ଭୁବନେଶ୍ବର: ସଂସଦରେ ବିଭିନ୍ନ ଆଲୋଚନା ନେଇ ଓଡ଼ିଶାରେ କଂଗ୍ରେସ ଓ ବିଜେପି ମୁହାଁମୁହିଁ ସ୍ଥିତିରେ । ଏପରିକି ରାହୁଲ ଗାନ୍ଧୀଙ୍କ ମନ୍ତବ୍ୟ ଓ ମୋଦିଙ୍କ ଆକ୍ଷେପକୁ ନେଇ ଉଭୟ କଂଗ୍ରେସ ଓ ବିଜେପି କର୍ମୀ ପରସ୍ପର ଉପରକୁ ଢେଲା ପଥର ମାଡ଼ କରିବା ପରିସ୍ଥିତି ମଧ୍ୟ ଉପୁଜିଛି । ସେହିଭଳି ଲୋକସଭାରେ ରାଷ୍ଟ୍ରପତିଙ୍କୁ ଧନ୍ୟବାଦ ପ୍ରସ୍ତାବ ଆଲୋଚନା ସମୟରେ ପୁରୀ ସାଂସଦ ସମ୍ବିତ ପାତ୍ର ନିଜ ବକ୍ତବ୍ୟରେ ପୁରୀରେ ଜାତିପ୍ରଥା କିଛି ନଥିବା କଥା କହିଥିଲେ । ଗଣତନ୍ତ୍ର ବ୍ୟବସ୍ଥା ପୁରୀ ଶ୍ରୀକ୍ଷେତ୍ରରୁ ଆରମ୍ଭ ହୋଇଛି ବୋଲି ସମ୍ବିତଙ୍କ ବକ୍ତବ୍ୟକୁ ନେଇ ଉଭୟ ସମ୍ବିତଙ୍କ ଉପରେ ବର୍ଷିଛନ୍ତି ଶ୍ରୀକାନ୍ତ ଜେନା ।
ଶ୍ରୀକାନ୍ତ କହିଛନ୍ତି, "ଜଗନ୍ନାଥ ଧାମରେ ଓଡ଼ିଶାରେ ଜାତିପ୍ରଥା ନାହିଁ, ଭାରତ ବର୍ଷର ଗାଣତାନ୍ତ୍ରିକ ବ୍ୟବସ୍ଥା ପୁରୀ ଶ୍ରୀକ୍ଷେତ୍ରରୁ ଆରମ୍ଭ ହୋଇଥିବା କଥା କହିଲେ ସମ୍ବିତ ପାତ୍ର । ହେଲେ ନୈଷ୍ଟିକ ହିନ୍ଦୁ ଜଗନ୍ନାଥ ମନ୍ଦିରକୁ ପ୍ରବେଶ କରିପାରିବେ ବୋଲି ଜଗନ୍ନାଥ ମନ୍ଦିର ବାହାରେ ଲେଖା ହୋଇଛି । ନୈଷ୍ଟିକ ହିନ୍ଦୁ ଓ ହିନ୍ଦୁ ଭିତରେ କଣ ପ୍ରଭେଦ ରହିଛି ? ସେ ସାର୍ଟିଫିକେଟ କିଏ ଦେବ ? ରବିନ୍ଦ୍ରନାଥ ଟାଗୋର ଓ ଭୀମରାଓ ଆମ୍ବେଦକର ମନ୍ଦିର ଭିତରକୁ ଯାଇପାରିନଥିଲେ । ମହାତ୍ମାଗାନ୍ଧୀ ମନ୍ଦିର ଭିତରକୁ ଯାଇଥିଲେ, ହେଲେ ଦଳିତଙ୍କୁ ଭିତରକୁ ଛଡ଼ାଯାଉନଥିବା ଶୁଣି ସେ ଅନଶନରେ ବସିଥିଲେ । ଜଗନ୍ନାଥଙ୍କର ଚିନ୍ତାଧାରାରେ ଜାତିପ୍ରଥା ନାହିଁ, ହେଲେ ସେଠାରେ ବାସ୍ତବରେ କାର୍ଯ୍ୟବେଳକୁ ଭୟଙ୍କର ଜାତିପ୍ରଥା ରହିଛି । ଲୋକସଭା ସଦନ ଭିତରେ ଯେତେବେଳେ ପୁରୀ ସାଂସଦ ଓଡ଼ିଶାରେ ଜାତିପ୍ରଥା ନାହଁ ବୋଲି କହିଛନ୍ତି, ଏହାକୁ ମୁଁ ବୁଝିପାରିଲିନି ।"
ସେ ଆହୁରି କହିଛନ୍ତି, "ଓଡ଼ିଶାରେ ନୂଆ ସରକାର ଆସିବା ପରେ ବିଜେପି ପ୍ରବକ୍ତା ନିଜ ସୋସିଆଲ ମିଡ଼ିଆରେ ଲେଖିଥିଲେ ଓଡ଼ିଶାର ମୁଖ୍ୟମନ୍ତ୍ରୀ ସାନ୍ତାଳୀ ଜାତିର, ଦୁଇଜଣ ଉପମୁଖ୍ୟମନ୍ତ୍ରୀ ଜଣେ ରାଜ ପରିବାରର ଓ ଅନ୍ୟଜଣେ OBC ଜାତିର । ତେଣୁ ଏଠି ସେମାନେ ଜାତିପ୍ରଥାକୁ ପ୍ରୋତ୍ସାହନ ଦେଇଛନ୍ତି । ସମ୍ବିତ ପାତ୍ର ଥରେ କହିଥିଲେ ଜଗନ୍ନାଥ ନରେନ୍ଦ୍ର ମୋଦିଙ୍କର ଭକ୍ତ ଆଉ ଏବେ ଦୁଇ ଦିନ ତଳେ ଗୋଟିଏ ସମ୍ବର୍ନ୍ଧନା ସଭାରେ ଜଣେ କେନ୍ଦ୍ରମନ୍ତ୍ରୀ କହିଛନ୍ତି ST, SC ଓ OBC ବର୍ଗକୁ ଉଠାଇ ଦେବା ପାଇଁ । ଏହା ବିଜେପିର ଭୟଙ୍କର ଷଡ଼ଯନ୍ତ୍ର । ଏ ରାଜ୍ୟରେ ୫୪ ପ୍ରତିଶତ ଲୋକ OBC ରହିଛନ୍ତି । ପୁରୀ ମନ୍ଦିରର ଛତିଶା ନିଯୋଗରେ ଦଳିତମାନଙ୍କୁ ସମାନ ଅଧିକାର ମିଳିବା ଆବଶ୍ୟକ ରହିଛି ।"
ଇଟିଭି ଭାରତ, ଭୁବନେଶ୍ବର
