ସମ୍ବଲପୁର: ବଦଳିଲେ ସମ୍ବଲପୁର ଓ ରେଢ଼ାଖୋଲ ବିଧାନସଭା ନିର୍ବାଚନ ମଣ୍ଡଳୀର ବିଜେଡି ପ୍ରାର୍ଥୀ । ସମ୍ବଲପୁର ବିଧାନସଭା ଆସନ ପାଇଁ ରୋହିତ ପୂଜାରୀ ଓ ରେଢ଼ାଖୋଲ ପାଇଁ ପ୍ରସନ୍ନ ଆଚାର୍ଯ୍ୟଙ୍କୁ ପ୍ରାର୍ଥୀ କରାଯାଇଛି । ଗତ ଏପ୍ରିଲ 11 ତାରିଖରେ ସମ୍ବଲପୁର ବିଧାନସଭା ଆସନ ପାଇଁ ବରିଷ୍ଠ ବିଜେଡି ନେତା ପ୍ରସନ୍ନ ଆଚାର୍ଯ୍ୟଙ୍କୁ ପ୍ରାର୍ଥୀ କରାଯାଇଥିଲା । ସେହିପରି ରେଢ଼ାଖୋଲ ବିଧାନସଭା ଆସନ ପାଇଁ ଇଂ ରୋହିତ ପୂଜାରୀଙ୍କୁ ବିଜେଡି ଟିକେଟ ଦେଇଥିଲା । ହେଲେ ଆଜି ବିଜେଡି଼ ପକ୍ଷରୁ ଉଭୟ ସମ୍ବଲପୁର ଓ ରେଢାଖୋଲ ଆସନର ପ୍ରାର୍ଥୀ ଅଦଳ ବଦଳ କରାଯାଇଛି । ପୂର୍ବରୁ ପ୍ରସନ୍ନ ଆଚାର୍ଯ୍ୟ ସମ୍ବଲପୁରକୁ ଆସୁନଥିବାବେଳେ ଏନେଇ ସମ୍ବଲପୁରରେ ରାଜନୈତିକ ଛକାପଞ୍ଝା ଜାରି ରହିଥିଲା । ସମ୍ବଲପୁର ବିଜେଡିର କିଛି ପ୍ରମୁଖ ନେତାଙ୍କ ସମର୍ଥକ ପ୍ରସନ୍ନ ଆଚାର୍ଯ୍ୟଙ୍କ ପ୍ରାର୍ଥୀତ୍ବ ନେଇ ଅସନ୍ତୋଷ ଜାହିର କରିଥିଲେ । ଏଭଳି ସ୍ଥିତିରେ ପ୍ରସନ୍ନ ସମ୍ବଲପୁରର ଟିକେଟ ନେଇ ଅସନ୍ତୋଷ ଥିବା ସହ ଭୁବନେଶ୍ୱରରେ ରହି ରେଢ଼ାଖୋଲ ସିଟ୍ ପାଇଁ ଲବି କରୁଥିଲେ ବୋଲି ଚର୍ଚ୍ଚା ହେଉଥିଲା ।
ଆଜି ଦଳ ସବୁ କଳ୍ପନା ଜଳ୍ପନାର ଅନ୍ତ କରି ରେଢ଼ାଖୋଲ ପାଇଁ ପ୍ରସନ୍ନ ଆଚାର୍ଯ୍ୟ ଓ ସମ୍ବଲପୁର ପାଇଁ ରୋହିତ ପୂଜାରୀଙ୍କ ପ୍ରାର୍ଥୀତ୍ବ ଘୋଷଣା କରିଛି । ଏନେଇ ସମ୍ବଲପୁର ଜିଲ୍ଲା ବିଜେଡି ସଭାପତି ତଥା ରେଢ଼ାଖୋଲ ବିଧାୟକ ରୋହିତ ପୂଜାରୀ ନିଜର ପତିକ୍ରିୟା ରଖି କହିଛନ୍ତି " ମୁଁ ନବୀନ ପଟ୍ଟନାୟକଙ୍କ ଜଣେ ସୈନିକ ଅଟେ । ବିଗତ ଦିନରେ ମୋତେ ଯାହା ଦାୟିତ୍ୱ ଦିଆଯାଇଛି ତାକୁ ନିଷ୍ଠାର ସମ୍ପନ୍ନ କରିଆସିଛି । ପୂର୍ବରୁ ମତେ ରେଢ଼ାଖୋଲ ଦାୟିତ୍ୱ ଦିଆଯାଇଥିଲା, ବର୍ତ୍ତମାନ ସମ୍ବଲପୁର ଦାୟିତ୍ୱ ଦିଆଯାଇଛି । ତାକୁ ନେଇ ମୁଁ ପ୍ରସ୍ତୁତ ରହିଛି । ଏହାସହ ମୁଖ୍ୟମନ୍ତ୍ରୀଙ୍କ ସମ୍ମାନକୁ ବଜାୟ ରଖିବି ବୋଲି ମୋର ଦୃଢ ବିଶ୍ୱାସ ରହିଛି । ମୁଁ ସମ୍ବଲପୁର ଆସନକୁ ଜିତି ଆମର ଲୋକସଭା ପ୍ରାର୍ଥୀ ହୋଇଥିବା ପ୍ରଣବ ପ୍ରକାଶ ଦାସକୁ ମଧ୍ୟ ବିଜୟୀ କରିବାରେ ସହାୟକ ହେବି ।"
ସେ ଆହୁରି କହିଛନ୍ତି, "ମୋର ଶେଷ ନିଶ୍ୱାସ ଯାଏ ରେଢ଼ାଖୋଲ, ସମ୍ବଲପୁର ବିଧାନସଭା ସଭା ଆସନ ସହ ସମଗ୍ର ସମ୍ବଲପୁର ଜିଲ୍ଲାର ସେବା କରିବି । ଦଳ ଯେଉଁଠି ଯେତେବେଳେ ମୋତେ ଯେଉଁ ଦାୟିତ୍ୱ ଦେଇଛି, ମୁଁ ସେଠାରେ ସମର୍ପିତ ହୋଇ କାମ କରିଛି ଆଉ ଆଗକୁ ମଧ୍ୟ କରିବି । ମୁଁ ଜିଲ୍ଲା ସଭାପତି ରହିଛି, ସମ୍ବଲପୁର ମୋ ପାଇଁ ନୂଆ ନୁହେଁ । ତେଣୁ ମୋର ବିଶ୍ୱାସ ରହିଛି ଯେ, ଆଗାମୀ ନିର୍ବାଚନରେ ଲୋକେ ମୋ ଉପରେ ଆସ୍ଥା ପ୍ରକଟ କରି ଆଶୀର୍ବାଦ ଦେବେ । ଦଳର ସ୍ୱାର୍ଥରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ମୋତେ ଯେଉଁଠି ବ୍ୟବହାର କରିବେ ମୁଁ ସେଠି ସୈନିକ ଭାବରେ ଲଢ଼ିବି ବୋଲି କହିଛନ୍ତି ରେଢ଼ାଖୋଲ ବିଧାୟକ ରୋହିତ ପୂଜାରୀ ।"
ଇଟିଭି ଭାରତ, ସମ୍ବଲପୁର
