ଭୁବନେଶ୍ବର: କଂଗ୍ରେସ ପ୍ରଚାର କମିଟି ସଭାପତି ପଦରୁ ଇସ୍ତଫା ଦେଲେ ଭକ୍ତ ଚରଣ ଦାସ । ନିଜର ଇସ୍ତଫା ପତ୍ର ଏଆଇସିସିକୁ ପଠାଇଛନ୍ତି ଭକ୍ତ । ଏଥର ନିର୍ବାଚନରେ ପ୍ରଦେଶ କଂଗ୍ରେସ ଆଶାତୀତ ସଫଳତା ପାଇନଥିବାରୁ ନୈତିକତା ଦୃଷ୍ଟିରୁ ପ୍ରଚାର କମିଟି ଅଧ୍ୟକ୍ଷ ପଦରୁ ଇସ୍ତଫା ଦେଇଛନ୍ତି ଭକ୍ତ ଦାସ । ନିର୍ବାଚନ ପୂର୍ବରୁ ମାର୍ଚ୍ଚ ୨୨ ତାରିଖରେ ପ୍ରଦେଶ କଂଗ୍ରେସ ପ୍ରଚାର କମିଟି ଅଧ୍ୟକ୍ଷ ପଦରୁ ବିଜୟ ପଟ୍ଟନାୟକଙ୍କୁ ପରିବର୍ତ୍ତନ କରାଯାଇ ତାଙ୍କ ସ୍ଥାନରେ ଭକ୍ତ ଦାସଙ୍କୁ ଦାୟିତ୍ବ ଦେଇଥିଲା ଦଳ । ନିର୍ବାଚନରେ ଦଳର ଯେଉଁ ଆଭିମୁଖ୍ୟ ଥିଲା, ତାହା ସଫଳ ହୋଇପାରିଲା ନାହିଁ । ତେଣୁ ନୈତିକତା ଦୃଷ୍ଟିରୁ ନିଜ ପଦରୁ ଇସ୍ତଫା ଦେଇଛନ୍ତି ଭକ୍ତ ।
୨୦୨୪ ସାଧାରଣ ନିର୍ବାଚନରେ ୯ରୁ ୯୦ ଡାକରା ଦେଇଥିଲା ପ୍ରଦେଶ କଂଗ୍ରେସ । ହେଲେ ପ୍ରଚାର କ୍ଷେତ୍ରରେ ବିଜେପି ଓ ବିଜେଡି ଠାରୁ ଦଳ ବହୁ ପଛରେ ପଡ଼ିଯାଇଥିବା ପରି ମନେ ହୋଇଥିଲା । କଂଗ୍ରେସ ଗତଥର ପାଇଥିବା ଆସନ (୯) ଏଥର ରଖିପାରିବ କି ନାହିଁ, ସେନେଇ ଉପୁଜିଥିଲା ସନ୍ଦେହ । ଏହା ସତ୍ତ୍ବେ ଓଡ଼ିଶାରେ ପରିବର୍ତ୍ତନର ହାୱା କଂଗ୍ରେସକୁ କିଛିମାତ୍ରାରେ ସୁହାଇଥିଲା । ୯ଟି ଆସନରୁ ବଢ଼ି ଏଥର ୧୪ଟି ବିଧାୟକ ଜିତିଛି ଦଳ । ଏହା ସହିତ ପ୍ରଖର ମୋଦି ହାୱା ସତ୍ତ୍ବେ ଗତଥର ଜତିଥିବା ଗୋଟିଏ ସଂସାଦ ପଦ ଏଥର ମଧ୍ୟ ନିଜ ହାତରେ ରଖିଛି କଂଗ୍ରେସ । ହେଲେ କଂଗ୍ରେସ ଆଶାନୁରୂପ ଫଳ ନପାଇବାରୁ ନୈତିକତା ଦୃଷ୍ଟିରୁ ପ୍ରଚାର କମିଟି ଅଧ୍ୟକ୍ଷ ପଦରୁ ଇସ୍ତଫା ଦେଇଛନ୍ତି ଭକ୍ତ ଦାସ ।
