ହାଇଦ୍ରାବାଦ : ଇଣ୍ଡିଆନ୍ ପ୍ରିମିୟର ଲିଗ୍ (IPL) 2025 ପୂର୍ବରୁ ଏକ ମେଗା ଅକ୍ସନ ହେବ । ଏହି ମେଗା ଅକ୍ସନ ପୂର୍ବରୁ ବିଭିନ୍ନ ଦଳରେ କିଛି ବଡ଼ ବଡ଼ ପରିବର୍ତ୍ତନ ଘଟିପାରେ । ଏଭଳି ପରିସ୍ଥିତିରେ ବିଭିନ୍ନ ଫ୍ରାଞ୍ଚାଇଜ ଅନ୍ୟ ଦଳର ଷ୍ଟାର ପ୍ଲେୟାରଙ୍କୁ ନିଜ ଦଳରେ ସାମିଲ କରିବାକୁ ଭରପୁର ଉଦ୍ୟମ ଚଳାଇଛନ୍ତି । ଏହାରି ଭିତରେ କେକେଆର୍ (କୋଲକାତା ନାଇଟ ରାଇଡର୍ସ) ଏକ ବଡ଼ ପଦକ୍ଷେପ ନେବାକୁ ଯାଉଛି । ମୁମ୍ବାଇର ଏକ ଷ୍ଟାର ପ୍ଲେୟରଙ୍କୁ ନିଜ ଦଳରେ ସାମିଲ କରି ଅଧିନାୟକ ଭାର ଦେବାକୁ ଯୋଜନା କରୁଛି KKR ।
🚨𝐓𝐫𝐚𝐧𝐬𝐟𝐞𝐫 𝐑𝐮𝐦𝐨𝐮𝐫𝐬 🚨👀
— KKR Vibe (@KnightsVibe) August 24, 2024
KKR management unofficially contacted SKY for KKR captaincy from next year .
( Rohit Juglan from Revzsports)pic.twitter.com/ClEVeuqcb4
ଏହି MI ପ୍ଲେୟରଙ୍କୁ ନେବ KKR ! :-
ଶାହାରୁଖ ଖାନଙ୍କ ମାଲିକାନାରେ ଥିବା କୋଲକାତା ନାଇଟ୍ ରାଇଡର୍ସ, ମୁମ୍ବାଇ ଇଣ୍ଡିଆନ୍ସର ଭେଟେରାନ ବ୍ୟାଟର ରୋହିତ ଶର୍ମାଙ୍କୁ ନିଜ ଦଳକୁ ନେଇପାରେ ବୋଲି ବେଶ ଚର୍ଚ୍ଚା ହୋଇଥିଲା । ଏପରିକି ରୋହିତ ଆଇପିଏଲ୍ 2025ରେ ଚେନ୍ନାଇ ସୁପର କିଙ୍ଗସ୍ର ନେତୃତ୍ବ ନେଇପାରନ୍ତି ବୋଲି ମଧ୍ୟ ଆଲୋଚନା ହେଉଥିଲା । ହେଲେ ଖବର ଅନୁସାରେ ରୋହିତ ନୁହେଁ, ବରଂ ସୂର୍ଯ୍ୟକୁମାର ଯାଦବଙ୍କୁ ନିଜ ଦଳରେ ସାମିଲ କରିବାକୁ ଚାହୁଁଛି କେକେଆର୍ । ଗଣମାଧ୍ୟମ ରିପୋର୍ଟ ଅନୁଯାୟୀ, କେକେଆର ସୂର୍ଯ୍ୟକୁମାର ଯାଦବଙ୍କୁ କ୍ୟାପ୍ଟେନସିପ ଅଫର ଦେଇଛି । ଜଣେ ସାମ୍ବାଦିକ ତାଙ୍କ ନିଜ ୟୁଟ୍ୟୁବ୍ ଚ୍ୟାନେଲରେ କହିଛନ୍ତି ଯେ ସୂର୍ଯ୍ୟକୁମାର ଯାଦବ ମଧ୍ୟ ଏଥିପାଇଁ ପ୍ରସ୍ତୁତ ଅଛନ୍ତି । ଏହା ବ୍ୟତୀତ, 2024ରେ KKRକୁ ଚାମ୍ପିୟନ୍ କରାଇଥିବା ଶ୍ରେୟସ୍ ଆୟରଙ୍କୁ KKR ରିଲିଜ କରିପାରେ ବୋଲି ମଧ୍ୟ ସେ କହିଛନ୍ତି ।
ପାଣ୍ଡ୍ୟାଙ୍କୁ ଅଧିନାୟକ କରିଛି MI :-
ତେବେ ଏହି ପ୍ରସଙ୍ଗରେ କେକେଆର ପକ୍ଷରୁ ଏପର୍ଯ୍ୟନ୍ତ କୌଣସି ଆଧିକାରିକ ପ୍ରତିକ୍ରିୟା ଆସିନାହିଁ । ହେଲେ ମୁମ୍ବାଇରୁ ସୂର୍ଯ୍ୟକୁମାର ଯାଦବ ଯଦି ଯାଆନ୍ତି, ତେବେ ଫ୍ରାଞ୍ଚାଇଜରେ ପୁଣିଥରେ ଅଡ଼ୁଆ ବଢ଼ିପାରେ । ପୂର୍ବରୁ ମୁମ୍ବାଇ ଇଣ୍ଡିଆନ୍ସ ହାର୍ଦ୍ଦିକ ପାଣ୍ଡ୍ୟାଙ୍କୁ ଗୁଜରାଟ ଟାଇଟାନ୍ସରୁ ଆଣି ଅଧିନାୟକ ମଧ୍ୟ କରିସାରିଛି । ଏଥିପାଇଁ ରୋହିତଙ୍କୁ ଅଧିନାୟକ ପଦରୁ ହଟାଇବାକୁ ପଡ଼ିଥିଲା । ଫଳରେ ଦଳକୁ ପ୍ରଶଂସକଙ୍କଠାରୁ ବହୁ ସମାଲୋଚନାର ସମ୍ମୁଖୀନ ହେବାକୁ ପଡ଼ିଥିଲା ।
ଚର୍ଚ୍ଚାରେ SKY :-
ପ୍ରକାଶ ଥାଉ, ଟି20 ବିଶ୍ବକପ 2024 ଫାଇନାଲରେ ଚମତ୍କାର କ୍ୟାଚ୍ ଧରି ସୂର୍ଯ୍ୟକୁମାର ଚର୍ଚ୍ଚାରେ ଅଛନ୍ତି । ସୂର୍ଯ୍ୟକୁମାର ଯାଦବଙ୍କୁ ମଧ୍ୟ ଭାରତୀୟ ଟି20 ଦଳର ଅଧିନାୟକ କରାଯାଇଛି । ଏହି କାରଣରୁ ସୂର୍ଯ୍ୟଙ୍କୁ ଯଦି ମୁମ୍ବାଇ ସମ୍ଭବତଃ ଅକ୍ସନ ପାଇଁ ରିଲିଜ କରେ, ତେବେ ତାଙ୍କୁ ନେବା ପାଇଁ ଆଇପିଏଲ୍ରେ ସବୁ ଦଳ ମଧ୍ୟରେ ବେଶ ପ୍ରତିଯୋଗିତା ହେବାକୁ ଯାଉଛି । ସମ୍ପ୍ରତି ସୂର୍ଯ୍ୟକୁମାର ଏବଂ ଶ୍ରେୟସ୍ ଆୟର ବୁଚି ବାବୁ ଟୁର୍ଣ୍ଣାମେଣ୍ଟରେ ଭାଗ ନେବାକୁ ଯାଉଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
