ମସ୍କୋ: ଶକ୍ତିଶାଳୀ ଭୂମିକମ୍ପରେ ଥରିଲା ଋଷିଆ । ଦେଶର ଉପକୂଳବର୍ତ୍ତୀ ଅଞ୍ଚଳରେ ୭.୦ ତୀବ୍ରତାର ବଡ଼ଧରଣର ଭୂକମ୍ପ ହୋଇଛି । ଏହା ଫଳରେ ଶିଭେଲୁଚଠାରେ ଥିବା ଆଗ୍ନେୟଗିରି ଉଦ୍ଗିରଣ ହୋଇଛି । ସମୁଦ୍ର ପତ୍ତନଠାରୁ ପ୍ରାୟ ୮ କିଲୋମିଟର ଉଚ୍ଚ ପର୍ଯ୍ୟନ୍ତ ଆଗ୍ନେୟଗିରିରୁ ବହଳ କଳା ଧୂଆଁ ବାହାରୁଥିବାର ଦେଖିବାକୁ ମିଳୁଛି । ସୋସିଆଲ ମିଡିଆରେ ଏହାର ଅନେକ ଭିଜୁଆଲ ମଧ୍ୟ ସାମ୍ନାକୁ ଆସୁଛି । ଏହି ଆଗ୍ନେୟ ଉଦଗିରଣ ବା ଜ୍ବାଳାମୁଖୀ ଫାଟିବା ପରେ ସୁନାମୀ ଚେତାବନୀ ଜାରି କରାଯାଇଛି ।
Shiveluch volcano erupts after 7.0 magnitude earthquake strikes off eastern Russian coast
— ANI Digital (@ani_digital) August 18, 2024
Read @ANI Story | https://t.co/9khkDWNYR3#Shiveluchvolcano #Russia #earthquake pic.twitter.com/7JaJ3OUaQe
- ଭୂକମ୍ପ ପରେ ଫାଟିଲା ଜ୍ବାଳାମୁଖୀ:
ଯାହା ସୂଚନା ରହିଛି, ଭୂକମ୍ପ ପରେ ଶିଭେଲୁଚ ଆଗ୍ନେୟଗିରିରୁ ବହୁମାତ୍ରାରେ ଲାଭା ବାହାରୁଛି । ତେବେ ଏଥିରେ କେହି ମୃତାହତ ହେବାର ଏଯାଏଁ କୌଣସି ସୂଚନା ନାହିଁ । ୟୁରୋପୀୟ ଭୂମଧ୍ୟ-ସାଗରୀୟ ଭୂକମ୍ପ ବିଜ୍ଞାନ କେନ୍ଦ୍ର (EMSC) ଅନୁସାରେ, ଋଷିଆର ଉପକୂଳବର୍ତ୍ତୀ ସହର ପେଟ୍ରୋପାଭ୍ଲୋଭସ୍କ କାମଚଟସ୍କି ଅଞ୍ଚଳରେ ୭.୦ ତୀବ୍ରତାରେ ଭୂକମ୍ପ ସଂଗଠିତ ହୋଇଥିଲା । ଏହି ଭୂମିକମ୍ପର କେନ୍ଦ୍ରସ୍ଥଳ କାମଚାଟସ୍କିଠାରୁ ୫୫ ମାଇଲ ଦୂର ଓ ଭୂପୃଷ୍ଠରୁ ପ୍ରାୟ ୩୦ମାଇଲ ଗଭୀରତାରେ ରେକର୍ଡ ହୋଇଛି ।
ଶିଭେଲୁଚ ଆଗ୍ନେୟଗିରି ପେଟ୍ରୋପାଭ୍ଲୋଭସ୍କ ସହର ଠାରୁ ୨୮୦ ମାଇଲ ଦୂରରେ ଅବସ୍ଥିତ । ଏହି ସହରରେ ପ୍ରାୟ ୧ଲକ୍ଷ ୮୦ ହଜାରରୁ ଅଧିକ ଲୋକ ବସବାସ କରୁଛନ୍ତି । ଭୂକମ୍ପ ଯୋଗୁଁ ଅଞ୍ଚଳରେ କୌଣସି ବଡ଼ଧରଣର କ୍ଷୟକ୍ଷତି ହୋଇନାହିଁ । ଅଗ୍ନେୟଗିରି ଉଦଗିରଣ ଜନିତ ମୃତାହତ କିମ୍ବା କ୍ଷୟକ୍ଷତି ନେଇ ମଧ୍ୟ କୌଣସି ଖବର ନାହିଁ । ବର୍ତ୍ତମାନ ସେଠାରେ ଥିବା ବିଲ୍ଡିଂଗୁଡିକର ଯାଞ୍ଚ କରାଯାଉଛି ।
- ସୁନାମୀ ଆଲର୍ଟ ଜାରି
ଅନ୍ୟପଟେ ଋଷିଆ ଜରୁରୀକାଳନୀ ମନ୍ତ୍ରଣାଳୟ ଭୂକମ୍ପ ନେଇ ସୁନାମୀ ଚେତାବନୀ ଜାରି କରିନାହିଁ । ହେଲେ ଆମେରିକାର ସୁନାମୀ ୱାର୍ଣ୍ଣିଂ ସେଣ୍ଟର ପକ୍ଷରୁ ସୁନାମୀ ଚେତାବନୀ ଦିଆଯାଇଛି । ଭୂକମ୍ପ ଅଞ୍ଚଳର ୩୦୦ କିଲୋମିଟର ଦୂରତା ମଧ୍ୟରେ ଥିବା ଅଞ୍ଚଳକୁ ସୁନାମୀ ବିପଦ ଥିବା ଆଲର୍ଟ କରାଯାଇଛି । ଏହି ଭୂମିକମ୍ପ ପରେ ସ୍ଥାନୀୟ ଅଞ୍ଚଳବାସୀ ନିଜର ଘରଦ୍ବାର ଛାଡି ସୁରକ୍ଷିତ ସ୍ଥାନରେ ଆଶ୍ରୟ ନେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
