ପୁରୀ: ପାଖେଇ ଆସୁଛି ବିଶ୍ବ ପ୍ରସିଦ୍ଧ ରଥଯାତ୍ରା । ଲକ୍ଷ ଲକ୍ଷ ଶ୍ରଦ୍ଧାଳୁଙ୍କର ଜମିବ ଭିଡ଼ । ଏଥର ରଥଯାତ୍ରାରେ ଟ୍ରାଫିକ ଓ ଭିଡ଼ ନିୟନ୍ତ୍ରଣ ପାଇଁ ବ୍ୟବହାର ହେବ ଅତ୍ୟାଧୁନିକ ଏଆଇ (ଆର୍ଟିଫିସିଆଲ ଇଣ୍ଟେଲିଜେନ୍ସ) ଟେକ୍ନୋଲୋଜିର ହାଇଟେକ୍ ଡ୍ରୋନ । ଓଡିଶାରେ ପ୍ରଥମ ଥର ପାଇଁ ଓଡିଶା ପୋଲିସ ଟ୍ରାଫିକ ନିୟନ୍ତ୍ରଣ ଓ ଜନଗହଳି ନିୟନ୍ତ୍ରଣ ପାଇଁ ଏହି ଅତ୍ୟାଧୁନିକ ଏଆଇ ଡ୍ରୋନ୍ ବ୍ୟବହାର କରିବ । ପୁରୀ ରଥଯାତ୍ରାରେ ଏହାର ପ୍ରୟୋଗ କରାଯିବ । ପୁରୀ ପୋଲିସ ରିଜର୍ଭ ଗ୍ରାଉଣ୍ଡରେ ଏହି ଅତ୍ୟାଧୁନିକ ଏଆଇ ଡ୍ରୋନକୁ ପ୍ରଦର୍ଶନ କରଯାଇଛି ।
ଡ୍ରୋନ ନିୟନ୍ତ୍ରଣ କରିବ ଭିଡ଼:- ଏହାକୁ ଯୋଗାଇ ଦେଇଥିବା ସଂସ୍ଥାର ମୁଖ୍ୟ ବୋଧିସତ୍ଵ ସଂଘପ୍ରିୟ କହିଛନ୍ତି, "ଚଳିତ ବର୍ଷ ରଥଯାତ୍ରାରେ ଅତ୍ୟାଧୁନିକ ଉପାୟରେ ଜନଗହଳି ସହିତ ଟ୍ରାଫିକ ନିୟନ୍ତ୍ରଣ କରାଯିବ । ଏହି ଏଆଇ ଡ୍ରୋନ ଯେଉଁ ସ୍ଥାନରେ ଗହଳି ହେବ, ସଙ୍ଗେ ସଙ୍ଗେ ସେହି ସ୍ଥାନକୁ ଯିବ । ଡ୍ରୋନରେ ସ୍ପିକର ଲଗାଯାଇଛି । ଏହି ସ୍ପିକର୍ ଜରିଆରେ ଲୋକଙ୍କୁ ସଚେତନ କରାଯିବ । ଭିଡ଼ ହୋଇଥିଲେ କେଉଁ ଦିଗରେ ଲୋକମାନେ ଯିବେ, ସେନେଇ ସଚେତନ କରାଯିବ । ଏହାଦ୍ବାରା ଭିଡ଼ ସ୍ଥଳକୁ ପୋଲିସ ପହଞ୍ଚିବାରେ ଯେଉଁ ଅସୁବିଧା ହେଉଛି, ତାହା କମ୍ ହୋଇ ପାରିବ । ଏହା ବର୍ଷାରେ ମଧ୍ୟ କାମ କରିପାରିବ ।"
ଏହି ଡ୍ରୋନରେ ଅତ୍ୟାଧୁନିକ କ୍ୟାମେରା ସହିତ ଏଆଇ ସଫ୍ଟୱେର ଲୋଡ ହୋଇଛି । ତେଣୁ ଜନଗହଳି ହେଲେ ଏହା ଏକାସଙ୍ଗେ କଣ୍ଟ୍ରୋଲ ରୁମକୁ ବାର୍ତ୍ତା ଦେବା ସହ ଭିଡ଼ ଜମିଥିବା ସ୍ଥାନକୁ ଯାଇ ଲୋକଙ୍କୁ ଲାଗିଥିବା ସ୍ପିକରରେ ବାର୍ତ୍ତା ଦେଇ ପାରିବ । ତେବେ ଓଡିଶାରେ ଏହା ପ୍ରଥମ ଥର ପାଇଁ ବ୍ୟବହାର ହେବାକୁ ଯାଉଛି । ଏହା ବେଶ ସଫଳ ହେବ ବୋଲି ଓଡିଶା ପୋଲିସ୍ ଆଶା ରଖିଛି । ପୁରୀ ସହରରେ 10ଟି ଡ୍ରୋନ ବ୍ୟବସ୍ଥା ହୋଇଥିବାବେଳେ ଆବଶ୍ୟକ ହେଲେ ଅଧିକ ମୁତୟନ କରାଯିବ ବୋଲି କହିଛନ୍ତି ଏହି ଏଆଇ ଡ୍ରୋନ ଷ୍ଟାର୍ଟଅପ୍ର ପ୍ରତିଷ୍ଠାତା ବୋଧିସତ୍ଵ ସଂଘପ୍ରିୟ ।
ଇଟିଭି ଭାରତ, ପୁରୀ
