ଭୁବନେଶ୍ବର: ରାଜ୍ୟରେ ବିଜେପି ଓ ବିଜେଡି ମଧ୍ୟରେ ବୁଝାମଣା ହୋଇଛି । ରାଜ୍ୟରେ ପାଣ୍ଡିଆନ ହିଁ ସରକାର ଚଳାଉଛନ୍ତି । କେନ୍ଦ୍ରରେ ମୋଦି ଓ ରାଜ୍ୟରେ ନବୀନ କେବଳ କିଛି ନିର୍ଦ୍ଦିଷ୍ଟ ଲୋକଙ୍କୁ ଲାଭ ପହଞ୍ଚାଇଛନ୍ତି । କଂଗ୍ରେସ ଉଭୟ ଦଳ ବିରୋଧରେ ଲଢୁଛି । ବିଭିନ୍ନ ବର୍ଗ ଓ ସେମାନଙ୍କ ଅଧିକାର ପାଇଁ ଲଢୁଛି । ରାଜ୍ୟ ଓ କେନ୍ଦ୍ରରେ ଦଳ କ୍ଷମତାକୁ ଆସିବା ପରେ ଚାଷୀ, ମହିଳା ଓ ଯୁବପିଢିଙ୍କ ପାଇଁ ଏକାଧିକ ଯୋଜନା କାର୍ଯ୍ୟକାରୀ ହେବ । ଆଜି ସାଲେପୁର ସମାବେଶରେ କଂଗ୍ରେସ ଷ୍ଟାର ନେତା ରାହୁଲ ଗାନ୍ଧୀ ଉଭୟ କେନ୍ଦ୍ର ଓ ରାଜ୍ୟରେ ଶାସନରେ ଥିବା ବିଜେପି ଓ ବିଜେଡି ଉପରେ ପ୍ରବଳ ବର୍ଷିବା ସହ କଂଗ୍ରେସ କ୍ଷମତାକୁ ଆସିଲେ ଏକାଧିକ ଜନକଲ୍ୟାଣକାରୀ ଯୋଜନା କାର୍ଯ୍ୟକାରୀ କରିବାର ପ୍ରତିଶୃତି ଦେଇଛନ୍ତି ।
ରାହୁଲ କହିଛନ୍ତି,‘‘ଗତ ବିଧାସଭା ନିର୍ବାଚନରେ ତେଲେଙ୍ଗାନାରେ କଂଗ୍ରେସକୁ ସମର୍ଥନ ମିଳିଲା । ଆମେ 5 ଗ୍ୟାରେଣ୍ଟି ଦେଇଥିଲୁ । ସରକାର ଗଠନ କରିବା ପରେ କାର୍ଯ୍ୟକାରୀ କରି ଦେଖାଇଲୁ ମଧ୍ୟ । ସେଠାରେ ଏବେ ବିଆରଏସ କ୍ଷମତାରୁ ଦୂରରେ । ସେହିପରି ଗତ 10 ବର୍ଷ ମଧ୍ୟରେ କେନ୍ଦ୍ରରେ ନରେନ୍ଦ୍ର ମୋଦି କେବଳ କିଛି ହାତ ଗଣତି ଲୋକଙ୍କୁ ସୁବିଧା ଦେଇଛି । ଏଠାରେ (ଓଡିଶା) ରେ ମଧ୍ୟ ବିଜେପି- ବିଜେଡି ମଧ୍ୟରେ ବିବାହ ହୋଇଛି । ଦିଲ୍ଲୀର ଅଙ୍କଲ, ନବୀନ ବାବୁ ପାର୍ଟନରସିପ କରିଛନ୍ତି । ସେହି 22 ଲୋକଙ୍କୁ ଫାଇଦା ମିଳିଛି । ନବୀନ ଓ ଅଙ୍କଲ (ମୋଦି) ମିଶି ଲୋକଙ୍କୁ ପାନ ଦେଇଛନ୍ତି । ପାନର ଅର୍ଥ ପାଣ୍ଡିଆନ, ଅମିତ ଶାହ ନବୀନ ଓ ନରେନ୍ଦ୍ର ମୋଦି । ରାଜ୍ୟକୁ ଏବେ ପାଣ୍ଡିଆନ ଚଳାଉଛନ୍ତି । ରାଜ୍ୟରେ ସରକାର କୃଷକଙ୍କ ଜମି ନେଇଗଲେ । ଚାରା ଘାଟାଲାରେ 15 ହଜାର କୋଟି ହଡପ ହୋଇଛି । ଯେତେବେଳେ କଂଗ୍ରେସ ସରକାର ଗଠନ କରିବ, ଲୁଟିଥିବା ଟଙ୍କା ଆପଣଙ୍କୁ ଫେରାଇବାର କାମ କରିବୁ ।’’
ଏହା ମଧ୍ୟ ପଢନ୍ତୁ:-ବାରବାଟୀରୁ ସୋଫିଆ ହେବେ କଂଗ୍ରେସ ପ୍ରାର୍ଥୀ, କେବଳ ଆନୁଷ୍ଠାନିକ ଘୋଷଣା ବାକି ! - Sofia firdosh
ସେହିପରି ରାହୁଲ କଂଗ୍ରେସ କ୍ଷମତାକୁ ଆସିଲେ ବିଭିନ୍ନ ଯୋଜନା କାର୍ଯ୍ୟକାରୀ କରିବ ବୋଲି କହିଛନ୍ତି ।
- ରାଜ୍ୟରେ ବେକାର ଯୁବକ-ଯୁବତୀଙ୍କୁ ମାସିକ 3 ହଜାର ଭତ୍ତା
- ଆର୍ଥିକ ପଛୁଆ ପରିବାର ଜଣେ ମହିଳାଙ୍କ ଖାତାକୁ ବାର୍ଷିକ 1 ଲକ୍ଷ ଟଙ୍କା
- ରାଜ୍ୟରେ ପ୍ରତି ପରିବାରକୁ 200 ୟୁନିଟ ମାଗଣା ବିଜୁଳି
- 500 ଟଙ୍କାରେ ଗ୍ୟାସ ସିଲିଣ୍ଡର
- ରାଜ୍ୟରେ ଧାନ କ୍ବଣ୍ଟାଲ 3 ହଜାର ଟଙ୍କା ହେବ
- କୃଷି ଋଣ ଛାଡ
- ଆଦିବାସୀଙ୍କୁ ଜଙ୍ଗଲ ଜମି ଅଧିକାର
- ମନରେଗା ମଜୁରୀ 400 ଟଙ୍କା ହେବ
ବ୍ୟୁରୋ ରିପୋର୍ଟ, ଇଟିଭି ଭାରତ
