ଅମରାବତୀ: ଆନ୍ଧ୍ର ପ୍ରଦେଶରେ ଲୋକସଭା ସହ ବିଧାନସଭା ନିର୍ବାଚନ ମଧ୍ୟ ହେବାକୁ ଯାଉଛି । ଚନ୍ଦ୍ରବାବୁ ନାଇଡୁଙ୍କ ନେତୃତ୍ବାଧୀନ ତେଲୁଗୁ ଦେଶମ ପାର୍ଟି (ଟିଡିପି) ଆସନ୍ତା ବିଧାନସଭା ନିର୍ବାଚନ ପାଇଁ ଆଜି ଦ୍ବିତୀୟ ପର୍ଯ୍ଯାୟରେ 34 ପ୍ରାର୍ଥୀଙ୍କ ନାମ ଘୋଷଣା କରିଛି । ଏହି ପର୍ଯ୍ୟାୟରେ ଦଳର ସହଯୋଗୀ ଜନସେନା ପାର୍ଟି ମୁଖ୍ୟ ପବନ କଲ୍ୟାଣ ମଧ୍ୟ ନିଜ ଆସନ ସମ୍ପର୍କରେ ଘୋଷଣା କରିଛନ୍ତି । ପବନ ପିଠାପୁରମ ବିଧାନସଭା ଆସନରୁ ନିର୍ବାଚନ ଲଢିବାକୁ ଯାଉଛନ୍ତି । ଫେବୃଆରୀ 24 ତାରିଖରେ ପ୍ରଥମ ପର୍ଯ୍ୟାୟରେ ଟିଡିପି ମୋଟ 94 ପ୍ରାର୍ଥୀଙ୍କ ନାମ ଘୋଷଣା କରିଥିଲା । ଏଥିରେ ଅଭିନେତା ପବନ କଲ୍ୟାଣଙ୍କ ଜନସେନା ପାର୍ଟିର 5 ପ୍ରାର୍ଥୀ ଥିଲେ । ଆଜି ଆଉ 34 ଆସନରେ ଦଳ ପ୍ରାର୍ଥୀ ଦେଇଛି ।
ଆଜି ଦ୍ବିତୀୟ ତାଲିକା ଘୋଷଣା କରିବା ଅବସରରେ ଟ୍ବିଟ କରି ଟିଡିପି ମୁଖ୍ୟ ନାରା ଚନ୍ଦ୍ରବାବୁ ନାଇଡୁ କହିଛନ୍ତି, ପ୍ରଥମ ତାଲିକା ପରି ଦ୍ୱିତୀୟ ତାଲିକା ମଧ୍ୟ ଜନମତ ସଂଗ୍ରହ ଆଧାରରେ ପ୍ରସ୍ତୁତ କରାଯାଇଛି । ପ୍ରତ୍ୟେକ ପ୍ରାର୍ଥୀ ଚୟନକର୍ତ୍ତାଙ୍କ ପସନ୍ଦ ଏବଂ ଆବଶ୍ୟକତାକୁ ଧ୍ୟାନରେ ରଖି ମନୋନୀତ ହୋଇଛନ୍ତି । ଚନ୍ଦ୍ରବାବୁ ରାଜ୍ୟବାସୀଙ୍କୁ କୃତଜ୍ଞତା ଜଣାଇବା ସହ ଆସନ୍ତା ନିର୍ବାଚନରେ ସମସ୍ତ ଟିଡିପି ପ୍ରାର୍ଥୀଙ୍କୁ ଭୋଟ ମାଧ୍ୟମରେ ଆଶୀର୍ବାଦ ଦେବାକୁ ଅନୁରୋଧ କରିଛନ୍ତି । ଚଳିତ ପ୍ରାର୍ଥୀ ତାଲିକାରେ ବିଭିନ୍ନ ଶିକ୍ଷାଗତ ପୃଷ୍ଠଭୂମିରୁ ନେତାମାନେ ରହିଛନ୍ତି । ଏମାନଙ୍କ ମଧ୍ୟରେ ଜଣେ ପ୍ରାର୍ଥୀ ପିଏଚଡି, 11 ଜଣ ପୋଷ୍ଟ ଗ୍ରାଜୁଏଟ୍ ଏବଂ 9 ସ୍ନାତକଧାରୀ ରହିଛନ୍ତି ।
ଏହା ମଧ୍ୟ ପଢନ୍ତୁ :- କଂଗ୍ରେସକୁ ଝଟକା, ବିଜେପିରେ ମିଶିଲେ ସାଂସଦ ପରିଣୀତି କୌର
ଆନ୍ଧ୍ରରେ ଚଳିତଥର ଲୋକସଭା ନିର୍ବାଚନ ସହ ବିଧାନସଭା ନିର୍ବାଚନ ମଧ୍ୟ ହେବାକୁ ଯାଉଛି । ରାଜ୍ଯରେ ଜଗନ ମୋହନ ରେଡ୍ଡୀଙ୍କ ଓ୍ବାଇଏସଆର କଂଗ୍ରେସ ଶାସନରେ ଥିବା ବେଳେ ବିରୋଧୀ ଭାବେ ଚନ୍ଦ୍ରବାବୁଙ୍କ ତେଲେଗୁ ଦେଶମ ପାର୍ଟି ରହିଛି । ଚଳିତ ଥର ରାଜ୍ୟରେ ଚନ୍ଦ୍ରବାବୁଙ୍କ ଟିଡିପି, ପବନ କଲ୍ୟାଣଙ୍କ ଜେଏସପି ଓ ବିଜେପି ମଧ୍ୟରେ ମେଣ୍ଟ ହୋଇଛି । ଏହି ମିଳିତ ମଞ୍ଚରେ ଟିଡିପି 175ଟି ମଧ୍ୟରୁ ସର୍ବାଧିକ 144 ଟି ବିଧାନସଭା ଆସନରେ ପ୍ରତିଦ୍ୱନ୍ଦ୍ୱିତା କରିବ । ଦୁଇଟି ତାଲିକାରେ ଟିଡିପି 128 ପ୍ରାର୍ଥୀ ନାମ ଘୋଷଣା କରିସାରିଥିବା ବେଳେ 16ଟି ନାମ ଏପର୍ଯ୍ୟନ୍ତ ପ୍ରକାଶ ପାଇବ ନାହିଁ । ଖୁବଶିଘ୍ର ଦଳ ସମସ୍ତ ଆସନରେ ପ୍ରାର୍ଥୀ ଘୋଷଣା ଶେଷ କରିବା ନେଇ ଆଶା କରାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
