ହାଇଦ୍ରାବାଦ/ଭୁବନେଶ୍ବର: ରାଜ୍ୟରେ ଗତ ଦୁଇଟି ପର୍ଯ୍ୟାୟରେ 9ଟି ଲୋକସଭା ଆସନରେ ଭୋଟିଂ ଶେଷ ହୋଇଛି । ଆସନ୍ତାକାଲି (ଶନିବାର,25 ତାରିଖ)ରେ ତୃତୀୟ ପର୍ଯ୍ୟାୟରେ 6 ଆସନରେ ଭୋଟିଂ ହେବାକୁ ଯାଉଛି । ତେବେ ପୂର୍ବ ଦୁଇ ପର୍ଯ୍ୟାୟ ଠାରୁ ଅଧିକ ଚିତାକର୍ଷକ ଓ ସମ୍ମାନର ଲଢେଇ ଦେଖିବାକୁ ଯାଉଛି ଏହି ପର୍ଯ୍ୟାୟ । କାରଣ ରାଜ୍ୟ ରାଜଧାନୀ ଭୁବନେଶ୍ବରରୁ ନେଇ ପଶ୍ଚିମ ଓଡିଶାର ଚର୍ଚ୍ଚିତ ଆସନ ସମ୍ବଲପୁର, ପୁରୁଣା ରାଜଧାନୀ କଟକ ଓ ରାଜ୍ୟର ଆଧ୍ୟାତ୍ମିକ ପ୍ରାଣକେନ୍ଦ୍ର ପୁରୀରେ ଏହି ପର୍ଯ୍ୟାୟରେ ଭୋଟ ହେବାକୁ ଯାଉଛି । ଏହି ସମସ୍ତ ଆସନରେ ବିଜେଡି ଓ ବିଜେପି ମଧ୍ୟରେ ସିଧା ଓ ‘କର ବା ମର’ର ଲଢେଇ ହେଉଛି । ଦୁଇ ଦଳ ଅନେକ ପ୍ରମୁଖ ନେତାଙ୍କୁ ଗ୍ରାଉଣ୍ଡକୁ ଓହ୍ଲାଇଛନ୍ତି । ହାଇପ୍ରୋଫାଇଲ ଆସନକୁ ହେଭିଓ୍ବେଟ ପ୍ରାର୍ଥୀଙ୍କୁ ନେଇ ଏହି ପର୍ଯ୍ୟାୟ ଚଳିତ ନିର୍ବାଚନର ସବୁଠୁ ତୀବ୍ର ପ୍ରତିଦ୍ବନ୍ଦ୍ବିତାମୂଳକ ହେବାକୁ ଯାଉଛି ।
ଏହି ପର୍ଯ୍ୟାୟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ଦାସ ଓରଫ ବବି, ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ, ବିଜେଡିରୁ ଇସ୍ତଫା ଦେଇ ପଦ୍ମ ଧରିଥିବା ବରିଷ୍ଠ ରାଜନେତା ତଥା ଦୀର୍ଘ 6 ଥରର ସାଂସଦ ଭର୍ତ୍ତୃହରି ମହତାବ, ବିଜେପିର ରାଷ୍ଟ୍ରୀୟ ପ୍ରବକ୍ତା ସମ୍ବିତ ପାତ୍ର, ଅରୂପ ପଟ୍ଟନାୟକ ପ୍ରମୁଖ ଗ୍ରାଉଣ୍ଡରେ ରହିଛନ୍ତି । ଭୁବନେଶ୍ବର, ପୁରୀ, କଟକ ଓ ସମ୍ବଲପୁର ପରି ହାଇ ପ୍ରୋଫାଇଲ ଆସନରେ ବହୁ ବରିଷ୍ଠ ନେତାଙ୍କ ସହ ଏଥର ନବାଗତଙ୍କ ଫାଇଟ ମଧ୍ୟ ହେଉଛି । ତେବେ ଉଭୟ ଦଳ ବିଜେପି ଓ ବିଜେଡି ପାଇଁ ଏହି ସମସ୍ତ 6 ଆସନ ରାଜନୈତିକ ପତିଆରା ଓ ସମ୍ମାନ ଦୃଷ୍ଟିରୁ ବେଶ ଆହ୍ବାନପୂର୍ଣ୍ଣ ରହିଛି ।
ସମ୍ବଲପୁର ଲୋକସଭା ଆସନ:
ପଶ୍ଚିମ ଓଡିଶାର ମୁଖ୍ୟ ସହର ସମ୍ବଲପୁର ସଂସଦୀୟ କ୍ଷେତ୍ର ଚଳିତ ନିର୍ବାଚନରେ ସର୍ବାଧିକ ଚର୍ଚ୍ଚାରେ ରହିଛି । କାରଣ ଗତଥର ବିଜେପି ଦଖଲରେ ଥିବା ଏହି ଆସନରେ ଦଳର ରାଜ୍ୟର ବଡ ଚେହେରା କୁହାଯାଉଥିବା ତଥା କେନ୍ଦ୍ରରେ ମୋଦି କ୍ୟାବିନେଟରେ ଏକାଧିକ ଗୁରୁ ମନ୍ତ୍ରଣାଳୟ ସମ୍ଭାଳିଥିବା ଧର୍ମେନ୍ଦ୍ର ପ୍ରଧାନ ଏଥର ନିର୍ବାଚନ ଲଢୁଛନ୍ତି । ପ୍ରାୟ ଦଶନ୍ଧି ପରେ ଲୋକସଭା ଲଢେଇକୁ ଓହ୍ଲାଇଥିବା ଧର୍ମେନ୍ଦ୍ରଙ୍କ ବିରୋଧରେ ବିଜେଡି ମଧ୍ୟ ଟାଣୁଆ ପ୍ରାର୍ଥୀ ଲଢେଇବାର କୌଣସି ଅବସର ଛାଡିନି । ଦଳର ପାଓ୍ବାରଫୁଲ ନେତା କୁହାଯାଉଥିବା ତଥା ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ (ବବି) ଧର୍ମେନ୍ଦ୍ରଙ୍କ ବିରୋଧରେ ମୁକାବିଲା କରୁଛନ୍ତି । ଏହା ବବିଙ୍କ ପ୍ରଥମ ସଂସଦୀୟ ମୁକାବିଲା ହେବାକୁ ଯାଉଛି । ହେଲେ ଉପକୂଳର ନେତା ବବି ପଶ୍ଚିମରେ ଧରେନ୍ଦ୍ରଙ୍କୁ କିପରି ମାତ ଦେବେ ତାହା ସମୟ କହିବ । ତଥାପି ଏହି ଆସନରେ ଉଭୟ ଦଳର ପ୍ରଭାବ ଓ ସ୍ଥିତି ବେଶ ଭଲ ଥିବାରୁ ଏକ ଚିତାକର୍ଷକ ଲଢେଇ ସ୍ପଷ୍ଟ । ଏହି ଆସନ ଉଭୟ ବିଜେପି ଓ ବିଜେଡି ପାଇଁ ସମ୍ମାନର ପ୍ରଶ୍ନ ସାଜିଛି । ଅନ୍ୟପଟେ କଂଗ୍ରେସ ମୁଖ୍ୟ ପ୍ରତିଦ୍ବନ୍ଦ୍ବିତାରେ ନାହିଁ କହିଲେ ମଧ୍ୟ ଅତୁକ୍ତି ହେବ ନାହିଁ । ଦଳ ଏଥର ନଗେନ୍ଦ୍ର ପ୍ରଧାନଙ୍କୁ ନିର୍ବାଚନୀ ରଣାଙ୍ଗନରେ ଯୋଦ୍ଧା ସଜାଇଛି । ହେଲେ ସିଧା ଟକ୍କର ଧର୍ମେନ୍ଦ୍ର ଓ ବବିଙ୍କ ମଧ୍ୟରେ ହେଉଛି ।
ଭୁବନେଶ୍ବର ଲୋକସଭା ଆସନ:
ଗତଥର ବିଜେପି ଦଖଲରେ ଥିବା ରାଜ୍ୟ ରାଜଧାନୀ ଭୁବନେଶ୍ବରରେ ଏଥର ମଧ୍ୟ କଡା ଫାଇଟ । ସାଂସଦ ଅପରାଜିତାଙ୍କୁ ବିଜେପି ପୁଣି ଥରେ ପ୍ରାର୍ଥୀ କରିଥିବା ବେଳେ ବିଜେଡି ବରିଷ୍ଠ ପୂର୍ବତନ କଂଗ୍ରେସ ନେତା ସୁର ରାଉତରାୟଙ୍କ ସାନ ପୁଅ ମନ୍ମଥ ରାଉତରାୟଙ୍କୁ ପ୍ରାର୍ଥୀ କରିଛି । ଭାରତୀୟ ପ୍ରଶାସନିକ ସେବାରୁ ଆସି ରାଜନୀତିରେ ପ୍ରବେଶ କରି ସାଂସଦ ହୋଇଥିବା ଅପରାଜିତାଙ୍କୁ ଟକ୍କର ଦେଉଛନ୍ତି ପାଇଲଟରୁ ରାଜନୀତିରେ ଲ୍ୟାଣ୍ଡିଂ କରିଥିବା ତରୁଣ ମନ୍ମଥ । ଗତଥର ଏହି ଆସନରେ ବିଜେଡି ପ୍ରାର୍ଥୀ ଅରୂପ ପଟ୍ଟନାୟଙ୍କ ଠାରୁ ମାତ୍ର କିଛି ବ୍ୟବଧାନରେ ବିଜୟୀ ହୋଇଥିଲେ ଅପରାଜିତା । ତେଣୁ ଏଥର ବିଜେଡି ପ୍ରାର୍ଥୀ ମନ୍ମଥ ରାଉତରାୟଙ୍କ ବାପା ତଥା କଂଗ୍ରେସର ପୂର୍ବତନ ଟାଣୁଆ ନେତା ସୁର ରାଉତରାୟଙ୍କ ପକେଟ ଭୋଟ ଭୁବନେଶ୍ବର ସଂସଦୀୟ ରାଜନୀତି ଗଣିତକୁ ପ୍ରଭାବିତ କରିବାର ଯଥେଷ୍ଟ ସମ୍ଭାବନା ରହିଛି । ସୁରଙ୍କ ଭୋଟ ଓ ବିଜେଡିର ଦଳୀୟ ଭୋଟ ମନ୍ମଥଙ୍କୁ ଅପରାଜିତାଙ୍କ ବିରୋଧରେ ବିଜୟୀ କରିବ ବୋଲି ବିଜେଡି ଆଶା ବାନ୍ଧିଥିବା ବେଳେ ଅପରାଜିତା ମଧ୍ୟ ପୂର୍ବ ବିଜୟ ଧାରା ବଜାୟ ରଖିବାକୁ ଆଶାବାଦୀ । ପ୍ରଧାନମନ୍ତ୍ରୀ ମୋଦି, ବିଜେପି ଅଧ୍ୟକ୍ଷ ଜେପି ନଡ୍ଡା ପ୍ରମୁଖ ମଧ୍ୟ ରାଜଧାନୀରେ ରୋଡ ସୋ କରି ଅପରାଜିତାଙ୍କ ପାଇଁ ଭୋଟ ମାଗିଛନ୍ତି । ଅନ୍ୟପଟେ କଂଗ୍ରେସ ଏଥର ଯୁବ ଚେହେରା ୟାସିର ନଓ୍ବାଜଙ୍କୁ ନିର୍ବାଚନ ଲଢାଉଛି । ୟାସିର ଏବେ ଛାତ୍ର କଂଗ୍ରେସ ରାଜ୍ୟ ସଭାପତି ରହିଛନ୍ତି ।
ପୁରୀ ଲୋକସଭା ଆସନ:
ରାଜ୍ୟର ଆଧ୍ୟାତ୍ମିକ ରାଜଧାନୀ ପୁରୀ ଏହି ପର୍ଯ୍ୟାୟରେ ଭୋଟ ଦେବାକୁ ଯାଉଛି । ଗତଥର ଏହି ଆସନ ବିଜେଡି ଖାତାରେ ଥିବା ବେଳେ ଦଳ କିନ୍ତୁ ଏଥର ପ୍ରାର୍ଥୀ ପରିବର୍ତ୍ତନ କରିଛି । ଏଥର ଓକିଲଙ୍କ ସ୍ଥାନ ନେଇଛନ୍ତି ପୋଲିସ । ବର୍ତ୍ତମାନର ସାଂସଦ ପିନାକୀ ମିଶ୍ରଙ୍କ ସ୍ଥାନରେ ଗତଥର ଭୁବନେଶ୍ବରର ଆସନରୁ ପରାଜିତ ହୋଇଥିବା ପୂର୍ବ ଆଇପିଏସ ଅଧିକାରୀ ଅରୂପ ପଟ୍ଟନାୟକଙ୍କୁ ଦଳ ପ୍ରାର୍ଥୀ କରିଛି । ବିଜେପି କିନ୍ତୁ ପ୍ରାର୍ଥୀ ଅପରିବର୍ତ୍ତିତ ରଖିଛି । ଦଳର ରାଷ୍ଟ୍ରୀୟ ପ୍ରବକ୍ତା ସମ୍ବିତ ପାତ୍ର ପୂର୍ବଥର ପରି ଏଥର ମଧ୍ୟ ପ୍ରାର୍ଥୀ ହୋଇଛନ୍ତି । ନିଜେ ପ୍ରଧାନମନ୍ତ୍ରୀ ମୋଦି ପୁରୀରେ ରୋଡ ସୋ’ କରିବା ସହ ସମ୍ବିତଙ୍କ ପାଇଁ ଭୋଟ ମାଗିଛନ୍ତି । ଶ୍ରୀମନ୍ଦିର ରତ୍ନଭଣ୍ଡାର ଚାବି ହଜିବା ମାମଲା, ଚାରିଦ୍ବାର ବନ୍ଦ ପରି ସମ୍ବେଦନଶୀଳ ପ୍ରସଙ୍ଗକୁ ନେଇ ବିଜେଡିକୁ କ୍ରମାଗତ ଟାର୍ଗେଟ କରିବାରେ ଲାଗିଛି ବିଜେପି । ତେବେ କଂଗ୍ରେସ ପ୍ରାର୍ଥୀ ପରିବର୍ତ୍ତନ କରି ଜୟନାରାୟଣ ପଟ୍ଟନାୟକଙ୍କୁ ଟିକେଟ ଦେଇଛି ।
କଟକ ଲୋକସଭା ଆସନ:
ରାଜ୍ୟର ପୁରୁଣା ରାଜଧାନୀ ସିଲିଭର ସିଟି କଟକରେ ଏଥର ରାଜନୀତି ପାଣିପାଗ ଗତ ନିର୍ବାଚନ ତୂଳନାରେ ସମ୍ପୂର୍ଣ୍ଣ ଭିନ୍ନ । ବିଜେଡି ଟିକେଟରେ 6 ଥର ସାଂସଦ ହୋଇଥିବା ପୂର୍ବତନ ମୁଖ୍ୟମନ୍ତ୍ରୀ ହରେକୃଷ୍ଣ ମହତାବଙ୍କ ପୁଅ ଭର୍ତ୍ତୃହରି ମହତାବ ବିଜେଡିରୁ ଇସ୍ତଫା ଦେଇ ବିଜେପି ଟିକେଟରେ ଲଢୁଛନ୍ତି । ତାଙ୍କ ବିରୋଧରେ ବିଜେଡି ଜଣେ ନବାଗତଙ୍କୁ ପ୍ରାର୍ଥୀ କରିଛି । କର୍ପୋରେଟ ଜଗତରୁ ରାଜନୀତିକୁ ଆସିଥିବା ସଂତୃପ୍ତ ମିଶ୍ର ଅନୁଭବୀ ଭତୃହରିଙ୍କ ବିପକ୍ଷରେ ଛିଡା ହୋଇଛନ୍ତି । ଗୋଟିଏ ପଟେ କଟକରେ ବିଜେଡିର ଦଳୀୟ ହାଓ୍ବା ଥିବା ବେଳେ ଭର୍ତ୍ତୃହରିଙ୍କର ଲୋକପ୍ରିୟତା ମଧ୍ୟ ରହିଛି । ତେଣୁ ଉଭୟ ଭର୍ତ୍ତୃ ଓ ସଂତୃପ୍ତଙ୍କ ମଧ୍ୟରେ କଡା ଟକ୍କର ହେଉଛି । କଂଗ୍ରେସ ଏଠାରେ ସୁରେଶ ମହାପାତ୍ରଙ୍କୁ ମୈଦାନକୁ ଓହ୍ଲାଇଛି ।
କେନ୍ଦୁଝର ଲୋକସଭା ଆସନ:
1998 ରୁ 2004 ପର୍ଯ୍ୟନ୍ତ ଭାରତୀୟ ଜନତା ପାର୍ଟି ଦଖଲରେ ଥିଲା କେନ୍ଦୁଝର ସଂସଦୀୟ ଆସନ । 2004ରେ ଏହାକୁ ଦଖଲକୁ ନେବାରେ ସଫଳ ହେଲା ବିଜେଡି । 2009, 2014 ଓ 2019 ସାଧାରଣ ନିର୍ବାଚନରେ ବିଜୁ ଜନତା ଦଳ ଏଠାରେ ହ୍ୟାଟ୍ରିକ ବିଜୟ ହାସଲ କରିଛି । ଗତଥର ଏହି ଆସନରୁ ବିଜେଡି ପ୍ରାର୍ଥିନୀ ଚନ୍ଦ୍ରାଣୀ ମୁର୍ମୁ ଦେଶର ସର୍ବକନିଷ୍ଠ ସାଂସଦ ଭାବେ ଦିଲ୍ଲୀ ଦରବାରରେ ପହଞ୍ଚିଥିଲେ । ଏଥର ବିଜେଡି ଚନ୍ଦ୍ରାଣୀଙ୍କ ସ୍ଥାନରେ ଧନୁର୍ଯ୍ୟୟ ସିଦ୍ଧୁଙ୍କୁ ପ୍ରାର୍ଥୀ କରିଛି । ସେହିପରି ବିଜେପି ପୂର୍ବତନ ସାଂସଦ ତଥା ଗତଥରର ପ୍ରାର୍ଥୀ ଅନନ୍ତ ନାୟକଙ୍କୁ ପୁଣି ଥରେ ଟିକଟ ଦେଇଛି । ଅନନ୍ତ ଚନ୍ଦ୍ରାଣୀଙ୍କ ଠାରୁ ପରାସ୍ତ ହୋଇଥିଲେ । କଂଗ୍ରେସରୁ ବିନୋଦ ବିହାରୀ ନାୟକ ପ୍ରାର୍ଥୀ ହୋଇଛନ୍ତି । ଏହି ଆସନରେ କେନ୍ଦୁଝରର 6ଟି ଓ ମୟୂରଭଞ୍ଜର ଗୋଟିଏ ବିଧାନସଭା ଆସନ ରହିଛି । ଏଠାରେ ଆଦିବାସୀ ଭୋଟ ମଧ୍ୟ ଫଳାଫଳକୁ ବେଶ ପ୍ରଭାବିତ କରିବାର ଯଥେଷ୍ଟ ସମ୍ଭାବନା ରହିଛି ।
ଢେଙ୍କାନାଳ ଲୋକସଭା ଆସନ:
ଗତଥର ଏହି ଆସନରେ ବିଜେଡି ବିଜୟୀ ହୋଇଥିଲା । ଏଥର ସାଂସଦ ମହେଶ ସାହୁଙ୍କୁ ଦଳ ଟିକେଟ ନଦେଇ ତାଙ୍କ ସ୍ଥାନରେ ଯୁବ ଚେହେରା ଡାକ୍ତର ଅବିନାଶ ସାମଲଙ୍କୁ ପ୍ରାର୍ଥୀ କରିଛି । ହେଲେ ବିଜେପି ପୁଣି ଥରେ ଅନୁଭବୀ ରୁଦ୍ର ନାରାୟଣ ପାଣିଙ୍କୁ ମୈଦାନକୁ ଓହ୍ଲାଇଛି । ଏଥର ସେଠାରେ ବିଜେପି ଜିତିବା ନେଇ ଆଶାବାଦୀ, ହେଲେ ପୂର୍ବ ଧାରା ଦୋହରାଇବା ଲକ୍ଷ୍ୟରେ ଶାସକ ବିଜେଡି ମଧ୍ୟ ନିର୍ବାଚନ ଲଢୁଛି । କଂଗ୍ରେସରୁ ମହିଳା ଚେହେରା ସସ୍ମିତା ବେହେରା ଗ୍ରାଉଣ୍ଡରେ ରହିଛନ୍ତି ।
ରାଜ୍ୟରେ ଚଳିତ ପର୍ଯ୍ୟାୟଙ୍କୁ ମିଶାଇଲେ 3 ପର୍ଯ୍ୟାୟରେ 15 ସଂସଦୀୟ ଆସନରେ ମତଦାନ ଶେଷ ହେବ । ବିଜେଡି ଗତଥର 12 ସଂସଦୀୟ ଆସନ ଜିତିଥିବା ବେଳେ ଏଥର ମଧ୍ୟ ତା’ ଠାରୁ ଭଲ ପ୍ରଦର୍ଶନ କରିବ ବୋଲି ଆଶା ରଖିଛି । ମାତ୍ର 400 ପାରର ନାରା ସହ ନିର୍ବାଚନ ଲଢୁଥିବା ଭାରତୀୟ ଜନତା ପାର୍ଟି ମଧ୍ୟ ଏଥର ପୂର୍ବାପେକ୍ଷା ଅଧିକ ଆକ୍ରମଣାତ୍ମକ ଭୂମିକାରେ ଥିବା ସ୍ପଷ୍ଟ ଦୃଶ୍ୟମାନ ହେଉଛି । ଉଭୟ ଲୋକସଭା ସହ ବିଧାନସଭା ନିର୍ବାଚନରେ ମଧ୍ୟ ଭାରତୀୟ ଜନତା ପାର୍ଟି ବହୁମତ ହାସଲ କରି ସରକାର ଗଠନ କରିବାକୁ ଦୃଢୋକ୍ତି ଦେଖାଉଛି । ନିଜେ ପ୍ରଧାନମନ୍ତ୍ରୀ ମୋଦି ମଧ୍ୟ ଏକାଧିକ ସଭାରେ ଦଳୀୟ ସରକାରର ଶପଥ ଗ୍ରହଣ ତାରିଖ ମଧ୍ୟ ଘୋଷଣା କରିସାରିଛନ୍ତି । ବିଜେପି ଏଥର ନିଶ୍ଚିତ ପରିବର୍ତ୍ତନର କଥା କହୁଥିବା ବେଳେ ରାଜ୍ୟରେ କୌଣସି ପ୍ରଭାବ ପଡିବ ନାହିଁ ବୋଲି ବିଜେଡି କହୁଛି । ଏସବୁ ମଧ୍ୟରେ ରାଜ୍ୟରେ ବିଜେପି ଡବଲ ଇଞ୍ଜିନ ସରକାର ଗଢିବ, ନା ନବୀନ ଷଷ୍ଠ ଥର ମୁଖ୍ୟମନ୍ତ୍ରୀ ହୋଇ ଭାରତୀୟ ରାଜନୀତିରେ ବିରଳ ରେକର୍ଡର ଅଧିକାରୀ ହେବେ, ତାହା ତ ଜୁନ 4 ତାରିଖରେ ଜଣାପଡିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
