କଟକ: ନିର୍ବାଚନ ବିଗୁଲ ବାଜି ସାରିଛି । ହେଲେ ମେଣ୍ଟ ନେଇ ଚିତ୍ର ସ୍ପଷ୍ଟ ହେଉନାହିଁ । ଉଭୟ ଦଳ ପକ୍ଷରୁ ଏହି ପ୍ରସଙ୍ଗକୁ ନେଇ ଯାହା କୁହାଯାଉଛି ତାହା ସମସ୍ତଙ୍କ ମଧ୍ୟରେ ଦ୍ଵନ୍ଦ୍ବ ସୃଷ୍ଟି କରିଛି । ଏଭଳି ସ୍ଥିତିରେ କଂଗ୍ରେସ ପାଇଁ ସୁଯୋଗ ସୃଷ୍ଟି କରିଛି । ତେବେ ରାଜ୍ୟର ସମସ୍ତ ନିର୍ବାଚନ ମଣ୍ଡଳୀରେ ଏବେ ସମାନ ସ୍ଥିତି ଉପୁଜୁଛି । ରାଜ୍ୟରେ ବଳ ଗୋଟାଇବାରେ ଲାଗିଛି କଂଗ୍ରେସ । କିଛି ନିର୍ବାଚନ ମଣ୍ଡଳୀରେ ଯେଉଁଠି କଂଗ୍ରେସର ସ୍ଥିତି ଭଲ ଅଛି, ସେଠାରେ କଂଗ୍ରେସ ନିର୍ବାଚନ ପାଇଁ ନିଜର ପ୍ରସ୍ତୁତକୁ ଜୋରଦାର କରିଲାଣି । ସେଥିରେ କଟକ-ବାରବାଟୀ ନିର୍ବାଚନ ମଣ୍ଡଳୀ ଅନ୍ତର୍ଭୁକ୍ତ ରହିଛି ।
ଏହି ନିର୍ବାଚନ ମଣ୍ଡଳୀରେ ଗତ ନିର୍ବାଚନରେ କଂଗ୍ରେସକୁ ବହୁମତ ମିଳିଥିବା ବେଳେ ଏଥର କିନ୍ତୁ ସ୍ଥିତି ଭିନ୍ନ ରହିଛି । କାରଣ ଏହି ନିର୍ବାଚନ ମଣ୍ଡଳୀରୁ ଦେବାଶିଷ ସାମନ୍ତରାୟଙ୍କୁ ଶାସକ ଦଳ ରାଜ୍ୟସଭାକୁ ପଠାଇଛି । ତେଣୁ ଏଠାରେ ଶାସକ ବିଜେଡି ନୂଆ ପ୍ରାର୍ଥୀ ଦେବ ବୋଲି ସ୍ପଷ୍ଟ ହୋଇଯାଇଛି । ଯାହାକି ମୋକିମଙ୍କ ପାଇଁ ଅନେକ ଚାଲେଞ୍ଜ ସୃଷ୍ଟି କରିପାରେ । ଯଦି ମେଣ୍ଟ ହୁଏ, ତେବେ ବିଜେଡି ବିଜେପି ମଧ୍ୟରୁ ଜଣେ ପାର୍ଥି ହେବେ । ଯାହାଙ୍କର କଂଗ୍ରେସର ମୋକିମଙ୍କ ସହ ଲଢେଇ ହେବ । ଏହା ମୋକିମଙ୍କ ପାଇଁ ବଡ଼ ଚ୍ୟାଲେଞ୍ଜ ବି ସୃଷ୍ଟି କରିପାରେ ବୋଲି ଚର୍ଚ୍ଚା ହେଉଛି ।
ଏହି ପ୍ରସଙ୍ଗକୁ ନେଇ ମୋକିମ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, "ଦୀର୍ଘ ଦିନ ଧରି ସେ ଲୋକଙ୍କ ପାଇଁ କାମ କରିଛନ୍ତି । ମେଣ୍ଟ ହେଲେ ଲୋକ ଯଦି ସମର୍ଥନ କରନ୍ତି, ତେବେ ସେ ବିଜୟୀ ହେବେ । ମେଣ୍ଟ ନ ହେଲେ ମଧ୍ୟ ଲୋକମାନେ ଯଦି ସମର୍ଥନ ନ କରନ୍ତି ତେବେ ଜିତିବା ସମ୍ଭବ ନୁହେଁ ।" ତେଣୁ ମେଣ୍ଟ ହେଲେ ତାଙ୍କ ଉପରେ କୌଣସି ପ୍ରଭାବ ପଡିବ ନାହିଁ ବୋଲି ମୋକିମ କହିଛନ୍ତି । ସେ ଆହୁରି କହିଛନ୍ତି ଯେ, ସେ ଜିତିବା କାରଣରୁ କଟକରେ ଅନେକ ଉନ୍ନତି ମୂଳକ କାର୍ଯ୍ୟ ହେଉଛି । ଏହି ସବୁ ଉନ୍ନତିମୂଳକ କାର୍ଯ୍ୟ ଦ୍ବାରା ସାଧାରଣ ଲୋକ ଉପକୃତ ହେଉଛନ୍ତି । ଯାଇକା ପ୍ରକଳ୍ପ, ବକ୍ସ ଡ୍ରେନ କାର୍ଯ୍ୟ, ପେଟାନାଳ କାର୍ଯ୍ୟଠାରୁ ବସଷ୍ଟାଣ୍ଡ କାମ ସବୁ କିଛି ସମ୍ଭବ ହୋଇଛି ବୋଲି ମୋକିମ କହିଛନ୍ତି । ହେଲେ ଆବଶ୍ୟକୀୟ ସ୍ଥାନରୁ ବସ୍ ଚଳାଚଳ ସୁବିଧା ନଥିବାରୁ ବସ ଟର୍ମିନାଲ ଉଦଘାଟନରେ ଯୋଗ ଦେଇନଥିବା କହିଛନ୍ତି ମୋକିମ ।
ଇଟିଭି ଭାରତ, କଟକ
