ନୂଆଦିଲ୍ଲୀ: ପ୍ୟାରିସ ଅଲିମ୍ପିକ୍ସ 2024ରେ ଭାରତର ଷ୍ଟାର ରେସଲର ଭିନେଶ ଫୋଗତ ଇତିହାସ ସୃଷ୍ଟି କରି ଫାଇନାଲରେ ପହଞ୍ଚିଥିଲେ । ଚଳିତ ଅଲିମ୍ପିକ୍ସରେ କେବଳ 3ଟି ମେଡାଲ ପାଇଥିବା ଦେଶକୁ ଆଉ ଏକ ମେଡାଲ ପକ୍କା କରିଥିଲେ ଭିନେଶ । ଯେଉଁଥିପାଇଁ ପୂରା ଦେଶ ଉତ୍ସବମୁଖର ହୋଇଉଠିଥିଲା । ହେଲେ ଦେଶର ଖୁସିରେ ଲାଗିଗଲା ଖରାପ ନଜର । ଭାଙ୍ଗିଗଲା ଭିନେଶଙ୍କ ମେଡାଲ ଜିତିବା ଆଶା । 50 କିଲୋଗ୍ରାମ ଓଜନରୁ କେବଳ 100 ଗ୍ରାମ ଅଧିକ ଓଜନ ଥିବା ଦର୍ଶାଇ ତାଙ୍କୁ ଅଲିମ୍ପିକ୍ସରୁ ଅଯୋଗ୍ୟ ଘୋଷିତ କରାଯାଇଛି । ଏହାପରେ ସାରା ଦେଶରେ ସୃଷ୍ଟି ହୋଇଛି ଆଲୋଡ଼ନ । ତାଙ୍କର ଓଜନ କମ କରିବା ପାଇଁ ସାରା ରାତି କିପରି ଚେଷ୍ଟା କରାଯାଇଥିଲା, ସେନେଇ ସୂଚନା ଦେଇଛନ୍ତି ଭାରତୀୟ ଦଳ ସହ ଯାଇଥିବା ଚିକିତ୍ସାଧିକାରୀ ତଥା ଭିନେଶଙ୍କ ଫିଜିଓ । ଅନ୍ୟପଟେ ଭିନେଶଙ୍କୁ ଭେଟି ସାନ୍ତ୍ବନା ଦେଇଛନ୍ତି ଭାରତୀୟ ଅଲିମ୍ପିକ୍ସ ସଂଘ ଅଧ୍ୟକ୍ଷା ପିଟି ଉଷା । ତେବେ ସବୁଠାରୁ ବଡ଼ କଥା ହେଉଛି କୁସ୍ତିଯୋଦ୍ଧାଙ୍କ ଓଜନ ଉପରେ ନଜର ରଖିବା ତାଙ୍କ ପ୍ରଶିକ୍ଷକ ଓ ସପୋର୍ଟ ଷ୍ଟାଫଙ୍କ ଦାୟିତ୍ବ । ଏଥିରେ ଅବହେଳା ହୋଇଥିବା ଦର୍ଶାଇ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ଭାରତୀୟ କୁସ୍ତି ସଂଘ ସଭାପତି ସଞ୍ଜୟ ସିଂହ ।
ପୂରା ରାତିର କାହାଣୀ କହିଲେ ଭାରତୀୟ ଦଳର ମୁଖ୍ୟ ଚିକିତ୍ସାଧିକାରୀ :-
ମଙ୍ଗଳବାର ରାତିରେ ସେମିଫାଇନାଲ ମ୍ୟାଚ୍ ପରେ ପ୍ରକୃତରେ କ’ଣ ହୋଇଥିଲା, ସେନେଇ ଭାରତୀୟ ଦଳର ମୁଖ୍ୟ ଚିକିତ୍ସା ଅଧିକାରୀ ଡଃ ଦିନେଶ ପୌଡିୱାଲା ସୂଚନା ଦେଇଛନ୍ତି । ତାଙ୍କ ଓଜନ ହ୍ରାସ କରିବା ପାଇଁ ରାତିସାରା ଅନେକ ଚିକିତ୍ସା ବ୍ୟବସ୍ଥା ଗ୍ରହଣ କରାଯାଇଥିବା ସେ କହିଛନ୍ତି । ସେ କହିଛନ୍ତି, "ରେସଲରମାନେ ସାଧାରଣତଃ ସେମାନଙ୍କର ପ୍ରାକୃତିକ ଓଜନ ଠାରୁ କମ୍ ଓଜନ ବର୍ଗରେ ପ୍ରତିଦ୍ବନ୍ଦ୍ବିତା କରନ୍ତି । ଏହା ସେମାନଙ୍କୁ ଏକ ଫାଇଦା ଦେଇଥାଏ ଯେ ସେମାନେ ସେମାନଙ୍କଠାରୁ କମ୍ ଓଜନର ପ୍ରତିଦ୍ବନ୍ଦ୍ବୀମାନଙ୍କ ସହିତ ପ୍ରତିଦ୍ବନ୍ଦ୍ବିତା କରୁଥାନ୍ତି । ସକାଳେ ଓଜନ ମପାଯିବା ପୂର୍ବରୁ ଓଜନ ହ୍ରାସ ପ୍ରକ୍ରିୟାରେ ଖାଦ୍ୟ ଏବଂ ଜଳ ଉପରେ ପ୍ରତିବନ୍ଧକ ଥାଏ । ଏହା ସହିତ, ଆଥଲେଟମାନଙ୍କୁ ବ୍ୟାୟମ ସମ୍ବନ୍ଧୀୟ ଶାରିରୀକ ପରିଶ୍ରମ କରିବାକୁ ପଡିଥାଏ । ଏପରି ଓଜନ ହ୍ରାସର ଲାଭ ହେଉଛି ଯେ ଆପଣ ହାଲୁକା ଓଜନ ବର୍ଗରେ ଆସନ୍ତି, କିନ୍ତୁ ଏହା ଖେଳାଳିଙ୍କୁ ଦୁର୍ବଳ କରିଦିଏ ଏବଂ ଅଂଶଗ୍ରହଣ ପାଇଁ ଅନୁକୂଳ ହୋଇନଥାଏ ।"
କ୍ରମାଗତ ଗୋଟିଏ ଦିନରେ 3 ମ୍ୟାଚ୍ କାରଣରୁ କମିଗଲା ବଳ :-
ସେ ଆହୁରି ମଧ୍ୟ କହିଛନ୍ତି ଯେ, ଓଜନ ମାପିବା ପରେ ସୀମିତ ପରିମାଣର ଜଳ ଏବଂ ଖାଦ୍ୟ ସାମଗ୍ରୀ ନିଆଯାଏ । ଯାହାଦ୍ବାରା ଖେଳାଳି ଶକ୍ତି ପାଇପାରିବେ । ଭିନେଶଙ୍କ ପୁଷ୍ଟିକର ବିଶେଷଜ୍ଞ ଅନୁଭବ କରିଛନ୍ତି ଯେ ସେ ଦିନକୁ ପ୍ରାୟ 1.5 କିଲୋଗ୍ରାମ ଖାଦ୍ୟ ଖାଉଛନ୍ତି, ଯାହା ତାଙ୍କୁ ମ୍ୟାଚ୍ ପାଇଁ ପର୍ଯ୍ୟାପ୍ତ ଶକ୍ତି ଦେଇଥାଏ । ବେଳେବେଳେ ପ୍ରତିଯୋଗିତା ପରେ ଓଜନ ବୃଦ୍ଧି ଘଟେ । କାରଣ ଭିନେଶଙ୍କର ତିନୋଟି ମ୍ୟାଚ୍ ଥିଲା, ଏବଂ ସେଥିପାଇଁ ତାଙ୍କ ଶରୀରରେ କିଛି ଅଭାବକୁ ରୋକିବା ପାଇଁ କିଛି ପରିମାଣର ଜଳ ତାଙ୍କୁ ଦେବାକୁ ପଡିଥିଲା ।
ବିଭିନ୍ନ ଚେଷ୍ଟା ସତ୍ତ୍ବେ ଓଜନ 100 ଗ୍ରାମ ଅଧିକ ରହିଗଲା :-
ଭାରତୀୟ ଦଳର ମୁଖ୍ୟ ଚିକିତ୍ସାଧିକାରୀ କହିଛନ୍ତି, "ଆମେ ଜାଣିବାକୁ ପାଇଲୁ ଯେ ପ୍ରତିଯୋଗିତା ପରେ ତାଙ୍କ ଓଜନ ସ୍ବାଭାବିକସ୍ତରରେ ପହଞ୍ଚିଛି । ତେଣୁ କୋଚ୍ ସାଧାରଣ ଭାବେ ଓଜନ ହ୍ରାସ ପ୍ରକ୍ରିୟା ଆରମ୍ଭ କରିଛନ୍ତି, ଯାହା ସେ ସର୍ବଦା ଭିନେଶଙ୍କ ଓଜନ ହ୍ରାସ ପାଇଁ କରିଆସୁଛନ୍ତି । ସେ ଏହା ପୂର୍ବରୁ ମଧ୍ୟ ଏପରି କରିଛନ୍ତି । ସେ ନିଶ୍ଚିତ ଥିଲେ ଯେ ଏହା ପୁଣି ତାଙ୍କ ଓଜନକୁ ହ୍ରାସ କରିପାରିବ ଏବଂ ସାରାରାତି ଆମେ ଓଜନ ହ୍ରାସ ପ୍ରକ୍ରିୟା ଜାରି ରଖିଲୁ । ତଥାପି, ସକାଳେ ଆମେ ଦେଖିଲୁ ଯେ ଆମର ସମସ୍ତ ଉଦ୍ୟମ ସତ୍ତ୍ୱେ ତାଙ୍କର 50 କିଲୋଗ୍ରାମ ବର୍ଗରେ ପ୍ରତିଦ୍ବନ୍ଦ୍ବିତା କରିବା ପାଇଁ ଯୋଗ୍ୟତା ଠାରୁ 100 ଗ୍ରାମ ଅଧିକ ଓଜନ ରହିଛି । ତେଣୁ ସେ ଅଯୋଗ୍ୟ ଘୋଷିତ ହୋଇଥିଲେ ।
ଓଜନ କମାଇବାକୁ ତାଙ୍କ କେଶ ମଧ୍ୟ କଟାଯାଇଥିଲା :-
ସେ ଆହୁରି କହିଛନ୍ତି, "ଆମେ ତାଙ୍କର କେଶ କାଟିବା ଏବଂ କେଶ ଛୋଟ କରିବା ସହିତ ସମସ୍ତ ସମ୍ଭାବ୍ୟ ପଦକ୍ଷେପ ଗ୍ରହଣ କରିଥିଲୁ ଏବଂ ଏସବୁ ସତ୍ତ୍ବେ ଆମେ ତାଙ୍କୁ 50 କିଲୋଗ୍ରାମ ଓଜନ ବର୍ଗରେ ସାମିଲ କରିପାରିଲୁ ନାହିଁ । ଏହି ଅଯୋଗ୍ୟତା ପରେ ଏକ ସତର୍କତାମୂଳକ ପଦକ୍ଷେପ ଭାବରେ ଭିନେଶଙ୍କୁ ଡିହାଇଡ୍ରେସନ୍ ରୋକିବା ପାଇଁ କିଛି ତରଳ ପଦାର୍ଥ ଦିଆଯାଇଥିଲା ଏବଂ ସାଧାରଣତଃ ସବୁକିଛି ସ୍ବାଭାବିକ ଅଛି ନା ନାହିଁ ଜାଣିବା ପାଇଁ ଆମେ ରକ୍ତ ପରୀକ୍ଷା କରିଥାଉ । ତେଣୁ ଏହି ପ୍ରକ୍ରିୟା ସ୍ଥାନୀୟ ଅଲିମ୍ପିକ୍ ହସ୍ପିଟାଲରେ କରାଯାଇଥିଲା ।
ଭିନେଶଙ୍କୁ ଭେଟିଲେ ପିଟି ଉଷା :-
ଭାରତୀୟ ଅଲିମ୍ପିକ୍ସ ଆସୋସିଏସନ୍ (IOA) ଅଧ୍ୟକ୍ଷା ପିଟି ଉଷା ନିଜେ ଯାଇ ଭିନେଶଙ୍କୁ ଭେଟଛନ୍ତି । ସେ କହିଛନ୍ତି, "ଭିନେଶଙ୍କ ଅଯୋଗ୍ୟତା ଅତ୍ୟନ୍ତ ଆଶ୍ଚର୍ଯ୍ୟଜନକ । ମୁଁ କିଛି ସମୟ ପୂର୍ବରୁ ଅଲିମ୍ପିକ୍ ଭିଲେଜ ପଲିକ୍ଲିନିକରେ ଭିନେଶଙ୍କୁ ଭେଟିଛି ଏବଂ ତାଙ୍କୁ ଭାରତୀୟ ଅଲିମ୍ପିକ୍ସ ଆସୋସିଏସନ୍, ଭାରତ ସରକାର ଏବଂ ସମଗ୍ର ଦେଶରୁ ସମ୍ପୂର୍ଣ୍ଣ ସମର୍ଥନ ଜଣାଇଛି । ଆମେ ତାଙ୍କୁ ସମସ୍ତ ଚିକିତ୍ସା ଏବଂ ଭାବନାତ୍ମକ ସମର୍ଥନ ଦେଉଛୁ । ଭାରତୀୟ କୁସ୍ତି ସଂଘ UWW ସହିତ ଯୋଗାଯୋଗ କରିଛି ଏବଂ ଏହି ଘଟଣା ଉପରେ ଯଥା ସମ୍ଭବ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରୁଛି । ସେ ପ୍ରତିଯୋଗିତାର ଆବଶ୍ୟକତା ପୂରଣ କରିବା ପାଇଁ ଭିନେଶଙ୍କ ଡାକ୍ତରୀ ଦଳ ଦ୍ୱାରା ରାତିସାରା ଅକ୍ଲାନ୍ତ ପରିଶ୍ରମ ବିଷୟରେ ମୁଁ ଅବଗତ ଅଛି ।
ଭିନେଶଙ୍କ କୋଚ ଓ ସପୋର୍ଟ ଷ୍ଟାଫଙ୍କ ଉପରେ କାର୍ଯ୍ୟାନୁଷ୍ଠାନ ଦାବି କଲେ କୁସ୍ତିସଂଘ ସଭାପତି :-
ଭାରତୀୟ କୁସ୍ତିସଂଙ୍ଘ ସଭାପତି ସଞ୍ଜୟ ସିଂହ କହିଛନ୍ତି, "ଏଥିରେ ଭିନେଶଙ୍କର କୌଣସି ଦୋଷ ନାହିଁ । ତାଙ୍କ ଓଜନ କିପରି ବଢ଼ିଲା, ଏହା ଜାଣିବା ପାଇଁ ତଦନ୍ତ ହେବାର ଆବଶ୍ୟକତା ରହିଛି । ମୁଁ ସକାଳେ ଏକ ଫୋନ କଲ ପାଇଲି ଏବଂ ମୋତେ କୁହାଯାଇଥିଲା ଯେ ଭିନେଶ ଫୋଗତଙ୍କ ଓଜନ 100 ଗ୍ରାମ ଅଧିକ ଅଛି । ମୁଁ ଅଧିକାରୀମାନଙ୍କୁ ଆଉ କିଛି ସମୟ ପାଇଁ ଭିନେଶଙ୍କୁ ଆରାମ ଦେବାକୁ ଅନୁରୋଧ କରିଥିଲି । କିନ୍ତୁ ଏହାକୁ ପ୍ରତ୍ୟାଖ୍ୟାନ କରାଗଲା । ସମଗ୍ର ଦେଶ ସ୍ୱର୍ଣ୍ଣ ପଦକ ଆଶା କରୁଥିଲା, କିନ୍ତୁ ଅଧିକ ଓଜନ ହେତୁ ତାଙ୍କୁ ଅଯୋଗ୍ୟ କରାଯାଇଛି । ଭଗବାନ ତାଙ୍କୁ ଶକ୍ତି ଦିଅନ୍ତୁ ଏବଂ ସମଗ୍ର ଦେଶ ତାଙ୍କ ସହିତ ଅଛି । ମୁଁ IOA (ଇଣ୍ଡିଆନ୍ ଅଲିମ୍ପିକ୍ ଆସୋସିଏସନ୍) ଏବଂ UWW (ୟୁନାଇଟେଡ୍ ୱାର୍ଲ୍ଡ ରେସଲିଂ) ସହିତ କଥା ହୋଇଛି । ମୁଁ ଭାବୁନାହିଁ ଯେ ଏଥିରେ ଭିନେଶଙ୍କର କୌଣସି ଦୋଷ ଅଛି । ସେ ଚମତ୍କାର ପ୍ରଦର୍ଶନ କରୁଥିଲେ ଏବଂ ଏଥିପାଇଁ ସମ୍ପୂର୍ଣ୍ଣ ଦାୟିତ୍ବ ତାଙ୍କ କୋଚ୍ ଏବଂ ସପୋର୍ଟ ଷ୍ଟାଫଙ୍କର ଥିଲା । ତାଙ୍କର ଓଜନ କିପରି ବଢ଼ିଲା, ଏହାର ତଦନ୍ତ କରାଯିବା ଉଚିତ୍ ।
ବ୍ୟୁରୋ ରିପୋର୍ଟ, ଇଟିଭି ଭାରତ
