କଟକ: କଟକ-ବାରବାଟୀ ଆସନ ପାଇଁ ବିଜେଡି ପ୍ରକାଶ ବେହେରାଙ୍କୁ ପ୍ରାର୍ଥୀ କରିବା ପରେ ଦଳର ଏହି ନିଷ୍ପତ୍ତି କଟକ ରାଜନୀତିକୁ ସରଗରମ କରିଛି । ସାଲେପୁରର ନେତାଙ୍କୁ କଟକ-ବାରବାଟୀରେ ଟିକେଟ ଦେବା ନେଇ ବିଜେଡିର ଏହି ନିଷ୍ପତ୍ତି ଅନେକଙ୍କୁ ଚକିତ କରିଛି । କିନ୍ତୁ ବିଜେଡି ମହଲରୁ ମିଳିଥିବା ସୂଚନା ମୁତାବକ ଏକ ସୁଚିନ୍ତିତ ରଣନୀତିକୁ ଆଧାର କରି ଦଳ ପ୍ରକାଶଙ୍କୁ ଏଠାରୁ ପ୍ରାର୍ଥୀ କରିଛି । ସେପଟେ ପ୍ରକାଶଙ୍କ ପ୍ରାର୍ଥୀତ୍ବ ତାଙ୍କର ସାଙ୍ଗଠନିକ ସ୍ଥିତିକୁ କୌଣସି ପ୍ରକାରେ ପ୍ରଭାବିତ କରି ପାରିବ ନାହିଁ ବୋଲି ମୋକିମ କହିଥିବା ବେଳେ ପ୍ରକାଶ ଓ ମୋକିମଙ୍କୁ ମୁକାବିଲା କରିବା ପାଇଁ ବିଜେପି ଅଭିନେତା ଅରିନ୍ଦମଙ୍କୁ ମୈଦାନକୁ ଉତାରି ପାରେ ବୋଲି ଚର୍ଚ୍ଚା ହେଉଛି ।
ପୁଣି ଚର୍ଚ୍ଚାରେ ବହୁ ପ୍ରତିକ୍ଷିତ କଟକ-ବାରବାଟୀ ନିର୍ବାଚନ ମଣ୍ଡଳୀ । ଏହି ଆସନ ପାଇଁ ବିଜେଡି ତାର ପ୍ରାର୍ଥୀ ଘୋଷଣା କରିବା ପରେ ଚର୍ଚ୍ଚା ଏବେ ଦ୍ବିଗୁଣିତ ହୋଇଯାଇଛି । ସାଲେପୁର ପୂର୍ବତନ ବିଧାୟକ ତଥା ବିଜେପି ଜିଲ୍ଲା ସଭାପତି ସଦ୍ୟ ବିଜେପି ଛାଡ଼ି ବିଜେଡିରେ ଯୋଗ ଦେଇଥିବା ପ୍ରକାଶ ବେହେରାଙ୍କୁ ଦଳ ଏହି ଆସନ ପାଇଁ ପ୍ରାର୍ଥୀ କରିଛି । ସାଲେପୁରର ପୂର୍ବତନ ବିଧାୟକ ଥିବା ପ୍ରକାଶ ବେହେରାଙ୍କୁ କଟକ-ବାରବାଟୀରୁ ଲଢାଇବା ନେଇ ବିଜେଡିର ନିଷ୍ପତ୍ତି ପଛରେ ଥିବା ସମୀକରଣ ଅନେକଙ୍କ ପାଇଁ ଅବୁଝା ରହିଥିବାବେଳେ ଏହା ପଛରେ ଦଳର ଏକ ସୁଚିନ୍ତିତ ରଣନୀତି ରହିଥିବା କୁହାଯାଉଛି । କୁହାଯାଉଛି ପ୍ରକାଶ ବେହେରାଙ୍କ ପାଖରେ ନିର୍ବାଚନ ଜିତିବାର ପୂର୍ବ ଅଭିଜ୍ଞତା ରହିଛି । ସେ ପୂର୍ବରୁ ଜିଲ୍ଲା କଂଗ୍ରେସ ଓ ବିଜେପି ସଭାପତି ଥିବାରୁ କଟକ-ବାରବାଟୀର ରାଜନୀତି ସହିତ ସେ ପରିଚିତ ଅଛନ୍ତି । ଜଣେ ଭଲ ସଂଗଠକ ହୋଇଥିବାରୁ କମ ସମୟ ମଧ୍ୟରେ ସେ ନୂଆ ସ୍ଥାନ ଓ ଲୋକଙ୍କ ସହ ଖାପ ଖୁଆଇ ପାରିବେ । ନିଜସ୍ବ ଦକ୍ଷତା ବଳରେ ସେ ଦଳୀୟ କର୍ମୀ ଓ ସ୍ଥାନୀୟ ନେତାଙ୍କ ମଧ୍ୟରେ ଥିବା ଅନ୍ତର୍ଦ୍ବନ୍ଦ୍ବକୁ ପ୍ରଶମିତ କରିବେ ବୋଲି ଧାରଣା କରି ଦଳ ତାଙ୍କୁ ଟିକେଟ ଦେଇଥିବା କଥା ମଧ୍ୟ କୁହାଯାଉଛି ।
