ଭୁବନେଶ୍ବର: ଓଡ଼ିଶାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆଜିଠାରୁ ଦୁଇ ଦିନିଆ ଗସ୍ତରେ ଓଡ଼ିଶା ଆସିଛନ୍ତି ପ୍ରଧାନମନ୍ତ୍ରୀ । ସନ୍ଧ୍ୟାରେ ରାଜ୍ୟ ବିଜେପି କାର୍ଯ୍ୟାଳୟରେ ଦଳୀୟ ଶୀର୍ଷ ନେତୃତ୍ବଙ୍କ ସହ କରିବେ ସମୀକ୍ଷା ବୈଠକ । ବୈଠକ ପରେ ରାଜଭବନରେ ରାତ୍ରି ଯାପନ କରିବେ ପ୍ରଧାନମନ୍ତ୍ରୀ । ଆସନ୍ତାକାଲି ପୁରୀ ଗସ୍ତରେ ଯିବେ । ସେଠାରେ ମହାପ୍ରଭୁଙ୍କ ଦର୍ଶନ ପରେ ମେଗା ରୋଡ ସୋ' କରି ଦଳ ପାଇଁ ପ୍ରଚାର କରିବେ ପ୍ରଧାନମନ୍ତ୍ରୀ । ଏହାପରେ ଅନୁଗୋଳ ଏବଂ କଟକରେ ଦଳର ବିଜୟ ସଂକଳ୍ପ ସମାବେଶରେ ଯୋଗ ଦେବେ ।
ଚଳିତ ନିର୍ବାଚନରେ ଓଡ଼ିଶାକୁ ସ୍ବତନ୍ତ୍ର ଫୋକସରେ ରଖି ବିଜେପିର କେନ୍ଦ୍ର ନେତୃତ୍ବ ଘନ ଘନ ଓଡ଼ିଶା ଗସ୍ତରେ ଆସୁଥିବାବେଳେ ଆଜି ପୁଣି ଦୁଇ ଦିନିଆ ଓଡ଼ିଶା ଗସ୍ତରେ ଆସିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଚଳିତ ମାସରେ ଏହା ପ୍ରଧାନମନ୍ତ୍ରୀଙ୍କ ତୃତୀୟ ଓଡ଼ିଶା ଗସ୍ତ । ସ୍ଵତନ୍ତ୍ର ବିମାନ ଯୋଗେ ସନ୍ଧ୍ୟା ୬ଟା ୧୬ ମିନିଟରେ ଭୁବନେଶ୍ଵର ବିମାନବନ୍ଦରରେ ପହଞ୍ଚିଥିଲେ ମୋଦି । ସେଠାରୁ ପୂର୍ବ ନିର୍ଦ୍ଧାରିତ ରୁଟ୍ ଏଜି ଛକ, ପିଏମ୍ଜି, ମାଷ୍ଟରକ୍ୟାଣ୍ଟିନ ଦେଇ ଦଳୀୟ କାର୍ଯ୍ୟାଳୟରେ ପହଞ୍ଚିଛନ୍ତି ପ୍ରଧାନମନ୍ତ୍ରୀ । ବିଜେପି ରାଜ୍ୟ କାର୍ଯ୍ୟାଳୟରେ ମୋଦି ଦଳୀୟ ନେତାଙ୍କ ସହିତ ସମୀକ୍ଷା ବୈଠକ କରିବେ ।
ଚଳିତ ନିର୍ବାଚନରେ ଦଳର ରଣନୀତି ଗ୍ରାଉଣ୍ଡରେ କିପରି କାର୍ଯ୍ୟକାରୀ ହେଉଛି, ବିଶେଷ କରି ନିର୍ବାଚନ ପରିଚାଳନା ଉପରେ ଦଳୀୟ ନେତାଙ୍କ ସହ ସିଧା ସଳଖ ଆଲୋଚନା କରିବେ ପ୍ରଧାନମନ୍ତ୍ରୀ । ଏହି ବୈଠକରେ ରାଜ୍ୟ ବିଜେପିର ଶୀର୍ଷ ନେତା ଏବଂ ଦାୟିତ୍ବରେ ଥିବା ନିର୍ବାଚନ ପରିଚାଳନା ଦାୟିତ୍ଵରେ ଥିବା କେନ୍ଦ୍ରୀୟ ନେତାମାନେ ଉପସ୍ଥିତ ରହିବେ । ଏହି ବୈଠକ ପରେ ରାଜଭବନ ଯାଇ ରାତ୍ରି ଯାପନ କରିବେ ପ୍ରଧାନମନ୍ତ୍ରୀ । ଆସନ୍ତାକାଲି ପୁରୀ ଗସ୍ତରେ ଯିବେ ମୋଦି । ସେଠାରେ ମହାପ୍ରଭୁଙ୍କୁ ଦର୍ଶନ କରିବା ପରେ ମେଗା ରୋଡ ସୋ' କରି ଦଳ ପାଇଁ ପ୍ରଚାର କରିବେ । ଏହାପରେ ଅନୁଗୋଳ ଏବଂ କଟକରେ ଦଳର ବିଜୟ ସଂକଳ୍ପ ସମାବେଶରେ ଯୋଗ ଦେବେ ମୋଦି ।
ଇଟିଭି ଭାରତ, ଭୁବନେଶ୍ବର
