ଭୁବନେଶ୍ବର: ଟିକେଟ ମିଳିବା ପରେ ଭିନ୍ନ ଭିନ୍ନ ଢଙ୍ଗରେ ପ୍ରଚାର ଆରମ୍ଭ କରିଛନ୍ତି ବିଭିନ୍ନ ଦଳର ପ୍ରାର୍ଥୀ । ବିଶେଷ କରି ଭୁବନେଶ୍ବରରୁ ବିଜେଡିର ଲୋକସଭା ପ୍ରାର୍ଥୀ ମନ୍ମଥ ରାଉତରାୟଙ୍କ ପ୍ରଚାର ଏବେ ଚର୍ଚ୍ଚାରେ । କେବେ ପାର୍କକୁ ଯାଇ ବ୍ୟାଡମିଣ୍ଟନ ଖେଳୁଛନ୍ତି ତ ଆଉ କେତେବେଳେ ବ୍ୟାୟାମ କରି ପ୍ରଚାର କରୁଛନ୍ତି, ଆଉ କେତେବେଳ ରାତି ଅଧରେ ହସ୍ପିଟାଲକୁ ଯାଇ ବୁଝୁଛନ୍ତି ରୋଗୀଙ୍କ ଦୁଃଖ । ତେବେ ଆଜି (ସୋମବାର) ସକାଳ ସମୟରେ କ୍ୟାପିଟାଲ ହସ୍ପିଟାଲ ବୁଲିଥିଲେ ମନ୍ମଥ । ରୋଗୀ ତଥା ରୋଗୀଙ୍କ ସମ୍ପର୍କୀୟଙ୍କ ସୁବିଧା ଅସୁବିଧା ପଚାରି ବୁଝିଥିଲେ ଭୁବନେଶ୍ବର ଲୋକସଭା ଆସନରୁ ବିଜେଡିର ପ୍ରାର୍ଥୀ ହୋଇଥିବା କ୍ୟାପ୍ଟେନ ମନ୍ମଥ ରାଉତରାୟ ।
ମନ୍ମଥ ରାଉତରାୟ ଆଜି ସକାଳ ସମୟରେ ଲିଙ୍ଗରାଜ ମନ୍ଦିରରେ ମହାପ୍ରଭୁଙ୍କ ଦର୍ଶନ କରିବା ପରେ କ୍ୟାପିଟାଲ ହସ୍ପିଟାଲ ପରିଦର୍ଶନରେ ଯାଇଥିଲେ । ହସ୍ପିଟାଲର ବିଭିନ୍ନ ୱାର୍ଡ ବୁଲିବା ସହ ପ୍ରତ୍ୟେକ ରୋଗୀଙ୍କ ସହ କଥା ପଚାରି ବୁଝିଛନ୍ତି । ଏହାପରେ ପରୋକ୍ଷ ଭାବେ ଅପରାଜିତାଙ୍କୁ ଟାର୍ଗେଟ କରିଛନ୍ତି ମନ୍ମଥ । ସେ କହିଛନ୍ତି, "ମୁଁ ଏ ମାଟିର ପୁଅ । ତେଣୁ ଜିତିଲେ ପ୍ରଥମେ ଲିଙ୍ଗରାଜ ମନ୍ଦିର ଆକ୍ଟ ପାଇଁ ସଂସଦରେ ପ୍ରସ୍ତାବ ରଖିବି । ଯିଏ 5 ବର୍ଷ ଧରି ଜିତିକି ଆସିଛନ୍ତି, ସେ ଲିଙ୍ଗରାଜ ମନ୍ଦିର ଉପରେ ଅଙ୍ଗୁଳି ଉଠାଇଛନ୍ତି । ଆମ ଠାକୁରଙ୍କ ବିକାଶରେ ବାଧା ସାଜିଛନ୍ତି । ଏ ଅଞ୍ଚଳର ପୁଅ କିମ୍ବା ଝିଅ ସମସ୍ୟାକୁ ଅଧିକ ବୁଝିବ ।" ଯେହେତୁ ଅପରାଜିତା ଅଞ୍ଚଳବାସୀ ନୁହଁନ୍ତି, ତେଣୁ ସେ ମହାଦେବଙ୍କ ସହ ଯୋଡ଼ି ହୋଇ ପାରୁନାହାନ୍ତି ବୋଲି କହିଛନ୍ତି ମନ୍ମଥ ।
