ଭୁବନେଶ୍ବର: ନିର୍ବାଚନ ପୂର୍ବରୁ ଯେତିକି ଚର୍ଚ୍ଚାରେ ତା'ଠାରୁ ଅଧିକ ଚର୍ଚ୍ଚାରେ ଅଛନ୍ତି ଭିକେ ପାଣ୍ଡିଆନ । ଜାତୀୟ ଗଣମାଧ୍ୟମରେ ଆଜି ପ୍ରକାଶିତ ଏକ ଖବରକୁ ନେଇ ପୁନର୍ବାର ଶିରୋନାମା ପାଲଟିଛନ୍ତି ପାଣ୍ଡିଆନ । ଖବର ସାମ୍ନାକୁ ଆସିବା ପରେ ପାଣ୍ଡିଆନଙ୍କ ସପକ୍ଷରେ ପୁଣି ବାହାରିଛନ୍ତି ବିଜେଡି ସଭାପତି ନବୀନ ପଟ୍ଟନାୟକ । ଜାତୀୟ ଗଣମାଧ୍ୟମର ରିପୋର୍ଟକୁ ଖଣ୍ଡନ କରିବା ସହ ଭିତ୍ତିହୀନ ବୋଲି କହିଛନ୍ତି ନବୀନ ।
ବିଜେଡିକୁ ଭାଙ୍ଗିବାକୁ ଚେଷ୍ଟା କରୁଛନ୍ତି କି ଭୈରବ କାର୍ତ୍ତିକେୟ ପାଣ୍ଡିଆନ ? ବିଜେଡି ଭିତରେ ଫାଟ କରି ବିଜେପିକୁ ଫାଇଦା ଦେବାକୁ ଉଦ୍ୟମରେ ଅଛନ୍ତି କି ପାଣ୍ଡିଆନ ? ବିଭୀଷଣ ସାଜି ବିଜେଡିକୁ ଡୁବେଇବାକୁ ପାଣ୍ଡିଆନ ଷଡଯନ୍ତ୍ର କରୁଛନ୍ତି କି ? ଜାତୀୟ ଗଣମାଧ୍ୟମରେ ଏ ନେଇ ଏକ ରିପୋର୍ଟ ପ୍ରକାଶ ପାଇଛି । ଯାହାକୁ ଆଜି ଏହାକୁ ନେଇ ଆଜି ଦିନ ତମାମ ଚର୍ଚ୍ଚା ଲାଗି ରହିଛି । ଖବରକୁ ନେଇ ରାଜନୈତିକ ଆଲୋଚନା ଓ ପର୍ଯ୍ୟାଲୋଚନା ଜାରି ରହିଛି । ଖବର ଉପରେ ବିଜେଡି ସଭାପତି ନବୀନ ପଟ୍ଟନାୟକଙ୍କ ପ୍ରତିକ୍ରିୟା ଆସିବା ପରେ ଚର୍ଚ୍ଚା ଆଉ ଟିକେ ବ୍ୟାପ୍ତ ହୋଇଛି ।
ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ରିପୋର୍ଟ ଅନୁସାରେ, ଗତ କେଇ ସପ୍ତାହ ଧରି ଜଣେ କେନ୍ଦ୍ରମନ୍ତ୍ରୀଙ୍କ ସହାୟତାରେ ବିଜେପିର ଚାଣକ୍ୟ କୁହାଯାଉଥିବା ଅମିତ ଶାହଙ୍କୁ ଭେଟିବାକୁ ଭିକେ ପାଣ୍ଡିଆନ ଉଦ୍ୟମ କରୁଛନ୍ତି । କେବଳ ଏତିକି ନୁହେଁ, ବରଂ ସେ ବିଜେଡିରେ ଫାଟ ସୃଷ୍ଟି କରିବାକୁ ଉଦ୍ୟମ କରୁଛନ୍ତି । ଏହାସହ ରାଜ୍ୟରେ ବିଜେପି ସଙ୍ଗଠନକୁ ଶକ୍ତିଶାଳୀ କରିବାରେ ସେ ସହଯୋଗ କରିବେ । ଏ ନେଇ ସେ ବିଜେପି ନେତୃବୃନ୍ଦକୁ ଅଫର ଦେଇଥିବା ନେଇ ଖବର ପ୍ରକାଶ ପାଇଛି । ଖବର ପ୍ରକାଶ ପାଇବା ପରେ ମୁହଁ ଖୋଲିଛନ୍ତି ଖୋଦ ବିଜେଡି ସଭାପତି ନବୀନ ପଟ୍ଟନାୟକ । ପାଣ୍ଡିଆନଙ୍କ ସପକ୍ଷରେ ପୁଣି ବାହାରି ପ୍ରତିକ୍ରିୟା ରଖିଛନ୍ତି ନବୀନ ।
ଏହା ବି ପଢନ୍ତୁ- ପାଣ୍ଡିଆନଙ୍କୁ ଶକୁନି ସହ ତୁଳନା କଲେ ନନା, କହିଲେ ଦୁର୍ଯ୍ୟୋଧନ କାହିଁକି ଶକୁନିଙ୍କୁ ବାଛିଲେ
This is completely false, motivated, defamatory and malicious. As I have stated earlier Mr Pandian has served the state and party with utmost dedication efficiency and integrity and he is known and respected for the same.@NewIndianXpress pic.twitter.com/4cVZgVcxoD
— Naveen Patnaik (@Naveen_Odisha) July 22, 2024
ସୋସିଆଲ ମିଡିଆରେ ପୋଷ୍ଟ କରି ଜାତୀୟ ଗଣମାଧ୍ୟମରେ ପାଣ୍ଡିଆନ ଓ ବିଜେଡିକୁ ନେଇ ପ୍ରକାଶିତ ଖବରକୁ ଖଣ୍ଡନ କରିଛନ୍ତି ନବୀନ । ନବୀନ କହିଛନ୍ତି, "ଏହା ସମ୍ପୂର୍ଣ୍ଣ ମିଛ, ଉଦ୍ଦେଶ୍ୟ ପ୍ରଣୋଦିତ ଖବର । ଏହା ବିଭ୍ରାନ୍ତକାରୀ ଏବଂ ମାନହାନି କଲା ଭଳି ଖବର । ପାଣ୍ଡିଆନ ନିଜର ଦକ୍ଷତା, ନିଷ୍ଠା, ସମର୍ପଣ ଭାବନା ନେଇ ଉଭୟ ରାଜ୍ୟ ଓ ଦଳ ପାଇଁ କାମ କରିଛନ୍ତି । ଏହି ସେବା ମନୋବୃତ୍ତି ପାଇଁ ପାଣ୍ଡିଆନ ଜଣାଶୁଣା ଓ ସମ୍ମାନନୀୟ ।" ଏହା ପୂର୍ବରୁ ବିଜେଡିର ପରାଜୟ ପାଇଁ ପାଣ୍ଡିଆନଙ୍କୁ ଦାୟୀ କରାଯାଉଥିବା ବେଳେ ସାମ୍ନାକୁ ଆସି ନବୀନ ତାଙ୍କୁ କ୍ଲିନଚିଟ ଦେଇଥିଲେ । ଏବେ ପୁଣିଥରେ ସମାନ ଆଭିମୁଖ୍ୟ ଦେଖାଇ ବାର୍ତ୍ତା ଦେଇଛନ୍ତି ନବୀନ ।
ବରିଷ୍ଠ ସାମ୍ବାଦିକ ରବି ଦାସ କହିଛନ୍ତି ଯେ, ନବୀନ ପଟ୍ଟନାୟକ ଓ ବିଜେଡିକୁ ବିଜେପିର ଜାତୀୟ ନେତା ଅସନ୍ତୁଷ୍ଟ କରିବାକୁ ଚାହୁଁନାହାନ୍ତି । ଏହାର ଦୁଇଟି କାରଣ ରହିଛି । ରାଜ୍ୟସଭାରେ ବିଜେପିର ସଂଖ୍ୟା ଗରିଷ୍ଠତା ନାହିଁ । ଅନ୍ୟପକ୍ଷରେ ବିଜେଡିର ବର୍ତ୍ତମାନର ସଦସ୍ୟ ସଂଖା 9 ରହିଛି । ଆଗାମୀ ବିନରେ ଅନ୍ୟ ଆଞ୍ଚଳିକ ଦଳ ସହ ବିଜେପିକୁ ବିଜେଡିର ସହଯୋଗ ଦରକାର । ରାଷ୍ଟ୍ରପତି ଓ ଉପ ରାଷ୍ଟ୍ରପତି ନିର୍ବାଚନ ରହିଛି, ତେଣୁ ବିଜେଡିର ଆବଶ୍ୟକତା ରହିଛି । ନବୀନ ତାଙ୍କର ଶତ୍ରୁ ବୋଲି ବିଜେପି ବିବେଚନା କରିବାକୁ ଚାହିଁବ ନାହିଁ ।
ଇଟିଭି ଭାରତ, ଭୁବନେଶ୍ବର
