ହାଇଦ୍ରାବାଦ: 34 ବର୍ଷ ପରେ ଭାରତରେ ଖେଳାଯିବ ଏସିଆ କପ । ଆସନ୍ତା 2025 ଏସିଆ କପ କ୍ରିକେଟ ଟୁର୍ଣ୍ଣାମେଣ୍ଟ ଆୟୋଜନ କରିବ ଭାରତ । ଏନେଇ ଏସିଆ କ୍ରିକେଟ ପରିଷଦ ପକ୍ଷରୁ ଘୋଷଣା କରାଯାଇଛି । ଟି-20 ବିଶ୍ୱକପର ପରବର୍ତ୍ତୀ ସଂସ୍କରଣ ଭାରତରେ ଆୟୋଜିନ ହେବାକୁ ଥିବା ବେଳେ ଏସିଆ କପ ଟି-20 ଫର୍ମାଟରେ ଖେଳାଯିବ । 2023ରେ ପାକିସ୍ତାନ (ଦୁବାଇ)ରେ ଏସିଆ କପ ଖେଳାଯାଇଥିଲା ।
ଏସିଆ କପରେ ମୋଟ 6ଟି ଦଳ ଭାଗ ନେବେ: ଭାରତ 2025 ଓ ବାଂଲାଦେଶରେ 2027ରେ ଏସିଆ କପ ଆୟୋଜନ କରାଯିବା ନେଇ ଏସିଆ କ୍ରିକେଟ ପରିଷଦ ପକ୍ଷରୁ ଅଧିକାର ପ୍ରଦାନ କରାଯାଇଛି । ଟି 20 ବିଶ୍ବକପକୁ ଦୃଷ୍ଟିରେ ରଖି ଏସିଆ କପ ଟି 20 ଫର୍ମାଟରେ ଖେଳାଯିବ । ସେହିପରି 2027ରେ ଦକ୍ଷିଣ ଆଫ୍ରିକାରେ ଦିନିକିଆ ବିଶ୍ବକପ ହେବାକୁ ଥିବା ବେଳେ ବାଂଲାଦେଶରେ ଏହି ଟୁର୍ଣ୍ଣାମେଣ୍ଟ ଦିନିକିଆ ଫର୍ମାଟରେ ଖେଳାଯିବ । ଏସିଆ କପରେ ମୋଟ 6ଟି ଦଳ ଭାଗ ନେବେ । ଭାରତ, ଶ୍ରୀଲଙ୍କା, ପାକିସ୍ତାନ, ବାଂଲାଦେଶ ଓ ଆଫଗାନିସ୍ତାନ ବ୍ୟତିତ ଯୋଗ୍ୟତା ପର୍ଯ୍ୟାୟରେ ଷଷ୍ଠ ଦଳ ଚୟନ କରାଯିବ ବୋଲି ଏସିସି ପକ୍ଷରୁ କୁହାଯାଇଛି।
2023 ଏସିଆ କପ ହାତେଇଥିଲା ଭାରତ : ଏସିଆ କପ 2023 ପାକିସ୍ତାନ ଆୟୋଜନ କରିଥିଲା । ସେହି ସମୟରେ ଖେଳିବା ପାଇଁ ଟିମ୍ ଇଣ୍ଡିଆ ପାକିସ୍ତାନ ଯାଇନଥିଲା । ଫଳରେ ଭାରସର ସମସ୍ତ ମ୍ୟାଚ ଶ୍ରୀଲଙ୍କା ଓ ପାକିସ୍ତାନ ଉଭୟ ଦେଶରେ ଖେଳାଯିବାକୁ ଏସିୟ କ୍ରିକେଟ୍ ପରିଷଦ ନିଷ୍ପତ୍ତି ନେଇଥିଲା । ଟୁର୍ଣ୍ଣାମେଣ୍ଟ ଫାଇନାଲ ମ୍ୟାଚରେ ଭାରତ ଓ ଶ୍ରୀଲଙ୍କା ମଧ୍ୟରେ ଖେଳାଯାଇଥିଲା । ଶ୍ରୀଲଙ୍କା 50 ରନ କରି ଅଲଆଉଟ ହୋଇଥିବା ବେଳେ ଅଷ୍ଟମ ଥର ପାଇଁ ଏସିଆ କପ ଟାଇଟଲ ଜିତି 5 ବର୍ଷ ଟ୍ରଫି ମରୁଡିର ଅନ୍ତ ଘଟାଇଥିଲା ଟିମ ଇଣ୍ଡିଆ । ଭାରତ ଶେଷ ଥର ପାଇଁ 2018ରେ ଏସିଆ କପ ଚମ୍ପିଆନ ହୋଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
