ହରାରେ: ଟିମ୍ ଇଣ୍ଡିଆ T20 ବିଶ୍ବ ବିଜୟୀ ହେବା ପରେ ଜିମ୍ବାଓ୍ବେ ବିପକ୍ଷରେ ପ୍ରଥମ ଟି 20 ସିରିଜ ଖେଳିବାକୁ ଯାଉଛି । ଆଜି ଭାରତ ଓ ଜିମ୍ବାଓ୍ବେ ମଧ୍ୟରେ ପ୍ରଥମ ଟି20 ଖେଳାଯିବ । ଶୁବମନ ଗିଲ୍ଙ୍କ ନେତୃତ୍ବରେ ପଡିଆକୁ ଓହ୍ଲାଇବ ମେନ ଇନ ବ୍ଲୁ । ଗିଲ୍ଙ୍କ ପାଇଁ ଏହି ପାଞ୍ଚ ଟିକିଆ ସିରିଜ ଅଗ୍ନିପରୀକ୍ଷା । କାହିଁକିନା ପ୍ରଥମ ଥର ପାଇଁ ସେ ଦଳର କମାଣ ସମ୍ବାଳିଛନ୍ତି । ସେ କିପରି ଦଳକୁ ପରିଚାଳନା କରୁଛନ୍ତି ତାଉପରେ ସମସ୍ତଙ୍କ ନଜର । ଅପରାହ୍ନ 4ଟା 30 ମନିଟରେ ହରାରେ ସ୍ପୋର୍ଟ୍ସ କ୍ଲବ ଗ୍ରାଉଣ୍ଡରେ ଏହି ମ୍ୟାଚ ଖେଳାଯିବ । ବିଜୟରୁ ଅଭିଯାନ ଆରମ୍ଭ କରିବାକୁ ଜିମ୍ବାଓ୍ବେ ଓ ଭାରତ ରଣନୀତି ପ୍ରସ୍ତୁତ କରିଛନ୍ତି ।
ଟିମ୍ ଇଣ୍ଡିଆରେ 7 ନୂଆ ଚେହେରା :
ଜିମ୍ବାଓ୍ବେ ବିପକ୍ଷ ସିରିଜରେ ଦଳରେ ବରିଷ୍ଠ ଖେଳାଳିଙ୍କୁ ବିଶ୍ରାମ ଦିଆଯାଇ ଯୁବ ଖେଳାଳିଙ୍କୁ ସାମିଲ କରାଯାଇଛି । ଆଜି ପ୍ରଥମ ଥର ପାଇଁ ଦଳର 7 ଜଣ ଖେଳାଳି T 20 ରେ ପଦାର୍ପଣ କରିବାକୁ ଯାଉଛନ୍ତି । 15 ଜଣିଆ ଦଳରେ ପ୍ରଥମ ଥର ପାଇଁ ନୀତିଶ ରେଡ୍ଡୀ, ରିୟାନ ପରାଗ, ଅଭିଷେକ ଶର୍ମା ଓ ତୁଷାର ଦେଶପାଣ୍ଡେଙ୍କୁ ସାମିଲ କରାଯାଇଛି । ସେହିପରି ବାମହାତି ବ୍ୟାଟର ସାଇ ସୁଦର୍ଶନ, ୱିକେଟ୍ କିପର ଓ ବ୍ୟାଟର ଜିତେଶ ଶର୍ମା ଓ ଦ୍ରୁତ ବୋଲର ହର୍ଷିତ ରାଣାଙ୍କୁ ପ୍ରଥମ ଦୁଇଟି ଟି20 ମ୍ୟାଚ୍ ପାଇଁ ଭାରତୀୟ ଦଳରେ ସାମିଲ କରାଯାଇଛି । ଏହି 3 ଖେଳାଳିଙ୍କୁ ଭାରତୀୟ ବିଶ୍ବକପ୍ ଦଳରେ ରହିଥିବା ସଞ୍ଜୁ ସାମ୍ସନ୍, ଶିବମ ଦୁବେ ଓ ଯଶସ୍ବୀ ଜୟସ୍ବାଲଙ୍କ ସ୍ଥାନରେ ସାମିଲ କରାଯାଇଛି । ଆଜିର ମ୍ୟାଚ ପାଇଁ କିଏ ଏକାଦଶରେ ସ୍ଥାନ ପାଉଛନ୍ତି ତା ଉପରେ ସମସ୍ତଙ୍କ ନଜର । ଆଇପିଏଲରେ ଏହି ସମସ୍ତ ଖେଳାଳିଙ୍କ ପ୍ରଦର୍ଶନ ଭଲ ରହିଥିଲା ।
ଦଳର ବିଜୟ ଯୁବ ଖେଳାଳିଙ୍କ ଉପରେ ନିର୍ଭରଶୀଳ:
ଜିମ୍ବାଓ୍ବେ ବିପକ୍ଷ ସିରିଜ ଯୁବ ଖେଳାଳିଙ୍କ ଉପରେ ନିର୍ଭରଶୀଳ । ଟିମ୍ ଇଣ୍ଡିଆର କ୍ୟାପଟେନ ଭାବରେ ପ୍ରଥର ପାଇଁ ପଡିଆକୁ ଓହ୍ଲାଇବେ ଗିଲ । ଟିମ୍ ଇଣ୍ଡିଆର ଏକାଦଶ ବର୍ତ୍ତମାନ ସୁଦ୍ଧା ଘୋଷଣା ହୋଇନାହିଁ । ଯାହା ଅନୁମାନ କରାଯାଉଛି ଗିଲ୍ ଓ ଋତୁରାଜ ଗାଏକଓ୍ବାଡେ ଓପନିଂ କରିପାରନ୍ତି । ସେହିପରି ବ୍ୟାଟିଂରେ ସାଇ ସୁଦର୍ଶନ, ଅଭିଶେଖ ଶର୍ମା, ରିୟାନ ପରାଗ, ରିଙ୍କୁ ସିଂଙ୍କୁ ପ୍ଲେଇଂ ଏଲେଭେନରେ ସ୍ଥାନ ମିଳିପାରେ । ବୋଲିଂରେ ରବି ବିଷ୍ଣୋଇ, ଓ୍ବାଶିଂଟନ ସୁନ୍ଦର, ଆଭେଷ ଖାନ ଓ ତୁଷାରଦେଶ ପାଣ୍ଡେଙ୍କୁ ଦଳ ଭରସା କରିଛି ।
କାହାର ପଲ୍ଲା ରହିବ ଭାରି ?
ବର୍ତ୍ତମାନ ପର୍ଯ୍ୟନ୍ତ ଭାରତ ଏବଂ ଜିମ୍ବାୱେ ମଧ୍ୟରେ 6 ଟି ଟି20 ମ୍ୟାଚ୍ ଖେଳାଯାଇଛି । ଭାରତ 4ଟି ମ୍ୟାଚ ଜିତିଥିବା ବେଳେ ଜିମ୍ବାଓ୍ବେ ମାତ୍ର 2ଟିରେ ବିଜୟୀ ହୋଇଥିଲା । ପୂର୍ବ ରେକର୍ଡକୁ ଦେଖିଲେ ଆଜି ଟିମ୍ ଇଣ୍ଡିଆର ପଲ୍ଲା ଭାରି ରହିବା ନେଇ ଆକଳନ କରାଯାଉଛି । ଏହି ସିରିଜକୁ ଭାରତ ଯଦି ହାଲୁକା ଭାବରେ ନିଏ ତେବେ ଭାରି ପଡିପାରେ ।
