ଭୁବନେଶ୍ବର: ଦୀର୍ଘ 24ବର୍ଷ ପରେ ରାଜ୍ୟରେ ଶାସନ ବଦଳିଛି । ମୋହନ ଚରଣ ମାଝୀଙ୍କ ନେତୃତ୍ବରେ ଶାସନକୁ ଆସିଛି ବିଜେପି ସରକାର । ନୂଆ ସରକାର କ୍ଷମତାକୁ ଆସିବା ପରେ ଆକ୍ସନମୋଡରେ କାମ ମଧ୍ୟ ଆରମ୍ଭ କରିସାରିଲାଣି । ମାତ୍ର ଦୀର୍ଘ ବର୍ଷର ଶାସନ ପରିବର୍ତ୍ତିତ ସ୍ଥିତିରେ ନୂଆ ସରକାର ସାମ୍ନାରେ ରହିଛି ଏକାଧିକ ଗୁରୁତ୍ବପୂର୍ଣ୍ଣ । ଏକାଧିକ ବିଭାଗରେ ଦୁର୍ନୀତି, ଲାଞ୍ଚ ଓ ବିଭିନ୍ନ ପୂର୍ବଧାରାରେ ପରିବର୍ତ୍ତନ କରିବାକୁ ହେବ । କ୍ଷମତାର ପରିବର୍ତ୍ତନର ଏହି ପରିପ୍ରେକ୍ଷୀରେ କଣ କହୁଛନ୍ତି ରାଜନୈତିକ ସମୀକ୍ଷକ । ଦୀର୍ଘ ୨୪ବର୍ଷର ସରକାର ପରେ ଲୋକେ କିଛି ନୂତନ ଆଶା କରି ପରିବର୍ତ୍ତନ ଆଣିଛନ୍ତି । ସେଗୁଡିକ ମଧ୍ୟରେ ଗୋଟିଏ କି ଦୁଇଟି ନୁହେଁ, ବରଂ ଏକାଧିକ ବିଷୟ ରହିଛି । ଏନେଇ ବରିଷ୍ଠ ସାମ୍ବାଦିକ ଅମ୍ବିକା ପ୍ରସାଦ କାନୁନଗୋ କହିଛନ୍ତି ।
1. ଦୁର୍ନୀତି ବିରୋଧୀ ଲଢେଇ
ଦୁର୍ନୀତି ସବୁସ୍ତରରେ ହଟିବା ଦରକାର । ଅନେକ ବିଭାଗଠୁ ଆରମ୍ଭ କରି ସାଧାରଣ ସ୍ତରରେ ମଧ୍ୟ ବହୁମାତ୍ରାରେ ଦୁର୍ନୀତି ହେଉଛି । ଯାହାକି ବର୍ତ୍ତମାନ ଏକ ପ୍ରମୁଖ ସମସ୍ୟା ଭାବେ ମୁଣ୍ଡ ଟେକିଛି । ପିସି କାରବାରଠୁ ଆରମ୍ଭ କରି ସାଧାରଣ ଲୋକଟିଏ ସରକାରି ସୁବିଧା ପାଇବା ପାଇଁ ଦୁର୍ନୀତିଖୋର ଅଧିକାରୀଙ୍କୁ ଲାଞ୍ଚ ଦେବାକୁ ବାଧ୍ୟ ହେଉଛି । ସମୟେ ସମୟେ ଅଧିକାରୀମାନେ ଲାଞ୍ଚ ନେଇ ଧରା ମଧ୍ୟ ପଡୁଛନ୍ତି। ତେଣୁ ଦୁର୍ନୀତି ବିରୋଧରେ ଏକ କଠୋର ଲଢ଼େଇ ହେବା ଦରକାର ରରିଛି । ଦୁର୍ନୀତି କରିଥିବା ନେତା ଧରାପଡନ୍ତୁ ଓ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ଆବଶ୍ୟକତା ରହିଛି ।
2. ସରକାରୀ ପଦବୀ ପୂରଣ
ରାଜ୍ୟରେ ଅନେକ ବିଭାଗରେ ସରକାରୀ ପଦବୀ ଖାଲିପଡ଼ିଛି । ସାଧାରଣ ହସ୍ପିଟାଲଠୁ ଆରମ୍ଭ କରି ସ୍କୁଲରେ ଶିକ୍ଷକ ଅଭାବ ସହ ସରକାରୀ କାର୍ଯ୍ୟାଳୟରେ କର୍ମଚାରୀ ଖାଲି ଯୋଗୁଁ ଲୋକେ ବିଭିନ୍ନ ସମସ୍ୟାର ସାମ୍ନା କରୁଛନ୍ତି । ତେଣୁ ସେଗୁଡିକ ପୂରଣ କରି ସମସ୍ୟାକୁ ସୁଧାରିବାକୁ ହେବ । ସେ ଦିଗରେ ସରକାର ଧ୍ୟାନ ଦେବା ଉଚିତ ।
3. ଲୋକଙ୍କୁ ମନ୍ତ୍ରୀଙ୍କୁ ଭେଟିବାକୁ ସୁଯୋଗ ମିଳୁ
ସାଧାରଣ ଲୋକଙ୍କୁ ମନ୍ତ୍ରୀଙ୍କୁ ଭେଟିବାକୁ ସୁଯୋଗ ମିଳୁ । ଏମିତି ବ୍ୟବସ୍ଥା ହେଉ ଯେ, ସାଧାରଣ ଲୋକ ମୁଖ୍ୟମନ୍ତ୍ରୀଙ୍କୁ ବା ଅନ୍ୟ ମନ୍ତ୍ରୀମାନଙ୍କୁ ଭେଟି ତାଙ୍କର ଅଭାବ ଅସୁବିଧା କହି ପାରିବେ । ସବୁ ଲୋକ ଓ ସବୁ ମନ୍ତ୍ରୀ ମାନଙ୍କୁ ଭେଟିବାକୁ ସୁଯୋଗ ମିଳୁ । ଏ ଦିଗ ଉପରେ ଦୃଷ୍ଟି ଦିଆଯାଉ ।
4. ସରକାରୀ ଚାକିରିରେ ଘୋଟାଲା
ଯୁବକମାନେ ଯେଉଁଠି ଚାକିରି ପାଇଁ ଇଣ୍ଟରଭ୍ୟୁ ଦେଉଛନ୍ତି, ସବୁ ସ୍ଥାନରେ ଲାଞ୍ଚ କାରବାର ହେଉଛି । ବିଭିନ୍ନ ସମୟରେ ହାଇକୋର୍ଟଙ୍କୁ ମଧ୍ୟ ହସ୍ତକ୍ଷେପ କରିବାକୁ ପଡୁଛି । ପ୍ରଶ୍ନପତ୍ର ଲିକ ପରି ଘଟଣା ମଧ୍ୟ ବାରମ୍ବାର ଘଟୁଛି । ସଧାରଣ ପରିବାରର ପିଲାଟେ ଏଥିରେ ସର୍ବାଧିକ ପ୍ରଭାବିତ ହେଉଛି । ତେଣୁ ଏସବୁ ଦିଗରେ ଏକ ସ୍ବଚ୍ଛତା ଅଣାଯାଉ ।
5. ସରକାରୀ ଅଫିସରେ ଲୋକଙ୍କୁ ସେବା ମିଳୁ
ସମସ୍ତ ସରକାରୀ କାର୍ଯ୍ୟାଳୟରେ ଲୋକଙ୍କୁ ବିଭିନ୍ନ ସମୟରେ ଦୁର୍ବ୍ୟବହାର କରାଯାଉଥିବା ଅଭିଯୋଗ ହୋଇ ଆସୁଥିଲା । ଯେପରି ସରକାରୀ କର୍ମଚାରୀମାନେ ନିଜକୁ ଲୋକଙ୍କୁ ସେବା ଯୋଗାଇଦେବା ପାଇଁ ହୋଇଛନ୍ତି ସେଭଳି ବ୍ୟବହାର କରନ୍ତୁ । ବିନା ଲାଞ୍ଚରେ ସରକାରୀ ସେବା ଯୋଗାଇବା ନିଶ୍ଚିତ କରାଯାଉ । ଗରିବ ଲୋକଟି ନ୍ୟାୟ ପାଉ ।
ଇଟିଭି ଭାରତ, ଭୁବନେଶ୍ବର
