ହାଇଦ୍ରାବାଦ: ନିର୍ବାଚନ ଆରମ୍ଭରୁ ବିଭିନ୍ନ କାର୍ଯ୍ୟକଳାପ ପାଇଁ ବିବାଦ ଓ ଚର୍ଚ୍ଚାରେ ରହିଆସିଥିବା ଭାରତୀୟ ଜନତା ପାର୍ଟିର ହାଇଦ୍ରାବାଦ ସାଂସଦ ପ୍ରାର୍ଥୀ ମାଧବିଲତାଙ୍କ ନାମରେ ରୁଜୁ ହେଲା ମାମଲା । ମତଦାନ କେନ୍ଦ୍ରରେ କିଛି ବୁର୍ଖା ପରିହିତ ମୁସଲିମ ମହିଳାଙ୍କୁ ଭୋଟ ପରିଚୟ ପତ୍ର ସହ ସେମାନଙ୍କ ବୁର୍ଖା ଖୋଲି ମାଧବିଲତା ଯାଞ୍ଚ କରିଥିବା ଅଭିଯୋଗ ହୋଇଥିଲା । ଯାହାର ଭିଡିଓ ଭାଇରାଲ ହେବା ପରେ ବିବାଦ ଆରମ୍ଭ ହୋଇଥିଲା । ତେବେ ପୋଲିସ ତାଙ୍କ ବିରୋଧରେ ମାମଲା ରୁଜୁ କରିଥିବା ସୂଚନା ମିଳିଛି । ଏନେଇ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଥିବା ବେଳେ ମାଧବିଲତାଙ୍କ ପ୍ରତିକ୍ରିୟା ସାମ୍ନାକୁ ଆସିଛି ।
‘ଏଆଇଏମଆଇଏମ’ ମୁଖ୍ୟ ତଥା ବର୍ତ୍ତମାନର ହାଇଦ୍ରାବାଦ ସାଂସଦ ଅସଦୁଦ୍ଦିନ ଓଓ୍ବେସୀଙ୍କ ବିରୋଧରେ ପ୍ରାର୍ଥୀ ହୋଇଛନ୍ତି ମାଧବିଲତା । ତେବେ ଆଜି ହାଇଦ୍ରାବାଦରେ ଭୋଟିଂ ହେଉଛି । ଆଜି ପୂର୍ବାହ୍ନରେ ନିର୍ବାଚନ ମଣ୍ଡଳୀ ଅନ୍ତର୍ଗତ ଏକ ବୁଥରେ ପହଞ୍ଚିଥିଲେ ମାଧବିଲତା । ସେଠାରେ କିଛି ମୁସଲିମ ମହିଳା ବୁର୍ଖା ପରିଧାନ କରି ମତଦାନ କରିବା ପାଇଁ ଅପେକ୍ଷା କରିଥିଲେ । ମାଧବି ସେମାନଙ୍କ ଭୋଟର କାର୍ଡ ଯାଞ୍ଚ କରିବା ସହ ପରିଚୟ ସ୍ପଷ୍ଟ କରିବା ପାଇଁ ସେମାନଙ୍କୁ ବୁର୍ଖା ଖୋଲିବା ପାଇଁ କହିଥିଲେ । ଯାହାର ଭିଡିଓ ଭାଇରାଲ ହୋଇଥିଲା । ବିରୋଧୀମାନେ ମାଧବିଙ୍କ ବିରୋଧରେ ମାମଲା ରୁଜୁ କରିବା ପାଇଁ ଦାବି କରିଥିଲେ । ଅପରାହ୍ନରେ ମାଧବିଙ୍କ ବିରୋଧରେ ଆଇପିସିର ଧାରା 171-C, 186, 505 (1) (C) ଏବଂ ‘ଜନପ୍ରତିନିଧୀ ଅଧିନିୟମ’ର ଧାରା 132 ଅନୁଯାୟୀ ହାଇଦ୍ରାବାଦର ମାଲକପେଟ ପୋଲିସ ଷ୍ଟେସନରେ ଏକ ମାମଲା ପଞ୍ଜିକୃତ ହୋଇଛି ।
ପୂର୍ବରୁ ମଧ୍ୟ ମାଧବି ଅନ୍ୟ କିଛି ଘଟଣାରେ ବିବାଦ ଘେରକି ଆସିସାରିଛନ୍ତି । ନିର୍ବାଚନୀ ପ୍ରଚାର ସମୟରେ ଏକ ମସଜିଦକୁ ତୀର ମାରିବା ମୁଦ୍ରାରେ ତାଙ୍କୁ ଦେଖାଯିବା ପରେ ବିବାଦ ଆରମ୍ଭ ହୋଇଥିଲା । ଏହା ସାମ୍ପ୍ରଦାୟିକ ସଦଭାବନା ନଷ୍ଟ କରିବା ଓ ତିକ୍ତତା ସୃଷ୍ଟି କରିବା ପରି କାର୍ଯ୍ୟକଳାପ ବୋଲି ବିରୋଧୀ ଅଭିଯୋଗ କରିଥିଲେ । ଅଭିଯୋଗକୁ ବିଜେପି ଖଣ୍ଡନ କରିଥିଲେ । ଏବେ ମାଧବିଙ୍କ ବିରୋଧରେ ମାମଲା ରୁଜୁ କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
