ଭୁବନେଶ୍ବର: ବିଜେପି ପକ୍ଷରୁ ଗତକାଲି (ମଙ୍ଗଳବାର) ଘୋଷଣା ହୋଇଥିବା ପ୍ରାର୍ଥୀ ତାଲିକାରେ ଭୁବନେଶ୍ବର ଏକାମ୍ର ନିର୍ବାଚନ ମଣ୍ଡଳୀ ପାଇଁ ବାବୁ ସିଂଙ୍କ ନାଁ ଘୋଷଣା କରିଛି ଦଳ । ଦଳରୁ ଟିକେଟ ପାଇବା ପରେ ପ୍ରଭୁ ଲିଙ୍ଗରାଜଙ୍କ ଦର୍ଶନ କରି ପ୍ରଚାର ମୈଦାନକୁ ଓହ୍ଲାଇ ଏକାମ୍ରରେ ନିଜର ଶକ୍ତି ପ୍ରଦର୍ଶନ କରିଛନ୍ତି । ପ୍ରଚାର ଆରମ୍ଭରୁ ହିଁ ଶାସକ ଦଳକୁ ଟାର୍ଗେଟ କରିଛନ୍ତି ବାବୁ ।
ଆଜି ଏକାମ୍ର ବିଧାନସଭା ଆସନର ବିଜେପି ପ୍ରାର୍ଥୀ ବାବୁ ସିଂ ମହାପ୍ରଭୂ ଲିଙ୍ଗରାଜଙ୍କୁ ଦର୍ଶନ କରି ପ୍ରଚାର ଆରମ୍ଭ କରିଛନ୍ତି । ଶତାଧିକ କର୍ମୀ, ସମର୍ଥକଙ୍କ ସହ ପଦଯାତ୍ରାରେ ସୁନ୍ଦରପଦାରୁ ଆସି ଲିଙ୍ଗରାଜ ମନ୍ଦିରରେ ପହଞ୍ଚିଥିଲେ । ବାବୁ ସିଂଙ୍କ ସହ ପଦଯାତ୍ରାରେ ସାମିଲ ହୋଇଥିଲେ ଭୁବନେଶ୍ବର ବିଜେପି ସାଂସଦ ପ୍ରାର୍ଥିନୀ ଅପରାଜିତା ଷଡ଼ଙ୍ଗୀ । ଏକ ବିରାଟ ପଟୁଆର ସହ ଶହଶହ ଲୋକଙ୍କ ସମର୍ଥନକୁ ନେଇ ବାବୁ ସିଂ ଓ ଅପରାଜିତା ଷଢଙ୍ଗୀ ପଦଯାତ୍ରାରେ ଆସି ନିଜର ଶକ୍ତି ପଦର୍ଶନ କରିଛନ୍ତି । ଆଉ ନିର୍ବାଚନରେ ତାଙ୍କୁ ବିଜୟୀ କରିବା ପାଇଁ ଏକାମ୍ରବାସୀଙ୍କ ସମର୍ଥନ ଲୋଡ଼ିଛନ୍ତି ବାବୁ ସିଂ।
ଏହି ଅବସରରେ ବାବୁ କହିଛନ୍ତି, "ଏଣିକି ନିର୍ବାଚନ ପ୍ରଚାର ଜୋର ହେବ ଓ ଚଳିତ ନିର୍ବାଚନରେ ଦୁର୍ନିତୀ ଗ୍ରସ୍ତ, ଭ୍ରଷ୍ଟାଚାରୀ ନେତାଙ୍କୁ ଏକାମ୍ର ଜନତା ଉଚିତ୍ ଜବାବ ଦେବେ । କେବଳ ଏକାମ୍ର ନିର୍ବାଚନ ମଣ୍ଡଳୀ ନୁହେଁ ଭୁବନେଶ୍ବରର ଉତ୍ତର, ମଧ୍ୟ ଓ ଜୟଦେବ ନିର୍ବାଚନ ମଣ୍ଡଳୀବାସୀ ଓଡ଼ିଶାର ଦୂରାଚାରୀ ନେତାଙ୍କୁ ଜବାବ ଦେବେ । ପାପୀ ନେତାକୁ ହଟାଇବା ପାଇଁ ଲିଙ୍ଗରାଜଙ୍କୁ ପ୍ରାର୍ଥନା କରିଛି । ଆମେ କେବଳ ଟିକେଟ ପାଇଥିବାରୁ ନିର୍ବାଚନ ରଣନୀତିରେ ଜଣେ ଜଣେ ସେନାପତି । ତେଣୁ ଏଥର ଓଡିଶାବାସୀ, ଭୁବନଶ୍ବରବାସୀ ନିଜେ ନିର୍ବାଚନ ଲଢିବେ ଆଉ ୨୪ ବର୍ଷର ଦୂରାଚାରୀ ଶାସନକୁ ହଟାଇବେ ।
