ଭୁବନେଶ୍ବର: ବହୁପ୍ରତୀକ୍ଷାର ଘଟିଛି ଅନ୍ତ । ଶେଷରେ ଘୋଷଣା ହୋଇଛି ମୁଖ୍ୟମନ୍ତ୍ରୀଙ୍କ ନାଁ । କେନ୍ଦୁଝର ସଦର ବିଧାୟକ ମୋହନ ଚରଣ ମାଝୀଙ୍କ ନାଁ ରେ ବାଜିଛି ମୋହର । ଓଡିଶାରେ ବିଜେପିର ପ୍ରଥମ ମୁଖ୍ୟମନ୍ତ୍ରୀ ହୋଇଛନ୍ତି ମୋହନ ଚରଣ ମାଝୀ । କେନ୍ଦୁଝର ସଦର ବିଧାୟକ ମୋହନ ଚରଣ ମାଝୀ ମୁଖ୍ୟମନ୍ତ୍ରୀ ଭାବେ ସର୍ବସମ୍ମତି କ୍ରମେ ଚୟନ ହୋଇଛନ୍ତି । ସେହିଭଳି ଦୀର୍ଘ ୨୫ ବର୍ଷ ପରେ ଓଡିଶା ଦେଖିବାକୁ ଯାଉଛି ଉପମୁଖ୍ୟମନ୍ତ୍ରୀ । ଜଣେ ନୁହେଁ ବରଂ ଦୁଇ ଜଣ ହୋଇଛନ୍ତି ଉପମୁଖ୍ୟମନ୍ତ୍ରୀ । ପାଟଣାଗଡ଼ ବିଧାୟକ କନକ ବର୍ଦ୍ଧନ ସିଂ ଦେଓ ଓ ନିମାପଡା ବିଧାୟିକା ପ୍ରଭାତୀ ପରିଡ଼ାଙ୍କ ନାଁ ଉପମୁଖ୍ୟମନ୍ତ୍ରୀ ଭାବେ ଘୋଷଣା ହୋଇଛି ।
କେନ୍ଦ୍ରୀୟ ପର୍ଯ୍ୟବେକ୍ଷକ କେନ୍ଦ୍ରମନ୍ତ୍ରୀ ରାଜନାଥ ସିଂ ଏ ସମ୍ପର୍କରେ ଘୋଷଣା କରିଛନ୍ତି । ସେ କହିଛନ୍ତି, "ବିଧାୟକ ଦଳ ବୈଠକରେ ମୋହନ ମାଝୀଙ୍କ ନାଁ ମୁଖ୍ୟମନ୍ତ୍ରୀ ଭାବେ ପ୍ରସ୍ତାବ ଦିଆଯାଇଥିଲା । ସୁରମା ପାଢୀ, ରବି ନାଏକ , ପୃଥ୍ବୀରାଜ ହରିଚନ୍ଦନ ପ୍ରମୁଖ ଏହାକୁ ସମର୍ଥନ କରିଥିଲେ । ଉପସ୍ଥିତ ସମସ୍ତ ବିଧାୟକ ତାଳି ବଜାଇ ଏହାକୁ ସମର୍ଥନ କରିଥିଲେ । ସେହିଭଳି ନୂତନ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରି କେଭି ସିଂ ଦେଓ ଓ ପ୍ରଭାତୀ ପରିଡାଙ୍କ ନାଁ ଉପମୁଖ୍ୟମନ୍ତ୍ରୀ ଭାବେ ଘୋଷଣା କରାଯାଉଛି ।"
ଏହା ମଧ୍ୟ ପଢନ୍ତୁ ... ମୋହନ ମାଝୀ ଓଡ଼ିଶାର ନୂଆ ମୁଖ୍ୟମନ୍ତ୍ରୀ; କେଭି ସିଂହଦେଓ ଓ ପ୍ରଭାତୀ ପରିଡା ଉପମୁଖ୍ୟମନ୍ତ୍ରୀ - ODISHA NEW CM LIVE UPDATES
ନବ ନିର୍ବାଚିତ ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି, "ସର୍ବ ପ୍ରଥମେ ଜଗତର ନାଥ ଜଗନ୍ନାଥଙ୍କୁ ମୋର କୋଟି କୋଟି ପ୍ରଣାମ । ମହାପ୍ରଭୁଙ୍କ ଆଶୀର୍ବାଦରେ ବିଜେପି ରାଜ୍ୟରେ ଏକକ ସଂଖ୍ୟା ଗରିଷ୍ଠତା ହାସଲ କରି ସରକାର ଗଢିବାକୁ ଯାଉଛି । ସାଢେ ୪ କୋଟି ଓଡିଆର ଲୋକ ଏଥର ପରିବର୍ତ୍ତନ କରିବାର ସଙ୍କେତ ଦେଇଥିଲେ, ତାହାକୁ କାର୍ଯ୍ୟରେ ପରିବର୍ତ୍ତନ କରି ବିଜୟୀ କରିଛନ୍ତି । ସେମାନଙ୍କୁ କୋଟି କୋଟି ପ୍ରଣାମ । ୨୪ ବର୍ଷର ଶାସନଥିଲା ଏଥର ପରିବର୍ତ୍ତନ ହୋଇଛି । ଲୋକ ଯେଉଁ ଆଶା ଓ ଆକାଂକ୍ଷା ବିଜେପି ପ୍ରତି ପ୍ରକଟ କରିଛନ୍ତି ତାହା ଆଗାମୀ ଦିନରେ ସମ୍ପନ୍ନ କରାଯିବ । ଓଡିଶାକୁ ଦେଶରେ ଏକ ନମ୍ବର ରାଜ୍ୟରେ ପରିବର୍ତ୍ତନ କରିବାର ସଂକଳ୍ପ ନେଉଛି । ତାହା ଆଗାମୀ ଦିନରେ କାର୍ଯ୍ୟକାରୀ ହେବ ।"
