କଟକ: ଦିନକୁ ଦିନ ନକଲି ସାମଗ୍ରୀ ବିକ୍ରି ବଜାରରେ ବଢିବାରେ ଲାଗିଛି । କେତେବେଳେ ନକଲି ତେଲ ତ ଆଉ କେତେବେଳେ ନକଲି ଡାଲି, ପୁଣି କେତେବେଳେ ନକଲି ଚା' । ଏଭଳି ନକଲି ସାମଗ୍ରୀ କଟକରୁ ପୂର୍ବରୁ ଠାବ କରିବା ସହ କାର୍ଯ୍ୟାନୁଷ୍ଠାନ ନେଇଛି ପୋଲିସ । ବର୍ତ୍ତମାନ ବଜାରରେ ନକଲି କ୍ଷୀର, ଦହି ଓ ଲସି ଦେଖିବାକୁ ମିଳିଛି । ନକଲି କ୍ଷୀର କମ୍ପାନୀରେ ଚଢାଉ କରାଯାଇ ଅସଲି କ୍ଷୀରରେ ବିଭିନ୍ନ ରାସାୟନିକ ଗୁଣ୍ଡ ମିଶି ପ୍ରସ୍ତୁତି କରାଯାଉଥିବା ଅପମିଶ୍ରିତ କ୍ଷୀରକୁ ଜବତ କରିଛି ପୋଲିସ ।
ନକଲି କ୍ଷୀର କମ୍ପାନୀ:
କଟକ ଜଗତପୁର ଥାନା ଆତୋଡା ଛକରେ ଥିବା ନକଲି କ୍ଷୀର କମ୍ପାନୀରେ କମିଶନରେଟ ପୋଲିସର ଚଢାଉ । ଅସଲି କ୍ଷୀରରେ କାଷ୍ଟିଂ ପାଉଡର ଏବଂ ଲୁଣ ମିଶ୍ରଣ ଭଳି ଅନେକ ରାସାୟନିକ ଗୁଣ୍ଡ ମିଶାଯାଇ କ୍ଷୀର ପ୍ରସ୍ତୁତି କରାଯାଉଥିଲା । ତାହା ପୁଣି ବେଆଇନ ଭାବରେ । ତେବେ ଖବର ପାଇ କଟକ କମିଶନରେଟ ପୋଲିସ ଅପମିଶ୍ରିତ କ୍ଷୀର କମ୍ପାନୀରେ ଚଢ଼ାଉ କରିଥିଲା । ଏହାସହ ଖାଦ୍ୟ ନିରାପତ୍ତା ବିଭାଗ ପହଞ୍ଚି ଯାଞ୍ଚ କରି କ୍ଷୀର ଜବତ କରି ପରୀକ୍ଷା ପାଇଁ କ୍ଷୀର ସାମ୍ପଲକୁ ପଠାଇଛି । ସେପଟେ କମ୍ପାନୀକୁ ସିଲ କରାଯାଇ ମାଲିକଙ୍କୁ ଅଟକ ରଖି ପଚରାଉଚରା କରୁଛି ପୋଲିସ ।
ମାନୁ ନଥିଲେ ପ୍ୟାକେଜି୍ଂ ଓ ଲେବଲିଂର ନିୟମ:
ଏନେଇ କଟକ ଅତିରିକ୍ତ ଡିସିପି ଅନିଲ ମିଶ୍ର କହିଛନ୍ତି, ଆଜି ଜଗତପୁର ଆଇଆଇସି ଏକ ବିଶେଷ ସୁତ୍ରରୁ ଖବର ପାଇଥିଲେ ଯେ, ଅତୋଡା ପାଖରେ ଥିବା ଏକ କ୍ଷୀର ପ୍ରସ୍ତୁତ କରୁଥିବା କମ୍ପାନୀରେ ନିୟମ ଅନୁସାରେ କିଛି କରାଯାଉ ନାହିଁ । ଅପମିଶ୍ରଣ କରି କ୍ଷୀର ପ୍ରସ୍ତୁତ କରାଯାଉଛି, ଯାହା ଖାଦ୍ୟ ଉପଯୋଗୀ ନୁହେଁ । ଏହା ସ୍ବାସ୍ଥ୍ୟ ପକ୍ଷେ କ୍ଷତିକାରକ । ଏନେଇ ଖବର ପାଇବା ପରେ ଜୋନ-୧ ଏସିପି ଓ ଅନାନ୍ୟ ଷ୍ଟାଫ୍, ଫୁଡ୍ ଇନ୍ସ୍ପେକ୍ଟର, ହେଲ୍ଥ ଇନ୍ସ୍ପେକ୍ଟରଙ୍କ ସହାୟତାରେ ଆଜି ଚଢ଼ାଉ କରାଯାଇଥିଲା । ଏଠାରେ ଦେଖିବାକୁ ପାଇଲୁ ଯେ, ଅସ୍ବାସ୍ଥ୍ୟକର ପରବେଶରେ କ୍ଷୀର ତିଆରି କରାଯାଉଛି । ଫୁଡ୍ ଲାଇେସେନ୍ସରେ ଥିବା ନିୟମକୁ ସେ ପାଳନ କରୁନାହାମନ୍ତି । ପ୍ୟାକେଜି୍ଂ ଓ ଲେବଲିଂର ନିୟମ ଅନୁସରଣ କରିନାହାନ୍ତି ।"
କ୍ଷୀର ସହ ନକଲି ଦହି ଓ ଲସି:
ଅତିରିକ୍ତ ଡିସିପି ଅନିଲ ମିଶ୍ର ଆହୁରି ମଧ୍ୟ କହିଛନ୍ତି, "ଗୁଣ୍ଡ ପାଉଡ଼ର ଆଣି ସେଥିରେ ସୋଡିୟମ ହାଇଡ୍ରକ୍ସାଇଡ ଓ ନର୍ମାଲ ପାଣି ମିଶାଇ ପ୍ୟାକେଜିଂ କରି ବଜାରକୁ ଛାଡୁଥିଲେ । ୬ରୁ ୮ ମାସ ମଧ୍ୟରେ ଏହି ୟୁନିଟ ଆରମ୍ଭ ହୋଇଛି । ମାଲିକ ପ୍ରଦୀପ କୁମାର ପରିଡାଙ୍କୁ ଅଟକ ରଖିଛୁ । ଏହି କମ୍ପାନୀକୁ ସିଲ କରାଯାଇଛି । ଏଠାରେ କ୍ଷୀର, ଦହି ଓ ଲସି ତିଆରି କରୁଥିଲେ । ଏହାକୁ ଚୌଦ୍ବାର, କେନ୍ଦ୍ରାପଡ଼ା ଓ ପୁରୀକୁ ବିକ୍ରି ପାଇଁ ପଠାଯାଉଥିଲା । ବର୍ତ୍ତମାନ ତଦନ୍ତ ଚାଲିଛି । ଯାହାଯାହା ଅନିୟମିତତା ଥିବ ସେ ଅନୁସାରେ କାର୍ଯ୍ୟନୁଷ୍ଠାନ ଗ୍ରହଣ କରାଯିବ ।"
ଅସ୍ବାସ୍ଥ୍ୟକର ପରିବେଶରେ କ୍ଷୀର ପ୍ରିସ୍ତୁତ:
ଖାଦ୍ୟ ନିରାପତ୍ତା ନୋଡାଲ ଅଫିସର ସତ୍ୟବ୍ରତ ମହାପାତ୍ର କହିଛନ୍ତି, "ଆଇଆଇସି ଜଗତପୁର ଠାରୁ ଆମେ ଏଭଳି ଏକ ଅପମିଶ୍ରିତ କ୍ଷୀର ପ୍ରସ୍ତୁତ କରୁଥିବା କମ୍ପାନୀ ବିସୟରେ ଖବର ପାଇଲୁ । ଖାଦ୍ୟ ନିରାପତ୍ତା ବିଭାଗ ଆସି ଦେଖିଲୁ ଯେ, ଏଠାରେ ଅନେକ ବ୍ୟତିକ୍ରମ ଅଛି । ଷ୍ଟୋରେଜ ସିଷ୍ଟମ ଭଲ ନାହିଁ । ସିଷ୍ଟମେଟିକ୍ ଲ୍ୟାବ ନାହିଁ । ସମ୍ପୂର୍ଣ୍ଣ ଭାବରେ ଅସ୍ବାସ୍ଥ୍ୟକର ପରିବେଶରେ କ୍ଷୀର ପ୍ରିସ୍ତୁତ କରାଯାଉଥିଲା । ଏହି କ୍ଷୀର ଖାଇବା ଦ୍ବାରା ଅନେକ ସଂକ୍ରମଣ ହେବାର ଆଶଙ୍କା ରହିଛି ।"
ଇଟିଭି ଭାରତ, କଟକ
