ନୂଆଦିଲ୍ଲୀ : ଏବେ ବିଭିନ୍ନ ସମୟରେ ବିଭିନ୍ନ କ୍ରିକେଟର ତଥା ପୂର୍ବତ କ୍ରିକେଟର ନିଜ ପସନ୍ଦର ପ୍ଲେଇଂ 11 ଚୟନ କରୁଛନ୍ତି । କିଏ ସର୍ବକାଳୀନ ଶ୍ରେଷ୍ଠ ଭାରତୀୟ ଦଳ ତ କିଏ ସର୍ବକାଳୀନ ଶ୍ରେଷ୍ଠ ଆଇପିଏଲ୍ ଦଳ ଚୟନ କରି ଚର୍ଚ୍ଚାକୁ ଆସୁଛନ୍ତି । ଏହାରି ଭିତରେ ନିଜ ପସନ୍ଦର ଅଲ ଟାଇମ ଇଣ୍ଡିଆ ପ୍ଲେଇଂ 11 ଚୟନ କରି ଖୁବ ଚର୍ଚ୍ଚାକୁ ଆସିଛନ୍ତି ଟିମ୍ ଇଣ୍ଡିଆର ମୁଖ୍ୟ କୋଚ ତଥା ପୂର୍ବତନ କ୍ରିକେଟର ଗୌତମ ଗମ୍ଭୀର । ଉଭୟ ଦିନିକିଆ ଓ ଟେଷ୍ଟରେ ନିଜ ପସନ୍ଦର ଦଳ ବାଛିଛନ୍ତି ଗମ୍ଭୀର । ଭାରତୀୟ ଦଳର ପୂର୍ବତନ ଅଧିନାୟକ ଏମ୍ଏସ୍ ଧୋନି ଓ ବିରାଟ କୋହଲିଙ୍କୁ ସେ ଉଭୟ ଟେଷ୍ଟ ଓ ଦିନିକିଆ ଦଳରେ ସ୍ଥାନ ଦେଇଥିବାବେଳେ ମଡର୍ନ କ୍ରିକେଟର ଷ୍ଟାର ଓପନର ତଥା ଭାରତୀୟ ଟେଷ୍ଟ ଓ ଦିନିକିଆ ଦଳର ବର୍ତ୍ତମାନର ଅଧିନାୟକ ରୋହିତ ଶର୍ମା ଓ ସ୍ପିଡଷ୍ଟାର ଜସପ୍ରୀତ ବୁମ୍ରାଙ୍କ ଭଳି ଖେଳାଳିଙ୍କୁ ସେ ନିଜ ଦଳରୁ ବାଦ ଦେଇଛନ୍ତି ।
Gautam Gambhir's all time Indian ODI XI (Sportskeeda):
— Mufaddal Vohra (@mufaddal_vohra) September 1, 2024
Gambhir, Sehwag, Dravid, Tendulkar, Kohli, Yuvraj, Dhoni, Kumble, Ashwin, Irfan and Zaheer. pic.twitter.com/k6g5hu194r
ଗମ୍ଭୀରଙ୍କ ଦିନିକିଆ ଦଳରେ ରୋହିତ ନାହାନ୍ତି, କୋହଲିଙ୍କୁ ମିଳିଛି ସ୍ଥାନ :-
ଗମ୍ଭୀର ଚୟନ କରିଥିବା ତାଙ୍କ ପସନ୍ଦର ସର୍ବକାଳୀନ ଭାରତୀୟ ଦଳରେ ଓପନର ଭୂମିକାରେ ସେ ନିଜକୁ ଚୟନ କରିଛନ୍ତି । ଏହି ଦଳରେ ତାଙ୍କ ସହ ଓପନିଂ କରିବା ପାଇଁ ସେ ବୀରେନ୍ଦ୍ର ସେହୱାଗଙ୍କୁ ବାଛିଛନ୍ତି । ହେଲେ ଭାରତୀୟ ଟେଷ୍ଟ ଓ ଦିନିକିଆ ଦଳର ଅଧିନାୟକ ତଥା ଓପନର ଭାବେ ଅନେକ ବିଶ୍ବ ରେକର୍ଡ ସୃଷ୍ଟି କରିଥିବା ରୋହିତ ଶର୍ମାଙ୍କୁ ସେ ନିଜ ଦଳରେ ସ୍ଥାନ ଦେଇ ନାହାନ୍ତି । ଏହା ବ୍ୟତୀତ ତାଙ୍କ ଦଳରେ ମିଡିଲ ଅର୍ଡରରେ ସେ ରାହୁଲ ଦ୍ରାବିଡ, ସଚିନ ତେନ୍ଦୁଲକର ଓ ବିରାଟ କୋହଲିଙ୍କୁ ଯଥାକ୍ରମେ ତୃତୀୟ, ଚତୁର୍ଥ ଓ ପଞ୍ଚମ ସ୍ଥାନରେ ରଖିଛନ୍ତି । ଏହାପରେ 6ଷ୍ଠରେ ସେ ଷ୍ଟାର ଅଲରାଉଣ୍ଡର ଯୁବରାଜ ସିଂହଙ୍କୁ ଚୟନ କରିଛନ୍ତି ।
ଧୋନିଙ୍କୁ ବାଛିଲେ, ବୁମ୍ରା ବାଦ :-
ଭାରତର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନିଙ୍କ କେବଳ ଗୋଟିଏ ଛକା ଭାରତକୁ 2011 ଦିନିକିଆ ବିଶ୍ବକପ ବିଜୟୀ କରିନଥିଲା, ବରଂ ଏଥିରେ ଦଳଗତ ସମସ୍ତଙ୍କ ଅବଦାନ ରହିଛି ବୋଲି ବାରମ୍ବାର କହି ଚର୍ଚ୍ଚାକୁ ଆସିଛନ୍ତି ଗୌତମ ଗମ୍ଭୀର । ଏଥିପାଇଁ କିଛି ପ୍ରଶଂସକ ଗମ୍ଭୀରଙ୍କୁ ଧୋନିଙ୍କର ଜଣେ ତୀବ୍ର ସମାଲୋଚକ ଭାବେ ବିଚାର କରନ୍ତି । ହେଲେ ଗମ୍ଭୀର ନିଜ ଦଳରେ 7ମ ସ୍ଥାନରେ ଧୋନିଙ୍କୁ ଚୟନ କରିଛନ୍ତି । ଏହାପରେ 8ମରେ ରହିଛନ୍ତି ଭାରତ ପାଇଁ ସର୍ବାଧିକ ୱିକେଟ ହାସଲ କରିଥିବା କିମ୍ବଦନ୍ତୀ ସ୍ପିନର ଅନୀଲ କୁମ୍ବଲେ ଏବଂ 9ମରେ ରବିଚନ୍ଦ୍ରନ ଅଶ୍ବୀନ । ପେସ୍ ବୋଲିଂ ବିଭାଗରେ ସେ 10ମ ଓ ଏକାଦଶ ସ୍ଥାନରେ ଯଥାକ୍ରମେ ଇର୍ଫାନ ପଠାନ ଓ ଜାହିର ଖାନଙ୍କୁ ଚୟନ କରିଛନ୍ତି ।
Gautam Gambhir Picks Kumble As Skipper Ahead Of Dhoni & Kohli In His All-time India Test XI; Snubs Rohit, Bumrah#GautamGambhir #TestTeam #ViratKohli #RohitSharma #MSDhoni #CricketUpdates #SportsNewshttps://t.co/eA7Z8ob98D
— ETV Bharat (@ETVBharatEng) September 2, 2024
ଟେଷ୍ଟ ଟିମରେ ରୋହିତ-ବୁମ୍ରା ବାଦ, କୁମ୍ବଲେଙ୍କୁ କଲେ ଅଧିନାୟକ :-
'ସ୍ପୋର୍ଟ୍ସ ତକ'କୁ ନିଜ ପସନ୍ଦର ଅଲ୍ ଟାଇମ ଇଣ୍ଡିଆ ଟେଷ୍ଟ ପ୍ଲେଇଂ 11 ବିଷୟରେ କହିଛନ୍ତି ଗୌତମ ଗମ୍ଭୀର । ଏଥିରେ ସେ ବୀରେନ୍ଦ୍ର ସେହୱାଗଙ୍କ ସହ ଓପନର ଭାବେ କିମ୍ବଦନ୍ତୀ କ୍ରିକେଟର ସୁନୀଲ ଗାଭାସ୍କରଙ୍କୁ ବାଛିଛନ୍ତି । ତେବେ ନିଜ ପସନ୍ଦର ଟେଷ୍ଟ ଦଳରେ ଗମ୍ଭୀର ଧୋନି ଓ କୋହଲିଙ୍କୁ ସ୍ଥାନ ଦେଇଥିଲେ ମଧ୍ୟ ଅଧିନାୟକ ଭାବେ ସେ ଅନୀଲ କୁମ୍ବଲେଙ୍କୁ ପସନ୍ଦ କରିଛନ୍ତି । କିମ୍ବଦନ୍ତୀ କ୍ରିକେଟର ତଥା ଭାରତୀୟ ଦଳର 1983 ବିଶ୍ବକପ୍ ବିଜେତା ଅଧିନାୟକ କପିଲ ଦେବଙ୍କୁ ମଧ୍ୟ ସେ ଟେଷ୍ଟ ଦଳରେ ସ୍ଥାନ ଦେଇଛନ୍ତି । ହରଭଜନ ସିଂହ ଓ ଜାୱାଗଲ ଶ୍ରୀନାଥଙ୍କୁ ମଧ୍ୟ ସେ ନିଜ ଟେଷ୍ଟ ଦଳରେ ସ୍ଥାନ ଦେଇଛନ୍ତି ।
ଗୌତମ ଗମ୍ଭୀରଙ୍କ ଅଲ୍ ଟାଇମ୍ ଇଣ୍ଡିଆ ପ୍ଲେଇଂ 11 (ଦିନିକିଆ) :-
ଗୌତମ ଗମ୍ଭୀର, ବୀରେନ୍ଦ୍ର ସେହୱାଗ, ରାହୁଲ ଦ୍ରାବିଡ, ସଚିନ ତେନ୍ଦୁଲକର, ବିରାଟ କୋହଲି, ଯୁବରାଜ ସିଂହ, ଏମଏସ ଧୋନି (ୱିକେଟ କିପର), ଅନୀଲ କୁମ୍ବଲେ, ରବିଚନ୍ଦ୍ରନ ଅଶ୍ବୀନ, ଇର୍ଫାନ ପଠାନ ଓ ଜାହିର ଖାନ
ଗୌତମ ଗମ୍ଭୀରଙ୍କ ଅଲ୍ ଟାଇମ୍ ଇଣ୍ଡିଆ ପ୍ଲେଇଂ 11 (ଟେଷ୍ଟ) :-
ସୁନୀଲ ଗାଭାସ୍କର, ବୀରେନ୍ଦ୍ର ସେହୱାଗ, ରାହୁଲ ଦ୍ରାବିଡ, ସଚିନ ତେନ୍ଦୁଲକର, ବିରାଟ କୋହଲି, କପିଲ ଦେବ, ଏମଏସ ଧୋନି (ୱିକେଟ କିପର), ହରଭଜନ ସିଂହ, ଅନୀଲ କୁମ୍ବଲେ (ଅଧିନାୟକ), ଜାହିର ଖାନ, ଜାୱାଗଲ ଶ୍ରୀନାଥ
ବ୍ୟୁରୋ ରିପୋର୍ଟ, ଇଟିଭି ଭାରତ
