ପ୍ୟାରିସ (ଫ୍ରାନ୍ସ): ପ୍ୟାରିସ ଅଲିମ୍ପିକ୍ସ 2024ରେ ଭାରତକୁ ବଡ଼ ଝଟ୍କା । କୁସ୍ତିରେ ଭିନେଶ ଫୋଗତଙ୍କ ମେଡାଲ ଜିତିବା ଆଶା ମଉଳିଲା । 50 କିଲୋଗ୍ରାମ ବର୍ଗରେ ଫାଇନାଲ୍ରେ ପହଞ୍ଚି ଭାରତ ପାଇଁ ମେଡାଲ ପକ୍କା କରିଥିଲେ ଭାରତୀୟ ରେସଲର ଭିନେଶ ଫୋଗତ । ହେଲେ 50 କିଲୋଗ୍ରାମରୁ କିଛି ଗ୍ରାମ ଅଧିକ ଓଜନ ହେବାରୁ ତାଙ୍କୁ ଅଯୋଗ୍ୟ ଘୋଷଣା କରାଯାଇଛି । ଏବେ ସେ ନା ସ୍ବର୍ଣ୍ଣ ପଦକ ଜିତିପାରିବେ ଆଉ ନା ରୌପ୍ୟ । ରାତିସାରା ବହୁତ ପରିଶ୍ରମ ଓ ଉଦ୍ୟମ ସତ୍ତ୍ବେ ଆଜି ସକାଳେ ତାଙ୍କ ଓଜନ 50 କିଲୋଗ୍ରାମରୁ କିଛି ଗ୍ରାମ ଅଧିକ ମିଳିଥିବା ଜଣାପଡିଛି । ଯେଉଁଥିପାଇଁ ସେ ଫାଇନାଲ ମ୍ୟାଚ୍ ଖେଳିବାକୁ ସକ୍ଷମ ହେବେ ନାହିଁ ।
Indian Wrestler Vinesh Phogat disqualified from the Women’s Wrestling 50kg for being overweight.
— ANI (@ANI) August 7, 2024
It is with regret that the Indian contingent shares news of the disqualification of Vinesh Phogat from the Women’s Wrestling 50kg class. Despite the best efforts by the team through… pic.twitter.com/xYrhzA1A2U
ରାତିସାରା ପରିଶ୍ରମ ସତ୍ତ୍ବେ କିଛି ଗ୍ରାମ ଓଜନ ଅଧିକ ରହିଲା :-
ANI ରିପୋର୍ଟ ଅନୁସାରେ ଭାରତୀୟ ଅଲିମ୍ପିକ୍ ଆସୋସିଏସନ କହିଛି, 'ଦୁଃଖର ବିଷୟ ଯେ ଭାରତୀୟ ଦଳ ମହିଳା 50 କିଲୋଗ୍ରାମ ରେସଲିଂ ବର୍ଗରୁ ଭିନେଶ ଫୋଗତଙ୍କ ଅଯୋଗ୍ୟତା ଖବର ଜଣାଇଛନ୍ତି । ସାରାରାତି ଦଳ ଦ୍ବାରା କରାଯାଇଥିବା ସର୍ବୋତ୍ତମ ପ୍ରୟାସ ସତ୍ତ୍ବେ ଆଜି ସକାଳେ ତାଙ୍କର ଓଜନ 50 କିଲୋଗ୍ରାମରୁ କିଛି ଗ୍ରାମ ଅଧିକ ଥିଲା । ଏହି ସମୟରେ ଦଳ ପକ୍ଷରୁ ଆଉ କୌଣସି ମନ୍ତବ୍ୟ ମିଳିପାରିନାହିଁ । ଭାରତୀୟ ଦଳ ଭିନେଶଙ୍କ ଗୋପନୀୟତାକୁ ସମ୍ମାନ କରିବାକୁ ସମସ୍ତଙ୍କୁ ଅନୁରୋଧ କରିଛନ୍ତି । ସେ ଆଗକୁ ଅନ୍ୟ ପ୍ରତିଯୋଗିତା ଉପରେ ଧ୍ୟାନ ଦେବାକୁ ଚାହିଁବେ ।'
ଫାଇନାଲରେ ପହଞ୍ଚି ରଚିଥିଲେ ଇତିହାସ :-
ପ୍ରକାଶ ଥାଉ, ଭିନେଶ ଫୋଗତ ପ୍ରଥମ ଥର ପାଇଁ ରେସଲିଂ ଫାଇନାଲରେ ପହଞ୍ଚି ଇତିହାସ ସୃଷ୍ଟି କରିଥିଲେ । ସେ ଫାଇନାଲରେ ପ୍ରବେଶ କରିଥିବା ଭାରତର ପ୍ରଥମ ମହିଳା ରେସଲର ଥିଲେ । ଏହା ସହିତ ସେ 3ଟି ଅଲିମ୍ପିକ୍ସରେ ଅଂଶଗ୍ରହଣ କରିବା ପରେ ପ୍ରଥମ ଥର ପାଇଁ ଦେଶ ପାଇଁ ପଦକ ପକ୍କା କରିଥିଲେ । ତାଙ୍କୁ ଅଯୋଗ୍ୟ ଘୋଷଣା କରାଯିବା ପରେ ପ୍ରତ୍ୟେକ ଭାରତୀୟଙ୍କୁ ଏକ ବଡ଼ ଧକ୍କା ଲାଗିଛି ।
Indian wrestler Vinesh Phogat (50kg) disqualified from Olympic finals after being found slightly overweight: source in Indian contingent
— Press Trust of India (@PTI_News) August 7, 2024
ଏବେ ଏମିତି ହେବ ଖେଳ :-
ଏହାପୂର୍ବରୁ ସୂତ୍ରରୁ ପ୍ରକାଶ ପାଇଥିଲା ଯେ ଭିନେଶଙ୍କ ଓଜନ ପ୍ରାୟ 100 ଗ୍ରାମ ଅଧିକ ରହିଛି । ଯେଉଁଥିପାଇଁ ସେ ଅଯୋଗ୍ୟ ଘୋଷିତ ହୋଇପାରନ୍ତି । ପ୍ରତିଯୋଗିତା ନିୟମ ଅନୁଯାୟୀ, ଫୋଗତ ରୌପ୍ୟ ପଦକ ପାଇଁ ମଧ୍ୟ ଯୋଗ୍ୟ ହେବେ ନାହିଁ । ଏବେ 50 କିଲୋଗ୍ରାମ କୁସ୍ତି ଇଭେଣ୍ଟରେ କେବଳ ସ୍ବର୍ଣ୍ଣ ଏବଂ ବ୍ରୋଞ୍ଜ ପଦକ ବିଜେତା ଅଂଶଗ୍ରହଣ କରିବେ । ଫୋଗତ ଏହି ଅଲିମ୍ପିକ୍ସରେ ନିଜର ପ୍ରଥମ ମ୍ୟାଚ୍ରେ ଗତ ଅଲିମ୍ପିକ୍ସରେ ସ୍ବର୍ଣ୍ଣ ପଦକ ବିଜେତା ଜାପାନର ରେସଲରଙ୍କୁ ହରାଇଥିଲେ । ତାଙ୍କର ପ୍ରତିଦ୍ବନ୍ଦ୍ବୀ ଜାପାନର ରେସଲର ଆଜି ପର୍ଯ୍ୟନ୍ତ ଗୋଟିଏ ବି ମ୍ୟାଚ୍ ହାରିନଥିଲେ । ପ୍ରଥମ ଅନ୍ତର୍ଜାତୀୟ ରେସଲର ଭାବେ ଭାରତୀୟ ରେସଲର ଭିନେଶ ଫୋଗତ ତାଙ୍କୁ ପରାସ୍ତ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
