଇବାର ସାମର୍ଥ୍ୟ ରଖିଥିବା କୋରାପୁଟ ଅଞ୍ଚଳ ଅବହେଳାର ଶିକାର ହେଉଛି । ଅଳସୀ ଫୁଲ ଭଳି ସାମୟିକ ଭାବେ ହସି ଉଠି ପୁଣି ଥରେ ନୈରାଶ୍ୟର ନଦୀଗର୍ଭରେ ଲୀନ ହୋଇଯିବା ହିଁ ସାର ହୋଇଛି । ସୌନ୍ଦର୍ଯ୍ୟର ଗନ୍ତାଘର କୋରାପୁଟର ପର୍ଯ୍ୟଟନ ସ୍ଥଳୀଗୁଡ଼ିକକୁ ଜାତୀୟ ଏବଂ ଆନ୍ତର୍ଜାତୀୟ ସ୍ତରରେ ବ୍ୟାପକ ପ୍ରଚାର ପ୍ରସାର କରାଗଲେ ଏହା ବିଶ୍ବ ଦରବାରରେ ସ୍ଥାନ ପାଇପାରନ୍ତା । ଏହାସହ ଅଞ୍ଚଳର ବିକାଶ ହୋଇପାରନ୍ତା ବୋଲି କହିଛନ୍ତି ସ୍ଥାନୀୟ ଯୁବପିଢ଼ି । ସେପଟେ ଅଳସୀ ଚାଷୀଙ୍କୁ ସଠିକ ପାଉଣା ମିଳୁନଥିବାରୁ ଅସନ୍ତୋଷ ପ୍ରକାଶ କରିଛନ୍ତି ଚାଷୀ ।
ଇଟିଭି ଭାରତ, କୋରାପୁଟ
