କୋଲକାତା: କୋଲକାତାର ଆରଜି କର ମେଡିକାଲ କଲେଜ ଓ ହସ୍ପିଟାଲରେ ଘଟିଥିବା ଛାତିଥରା ଘଟଣା ସାରା ଦେଶକୁ ଦୋହଲାଇ ଦେଇଛି । ଡ୍ୟୁଟିରେ ଥିବା ଜଣେ ଟ୍ରେନି ଡାକ୍ତରଙ୍କୁ ଏଭଳି ଦୁଷ୍କର୍ମ କରି ନିର୍ମମ ଭାବେ ହତ୍ୟା କରିବାକୁ ନେଇ ଦେଶବ୍ୟାପୀ ଚାଲିଛି ଆନ୍ଦୋଳନ । ଖୋଦ ସୁପ୍ରିମକୋର୍ଟ ନିଜ ଆଡ଼ୁ ଏନେଇ ମାମଲା ରୁଜୁ କରିଛନ୍ତି । ତେବେ ନିକଟରେ ଭାରତୀୟ ଦଳର ପୂର୍ବତନ କ୍ରିକେଟର ସୋରଭ ଗାଙ୍ଗୁଲି ଏନେଇ ଦେଇଥିବା ଏକ ଅସମ୍ବେଦନଶୀଳ ବୟାନକୁ ନେଇ ତାଙ୍କୁ କଡ଼ା ସମାଲୋଚନାର ଶିକାର ହେବାକୁ ପଡ଼ିଛି । ଯଦିଓ ସେ ପରେ ଏହାର ସ୍ପଷ୍ଟୀକରଣ ରଖିସାରିଛନ୍ତି, ହେଲେ ତାଙ୍କର ଏଭଳି ବୟାନକୁ ନେଇ ତାଙ୍କୁ ଏବେ କଡ଼ା ସମାଲୋଚନା କରିଛନ୍ତି ଭାରତୀୟ ଦଳର କ୍ରିକେଟର ମହମ୍ମଦ ଶାମିଙ୍କ ପୂର୍ବତନ ପତ୍ନୀ ହସିନ ଜାହାଁ ।
କଣ କହିଥିଲେ ଗାଙ୍ଗୁଲି ?
ପ୍ରକାଶ ଥାଉକି, ଏହା ପୂର୍ବରୁ ବିସିସିଆଇର ପୂର୍ବତନ ସଭାପତି ସୌରଭ ଗାଙ୍ଗୁଲି ପଶ୍ଚିମବଙ୍ଗରେ ଥିବା ମମତା ବାନାର୍ଜୀ ସରକାରଙ୍କୁ ରକ୍ଷା କରିବାକୁ ଯାଇ ଏହି ଜଘନ୍ୟ ଦୁଷ୍କର୍ମ ଓ ହତ୍ୟା ମାମଲାରେ ମନ୍ତବ୍ୟ ଦେଇ ଏହାକୁ ଏକ 'ଦୁର୍ଘଟଣା' ବୋଲି କହିଥିଲେ । ସେ କହିଥିଲେ, "ମୁଁ ଭାବୁନାହିଁ ଯେ ଗୋଟିଏ ଘଟଣା ଆଧାରରେ ହିଁ ସବୁକିଛି ବିଚାର କରାଯିବା ଉଚିତ । ଏହି ଗୋଟିଏ ଘଟଣା ପାଇଁ ସମସ୍ତେ ସୁରକ୍ଷିତ ନୁହଁନ୍ତି ବୋଲି ଭାବିବାର କୌଣସି ଅର୍ଥ ନାହିଁ । ସମଗ୍ର ବିଶ୍ବରେ ଏଭଳି ଦୁର୍ଘଟଣା ଘଟେ । ହେଲେ ଝିଅମାନେ ସୁରକ୍ଷିତ ନୁହଁନ୍ତି ବୋଲି ଭାବିବା ଅନୁଚିତ । କେବଳ ପଶ୍ଚିମବଙ୍ଗରେ ନୁହେଁ, ସମଗ୍ର ଭାରତରେ ମହିଳାମାନେ ସୁରକ୍ଷିତ ଅଛନ୍ତି । ଯେଉଁଠାରେ ଆମେ ରହୁଛୁ, ତାହା ସର୍ବୋତ୍ତମ ସ୍ଥାନ । କୌଣସି ଗୋଟିଏ ଘଟଣାକୁ ନେଇ ସବୁକଥା ବିଚାର କରିବା ଉଚିତ୍ ନୁହେଁ ।"
ଏମିତି କହିଲେ ହସିନ ଜାହାଁ :-
କ୍ରିକେଟର ମହମ୍ମଦ ଶାମିଙ୍କ ପୂର୍ବତନ ପତ୍ନୀ ହସିନ ଜାହାଁ ଗାଙ୍ଗୁଲିଙ୍କର ଏହି ଭିଡିଓ ନିଜ ଇନଷ୍ଟାଗ୍ରାମରେ ସେୟାର କରି ତାଙ୍କୁ କଡ଼ା ଭାଷାରେ ସମାଲୋଚନା କରିଛନ୍ତି । ସେ ଲେଖିଛନ୍ତି, "ସୌରଭ ଗାଙ୍ଗୁଲିଙ୍କ ପରି ଲୋକଙ୍କ ପାଇଁ ମହିଳା ମାନେ କେବଳ ମନୋରଞ୍ଜନ କରିବାର ଏକ ବସ୍ତୁ । ସେଥିପାଇଁ ସେ କହିଛନ୍ତି ଏପରି ଦୁଷ୍କର୍ମ ଘଟଣା ସାରା ଦେଶରେ ଘଟୁଛି । କହିବାକୁ ଗଲେ ଗାଙ୍ଗୁଲିଙ୍କ ନିଜ ଝିଅ ସୁରକ୍ଷିତ ଅଛନ୍ତି, ସେଥିପାଇଁ ଅନ୍ୟ ଝିଅଙ୍କ ଅସୁରକ୍ଷିତ ନେଇ ଗାଙ୍ଗୁଲିଙ୍କୁ କିଛି ଫରକ ପଡ଼ୁନାହିଁ ।
ପରେ ପୁଣି ସ୍ପଷ୍ଟୀକରଣ ରଖିଛନ୍ତି ଗାଙ୍ଗୁଲି :-
ଏଭଳି ଅସମ୍ବେଦନଶୀଳ ବିବୃତ୍ତି ପରେ ବହୁ ସମାଲୋଚନାର ସମ୍ମୁଖୀନ ହେବା ପରେ ଗାଙ୍ଗୁଲି ପୁଣିଥରେ ନିଜ କଥାର ସ୍ପଷ୍ଟୀକରଣ ରଖିଥିଲେ । ହସିନ ଜାହାଁ ଏଭଳି ସମାଲୋଚନା କରିବାର ବହୁ ପୂର୍ବରୁ ଗାଙ୍ଗୁଲି ନିଜ ସ୍ପଷ୍ଟୀକରଣ ରଖିସାରିଥିଲେ । ସେ କହିଥିଲେ, "ମୁଁ ଜାଣେ ନାହିଁ ଯେ ଗତ ରବିବାର ମୁଁ ଯାହା କହିଥିଲି, ଏହାର ଅର୍ଥ କ’ଣ ବାହାର କରାଗଲା ବା ଏହାର ବ୍ୟାଖ୍ୟା କିପରି କରାଯାଇଥିଲା । ମୁଁ ଏହା ପୂର୍ବରୁ କହିଛି ଅପରାଧ ଏକ ଭୟଙ୍କର କାର୍ଯ୍ୟ । ବର୍ତ୍ତମାନ ସିବିଆଇ ଏବଂ ପୋଲିସ ଏହି ମାମଲାର ତଦନ୍ତ କରୁଛନ୍ତି । ଯାହା ଘଟିଛି ତାହା ଅତ୍ୟନ୍ତ ଲଜ୍ଜାଜନକ ଅଟେ ।"
ବ୍ୟୁରୋ ରିପୋର୍ଟ, ଇଟିଭି ଭାରତ
