ନୂଆଦିଲ୍ଲୀ: ଲୋକସଭା ନିର୍ବାଚନ ପାଇଁ ଦ୍ବିତୀୟ ପର୍ଯ୍ୟାୟରେ 72 ଆସନରେ ପ୍ରାର୍ଥୀ ଘୋଷଣା କରିଛି ଭାରତୀୟ ଜନତା ପାର୍ଟି (ବିଜେପି) । ଏହି ପର୍ଯ୍ୟାୟରେ ଏକାଧିକ କେନ୍ଦ୍ରମନ୍ତ୍ରୀଙ୍କ ସହ ବହୁ ହେଭିଓ୍ବେଟ ନେତାଙ୍କ ନାମ ପ୍ରକାଶ ପାଇଛି । କିଛି ଆସନରେ ନେତା ଅପରିବର୍ତ୍ତିତ ରହିଥିବା ବେଳେ ନୂଆ ଚେହେରା ମଧ୍ୟ ଟିକେଟ ପାଇଛନ୍ତି । ପ୍ରମୁଖ ଚେହେରାଙ୍କ ମଧ୍ଯରେ ଦଳର ଅନ୍ୟତମ ଭେଟେରାନ ନେତା ନୀତିନ ଗଡକରୀ ନିଜ ପାରମ୍ପରିକ ଆସନ ମହାରାଷ୍ଟ୍ର ନାଗପୁରରୁ ଲଢିବାକୁ ଯାଉଛନ୍ତି ।
ସେହିପରି କେନ୍ଦ୍ରମନ୍ତ୍ରୀ ପିୟୁଷ ଗୋଏଲ ମୁମ୍ବାଇ- ଉତ୍ତର ଆସନ, କେନ୍ଦ୍ରମନ୍ତ୍ରୀ ତଥା ଦଳର ଯୁବଚେହେରା ଅନୁରାଗ ଠାକୁର ହିମାଚଳ ପ୍ରଦେଶର ହରିମପୁର ସଂସଦୀୟ କ୍ଷେତ୍ର, ଦଳର ଦକ୍ଷିଣ ଭାରତର ବଡନେତା ତଥା ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ କର୍ଣ୍ଣାଟକର ଧରଓ୍ବାଡରୁ ଲଢିବାକୁ ଯାଉଛନ୍ତି । ସେହିପରି ଗତକାଲି ହରିୟାଣା ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିବା ମନୋହରଲାଲ ଖଟ୍ଟରଙ୍କୁ ମଧ୍ୟ ଲୋକସଭା ଟିକେଟ ଦେଇଛି ଦଳ । ତେବେ ଖଟ୍ଟରଙ୍କ ବାଦ ଦେଲେ ଅନ୍ୟ ଦୁଇ ପୂର୍ବତନ ମୁଖ୍ୟମନ୍ତ୍ରୀଙ୍କୁ ମଧ୍ୟ ଦଳ ଲୋକସଭା ନିର୍ବାଚନ ଲଢାଇବାକୁ ଯାଉଛି । କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ବଶବରାଜ ବୋମ୍ମାଇ ଓ ଉତ୍ତରାଖଣ୍ଡ ପୂର୍ବତନ ମୁଖ୍ୟମନ୍ତ୍ରୀ ତ୍ରିଭେନ୍ଦ୍ର ସିଂ ରାଓ୍ବତ ମଧ୍ୟ ସାଧାରଣ ନିର୍ବାଚନରେ ନିଜ ଭାଗ୍ୟ ପରୀକ୍ଷା ଦେବେ ।
ଆଜି ତାଲିକାକୁ ରାଜ୍ୟଓ୍ବାରୀ ବିଶ୍ଳେଷଣ କଲେ, ଦିଲ୍ଲୀର ଦୁଇ ଆସନ, ଗୁଜୁରାଟର 7, ହରିୟାଣା 6, ହିମାଚଳ ପ୍ରଦେଶ 2, କର୍ଣ୍ଣାଟକରେ 20, ମଧ୍ୟ ପ୍ରଦେଶ 5, ମହାରାଷ୍ଟ୍ର 20, ତେଲେଙ୍ଗାନା 6, ତ୍ରିପୁରାରେ ଗୋଟିଏ ଆସନ ଓ ଉତ୍ତରାଖଣ୍ଡରେ 2ଟି ଆସନରେ ପ୍ରାର୍ଥୀ ଦେଇଛି ଦଳ । ସେହିପରି କେନ୍ଦ୍ରଶାସିତ ଅଞ୍ଚଳ ଦାଦ୍ରାନଗର ହାବେଳୀ ଓ ଡାମନ ଡିଉରେ ଜଣେ ପ୍ରାର୍ଥୀ ରହିଛନ୍ତି ।
ଏହାମଧ୍ୟ ପଢନ୍ତ :-ବିଜେପି ପ୍ରଥମ ପ୍ରାର୍ଥୀ ତାଲିକା: କେଉଁଠୁ ଲଢିବେ କେଉଁ ହେଭିଓ୍ବେଟ, ଜାଣନ୍ତୁ
ଏକାକୀ 370 ରୁ ଅଧିକ ଆସନ ଓ ଇଣ୍ଡିଆ ମେଣ୍ଟର ସହଯୋଗୀ ଦଳଙ୍କ ଆସନ ସହ 400 ପାର କରିବାର ଘୋଷଣା କରିଥିବା ବିଜେପି ପ୍ରଥମ ପର୍ଯ୍ୟାୟରେ ମୋଟ 18 ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର 195 ଆସନରେ ପ୍ରାର୍ଥୀ ଦେଇଥିଲା । ପ୍ରଥମ ପର୍ଯ୍ୟାୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ମୋଟ 34 କେନ୍ଦ୍ରମନ୍ତ୍ରୀଙ୍କୁ ମିଶାଇ 195 ପ୍ରାର୍ଥୀଙ୍କ ତାଲିକା ଜାରି କରିଥିଲା । ଏକାଧିକ କେନ୍ଦ୍ରମନ୍ତ୍ରୀଙ୍କ ଆସନ ଅପରିବର୍ତ୍ତିତ ରହିଥିବା ବେଳେ ରାଜ୍ୟସଭା ଯାଇ ମନ୍ତ୍ରୀ ହୋଇଥିବା କିଛି ହେଭିଓ୍ବେଟଙ୍କୁ ଦଳ ଚଳିତଥର ଲୋକସଭା ନିର୍ବାଚନୀ ମୈଦାନକୁ ଓହ୍ଲାଇଛି । ଦଳର ମୁଖ୍ୟ ରଣନୀତିକାର କେନ୍ଦ୍ର ଗୃହମନ୍ତ୍ରୀ ଶାହ ଗତଥର ପରି ନିଜ ପାରମ୍ପରିକ ଆସନ ଗୁଜୁରାଟର ଗାନ୍ଧୀନଗରରୁ ଲଢୁଛନ୍ତି । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଉତ୍ତର ପ୍ରଦେଶ ରାଜଧାନୀ ଲକ୍ଷ୍ନୌରୁ ଲଢିବେ । ସେହିପରି ଆମେଠୀ ଆସନ ବଜାୟ ରଖିଛନ୍ତି କେନ୍ଦ୍ରମନ୍ତ୍ରୀ ତଥା ଦଳର ଆଗଧାଡିର ମହିଳା ଚେହେରା ସ୍ମୃତି ଇରାନୀ । ଆଜି ଘୋଷିତ ତାଲିକାରେ ମଧ୍ୟ କିଛି କେନ୍ଦ୍ରମନ୍ତ୍ରୀ ନିଜ ପାରମ୍ପରିକ ଆସନ ବଜାୟ ରଖିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
