ଭୁବନେଶ୍ବର: ପୁଣି ଥରେ ଚାଷୀ ମୃତ୍ୟୁ ସଂଖ୍ୟା ରାଜ୍ୟର ମୁଣ୍ଡବିନ୍ଧା କାରଣ ସାଜିଛି । ଗତ 11 ଦିନ ମଧ୍ୟରେ 10 ଜଣ ଚାଷୀଙ୍କ ମୃତ୍ୟୁ ଅଭିଯୋଗ ହୋଇଛି । ସମ୍ବଲପୁର ବୈରାଗୀପଲୀରେ 58 ବର୍ଷୀୟ ଚାଷୀ ରତ୍ନାକର ଭୋଇ ଜୀବନ ହାରିଥିବା ଅଭିଯୋଗ ହୋଇଛି । 150 ବସ୍ତା ଫସଲ ଅମଳ ଆଶା କରିଥିବା ଚାଷୀ ରତ୍ନାକର ଅତି କଷ୍ଟରେ 50 ବସ୍ତା ଧାନ ଅମଳ କରିଥିଲେ । ଏହାକୁ ନେଇ ଚାପଗ୍ରସ୍ତ ଥିଲେ । ଏଥିପାଇଁ ସେ ଜୀବନ ହାରିଥିବା ତାଙ୍କ ପୁଅ ପରେଶ ଅଭିଯୋଗ କରିଛନ୍ତି ।
ମୃତ ଚାଷୀ ରତ୍ନାକର ଭୋଇ ୩ ବର୍ଷ ପୂର୍ବେ ଝିଅ ବାହାଘର ପାଇଁ ଋଣ ଓ ଉଧାରୀ ଆଣିଥିଲେ । ଧୀରେ ଧୀରେ ଋଣ ସୁଝୁଥିବା ବେଳେ ସମ୍ପୂର୍ଣ୍ଣ ଋଣ ସୁଝି ନଥିଲେ । ସେଥିପାଇଁ ସେ ମାନସିକ ସ୍ତରରେ ଚିନ୍ତାଗ୍ରସ୍ତ ଥିଲେ ଓ ତାଙ୍କର ମାନସିକ ସ୍ଥିତି ଭଲ ନଥିଲା । ଏବର୍ଷ ୨ ଏକର ଜମିରେ ଚାଷ କରିଥିଲେ । ଚାଷ ପାଇଁ ସେ ଋଣ କରିଥିଲେ । କିନ୍ତୁ ଧାନ ଫସଲ ଭଲ ନହେବାରୁ ତାଙ୍କ ମାନସିକ ସ୍ଥିତି ବିଗିଡି ଯାଇଥିଲା । ତେବେ ଶନିବାର ଅପରାହ୍ନ ସମୟରେ ସେ ହଠାତ ଅସୁସ୍ଥ ହୋଇପଡିଥିଲେ । ପରବର୍ତ୍ତୀ ସମୟରେ ରତ୍ନାକର ଜୀବନ ହାରିବା ପାଇଁ ଉଦ୍ୟମ କରିଥିବା ପରିବାର ଲୋକ ଜାଣିବାକୁ ପାଇଥିଲେ । ପରେ ତୁରନ୍ତ ତାଙ୍କୁ ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆ ଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି ।
ସଦର ଥାନାରେ ମୃତ ଚାଷୀଙ୍କ ପରିବାର ଏକ ମାମଲା ରୁଜୁ କରିଛନ୍ତି । ଫସଲ ନଷ୍ଟ ଓ ଋଣ ବୋଝ ଚାଷୀଙ୍କୁ ଚିନ୍ତାଗ୍ରସ୍ତ କରିଥିବା ପରିବାର ଲୋକେ ଅଭିଯୋଗ କରିଛନ୍ତି । ‘‘ଘଟଣା ବିଷୟରେ ପ୍ରଶାସନ ଅବଗତ ଅଛି । ତଦନ୍ତକାରୀ ଟିମ ଘଟଣାର ଅନୁସନ୍ଧାନ କରୁଛନ୍ତି । ତଦନ୍ତ ରିପୋର୍ଟ ଆସିଲେ ମୃତ ଚାଷୀଙ୍କ ପରିବାରକୁ ସହାୟତା ଯୋଗାଇ ଦିଆଯିବ’’ ବୋଲି ଜିଲ୍ଲାପାଳ ସିଦ୍ଧେଶ୍ବର ବଳିରାମ ବୋନ୍ଦର କହିଛନ୍ତି ।
ସରକାରଙ୍କ ପଦକ୍ଷେପ
ଚାଷୀ ମୃତ୍ୟୁକୁ ନେଇ ପ୍ରତିକ୍ରିୟା ରଖିଛନ୍ତି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ। ଚାଷୀଙ୍କ ମୃତ୍ୟୁର ପ୍ରକୃତ କାରଣ, ଫସଲ ନଷ୍ଟ ଓ ଚାଷୀଙ୍କ ଆର୍ଥିକ ସ୍ଥିତିର ତଦନ୍ତ କରୁଛନ୍ତି ଜିଲ୍ଲାପାଳ । ରାଜ୍ୟ ସରକାର ସବୁବେଳେ ବିପର୍ଯ୍ୟୟ ସମୟରେ ଚାଷୀଙ୍କ ସହ ଛିଡା ହୋଇଛନ୍ତି । ଫସଲ ନଷ୍ଟ କ୍ଷୟକ୍ଷତିକୁ ସରକାର 33 ପ୍ରତିଶତ ବୃଦ୍ଧି କରିଛନ୍ତି । ଜିଲ୍ଲାପାଳଙ୍କ ରିପୋର୍ଟ ଆସିବା ପରେ ମୃତ ଚାଷୀଙ୍କ ପରିବାରକୁ ସମସ୍ତ ସହାୟତା ଯୋଗାଇ ଦିଆଯିବ ବୋଲି ମନ୍ତ୍ରୀ କହିଛନ୍ତି । ନିକଟରେ ଅଦିନିଆ ବର୍ଷାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପ୍ରାକୃତିକ ବିପର୍ଯ୍ୟୟ ଘୋଷଣା କରିଛନ୍ତି । 6.5 ଲକ୍ଷ କ୍ଷତିଗ୍ରସ୍ତ ଚାଷୀଙ୍କ ପାଇଁ ମୁଖ୍ୟମନ୍ତ୍ରୀ 292 କୋଟି ଟଙ୍କା ଘୋଷଣା କରିଛନ୍ତି । ଡିବିଟି ଜରିଆରେ ଚାଷୀଙ୍କୁ ସିଧାସଳଖ ସହାୟତା ପହଞ୍ଚିବ । ସେପରି ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଅଧୀନରେ କ୍ଷତିଗ୍ରସ୍ତ ଚାଷୀ 15 ଦିନରେ ସହାୟତା ପାଇବେ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ଧୋଇଗଲା 292 କୋଟି ଟଙ୍କାର ଫସଲ
ଅଦିନିଆ ବର୍ଷା କାରଣରୁ ରାଜ୍ୟର 16 ଜିଲ୍ଲାର ଚାଷୀ କ୍ଷତିଗ୍ରସ୍ତ ହୋଇଛନ୍ତି । ସମ୍ବଲପୁର, ଗଞ୍ଜାମ, ପୁରୀ ସମେତ ଭଦ୍ରକ, କଟକ, ଢେଙ୍କାନାଳ, ଗଜପତି, ଯାଜପୁର, କଳାହାଣ୍ଡି, ଖୋର୍ଦ୍ଧା, କେନ୍ଦ୍ରାପଡା, ରାୟଗଡା, ଜଗତସିଂହପୁର, କନ୍ଧମାଳ, ନୟାଗଡ, ନୂଆପଡା ଓ ରାୟଗଡା ଜିଲ୍ଲାର ଚାଷୀ ବିଶେଷ ପ୍ରଭାବିତ ହୋଇଛନ୍ତି । 2.26 ଲକ୍ଷ ହେକ୍ଟର ଚାଷଜମି କ୍ଷତିଗ୍ରସ୍ତ ହୋଇଥିବାବେଳେ 292 କୋଟି ଟଙ୍କାର କ୍ଷୟକ୍ଷତି ଆକଳନ କରାଯାଇଛି । ଗଞ୍ଜାମ ଜିଲ୍ଲାର ଚାଷୀ ସର୍ବାଧିକ ପ୍ରଭାବିତ ହୋଇଥିବାବେଳେ 60 ହଜାର ହେକ୍ଟରରୁ ଊର୍ଦ୍ଧ୍ବ ଚାଷଜମି ପ୍ରଭାବିତ ହୋଇଛି । ସେହିପରି ପୁରୀରେ ପାଖାପାଖି 50 ହଜାର ହେକ୍ଟର ଚାଷଜମି ନଷ୍ଟ ହୋଇଛି । ଖୁବଶୀଘ୍ର ସହାୟତା ଯୋଗାଇ ଦେବାକୁ ସରକାର ପ୍ରତିଶ୍ରୁତି ଦେଇଛନ୍ତି । କିନ୍ତୁ ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଅଧୀନରେ ପ୍ରକୃତ ହିତାଧିକାରୀଙ୍କୁ ଚିହ୍ନଟ କରି ସହାୟତା ଯୋଗାଇବାରେ ବିଳମ୍ବ ହେଉଥିବାରୁ ଚାଷୀ ଅସନ୍ତୋଷ ପ୍ରକାଶ କରିଛନ୍ତି ।
ଏହା ମଧ୍ୟ ପଢନ୍ତୁ: |
କେଉଁ ଜିଲ୍ଲାରେ ଜୀବନ ହାରିଲେ ଚାଷୀ
ଡେରାବିଶ ବ୍ଲକର କୋଶିଡାର ଚାଷୀ ଦୈତାରୀ ଜେନା ଗତ 22 ଡିସେମ୍ବର, 2024ରେ ଆଖି ବୁଜିଥିବା ବେଳେ ସନ୍ଥପୁରା ନାହାଙ୍ଗର ଭାବଗ୍ରାହୀ ମଲ୍ଲିକ 25 ଡିସେମ୍ବର, 2024ରେ ଆଖି ବୁଜିଛନ୍ତି । ସେହିପରି ଆଳି ବ୍ଲକ କୋଳିଡିହାର କୈଳାଶ ଚନ୍ଦ୍ର ଧଳଙ୍କ 4 ଜାନୁଆରୀ,2025ରେ ମୃତ୍ୟୁ ହୋଇଛି । ଅଦିନିଆ ବର୍ଷାରେ ଫସଲ ନଷ୍ଟ ଯୋଗୁଁ ଏହି ଚାଷୀ ମାନେ ଜୀବନ ହାରିଥିବା ଅଭିଯୋଗ ହୋଇଛି । ସମସ୍ତ ଚାଷୀଙ୍କ ମୃତ୍ୟୁର ତଦନ୍ତ ଚାଲିଥିବା ଜିଲ୍ଲାପାଳ ସ୍ମୃତି ରଞ୍ଜନ ପ୍ରଧାନ କହିଛନ୍ତି ।
ଗଞ୍ଜାମ ଜିଲ୍ଲା ଛତ୍ରପୁର ବ୍ଲକ ବାରଙ୍ଗ ଗାଁର 64 ବର୍ଷୀୟ ଚାଷୀ ବନମାଳୀ ପେଣ୍ଠୋଇ ଗତ 26 ଡିସେମ୍ବର 2024ରେ ଫାଶୀ ଦେଇ ଆତ୍ମହତ୍ୟା କରିଛନ୍ତି । ବର୍ଷା କାରଣରୁ ବନମାଳୀଙ୍କ 5 ଏକର ଚାଷଜମିରେ ଫସଲ ନଷ୍ଟ ହୋଇଥିଲା । ଛତ୍ରପୁର ତହସିଲଦାର ବିଦ୍ୟା ମହାନ୍ତି କହିଛନ୍ତି ଯେ ଘଟଣାର ତଦନ୍ତ ଚାଲିଛି । ନିୟମାନୁସାରେ ରେଡକ୍ରସ ପାଣ୍ଠିରୁ ମୃତ ଚାଷୀଙ୍କ ପରିବାରକୁ ସହାୟତା ପ୍ରଦାନ କରାଯିବ ।
ସେହିପରି 3 ଜାନୁଆରୀ, 2025ରେ ନୟାଗଡ ଜିଲ୍ଲା ରଣପୁର ବ୍ଲକରୁ ଫସଲ ନଷ୍ଟ କାରଣରୁ ଦୁଇ ଚାଷୀ ଜୀବନ ହାରିଥିବା ଅଭିଯୋଗ ହୋଇଛି । ବଳଭଦ୍ରପୁର ପଞ୍ଚାୟତର 65 ବର୍ଷୀୟ ଦେବରାଜ ବାରିକଙ୍କ ହୃଦଘାତରେ ପ୍ରାଣ ଚାଲିଯାଇଥିବା ବେଳେ ବାସୁଦିୟ ଗାଁର 62 ବର୍ଷୀୟ ଭଗବାନ ପ୍ରଧାନଙ୍କ ବ୍ରେନ ଷ୍ଟ୍ରୋକ୍ରେ ଜୀବନ ଚାଲିଯାଇଛି । ଫସଲ ନଷ୍ଟ ସହ ଋଣ ବୋଝ ଯୋଗୁଁ ଉଭୟ ଚାଷୀ ଚିନ୍ତାଗ୍ରସ୍ତ ହୋଇ ଜୀବନ ହାରିଥିବା ସେମାନଙ୍କ ପରିବାର ଅଭିଯୋଗ କରିଛନ୍ତି ।
ଏହା ମଧ୍ୟ ପଢନ୍ତୁ: ଫସଲ ଉଜୁଡି ଯିବାରୁ ଚାଷୀ ଜୀବନ ହାରିଥିବା ଅଭିଯୋଗ, ପରିବାରକୁ ଭେଟିଲେ ନବୀନ ଉଜୁଡା କ୍ଷେତକୁ ଦେଖି ଧାନ ଜମିରେ ଟଳିପଡିଲେ ଚାଷୀ ଗଞ୍ଜାମ ପରେ କେନ୍ଦ୍ରାପଡ଼ାରେ ଚାଷୀ ମୃତ୍ୟୁ, ଫସଲ ହାନୀ କାରଣ କହିଲେ ପରିବାର |
କଟକ ଜିଲ୍ଲା ନିଆଳୀ ବ୍ଲକ ମହଙ୍ଗପଡାରେ 75 ବର୍ଷୀୟ ଚାଷୀ କୈଳାଶ ପ୍ରଧାନ ଗତ 31 ଡିସେମ୍ବର, 2024ରେ ନିଜ ଚାଷଜମିରେ ଉଜୁଡି ଯାଇଥିବା ଫସଲ ଦେଖି ଟଳି ପଡିଛନ୍ତି । ଦୁଇ ଏକର ଚାଷଜମିରେ ସେ ଫସଲ କରିଥିଲେ । କିନ୍ତୁ ଅଦିନିଆ ବର୍ଷା ସବୁ ଉଜାଡି ଦେଲା । ଫସଲ ଦେଖିବାକୁ ଯାଇଥିବା ବେଳେ ଜମିରେ ହିଁ ଟଳି ପଡିଥିଲେ ଚାଷୀ । ହୃଦଘାତରେ ତାଙ୍କ ପ୍ରାଣବାୟୁ ଉଡିଯାଇଥିବା ଡାକ୍ତର କହିଛନ୍ତି ।
ସେହି ସମାନ ଦିନ ଜଗତସିଂହପୁର ବାଲିକୁଦା ତହସିଲ ତାଣ୍ଡିକୁଳ ପଞ୍ଚାୟତ ସରେଣା ଗାଁର କୃତିବାସ ରଶି ଲଗାଇ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ତିନି ଏକର ଚାଷଜମିରେ କରିଥିବା ଫସଲ ନଷ୍ଟ ୟୋଗୁଁ କୃତିବାସ ଏଭଳି ପଦକ୍ଷେପ ନେଇଥିବା ଅଭିଯୋଗ ହୋଇଛି । ଜଗତସିଂହପୁର ମୁଖ୍ୟ ଚିକିତ୍ସାଳୟରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।
ସମାନ ଢଙ୍ଗରେ ଯାଜପୁର ବିଞ୍ଝାରପୁର ଚିକଣ ପଞ୍ଚାୟତର ମଣିଭଦ୍ର ମହାନ୍ତି ଗତ ଡିସେମ୍ବର 28ରେ ଆତ୍ମହତ୍ୟା କରିଛନ୍ତି । ଅଦିନିଆ ବର୍ଷା ତାଙ୍କର ତିନି ଏକର ଚାଷଜମି ଧୋଇ ନେଇଥିବା ଯୋଗୁଁ ସେ ଆତ୍ମହତ୍ୟା କରିଥିବା ପରିବାର ଅଭିଯୋଗ କରିଛନ୍ତି ।
ଇଟିଭି ଭାରତ, ଭୁବନେଶ୍ବର
