ନୂଆଦିଲ୍ଲୀ: ଇସ୍ରାଏଲ ସହ ଯୁଦ୍ଧ ମଧ୍ୟରେ ହମାସ୍କୁ ପୁଣି ବଡ଼ ଝଟକା । ଇରାନରେ ହମାସର ରାଜନୈତିକ ମୁଖ୍ୟ ଇସମାଇଲ ହାନିୟେଙ୍କ ହତ୍ୟାର ଦିନକ ପରେ ଏହାର ମିଲିଟାରୀ ୱିଙ୍ଗ ମୁଖ୍ୟ ମହମ୍ମଦ ଡେଫଙ୍କ ମଧ୍ୟ ମୃତ୍ୟୁ ଘଟିଥିବା ଖବର ଆସିଛି । ଗତ ମାସରେ ଗାଜାରେ ଇସ୍ରାଏଲ କରିଥିବା ଏୟାରଷ୍ଟ୍ରାଇକରେ ମହମ୍ମଦ ଡେଫଙ୍କ ମୃତ୍ୟୁ ହୋଇଥିଲା । ଏନେଇ ଆଜି (ଗୁରୁବାର) ଇସ୍ରାଏଲ ସେନା ପକ୍ଷରୁ ସୂଚନା ଦିଆଯାଇଛି ।
ଇସ୍ରାଏଲ ଡିଫେନ୍ସ ଫୋର୍ସ (IDF) ପକ୍ଷରୁ କୁହାଯାଇଛି, ୨୦୨୪ ଜୁଲାଇ ୧୩ରେ ଇସ୍ରାଏଲ ସେନାର ଲଢୁଆ ବିମାନ ଗାଜାର ଖାନ ୟୁନିସ ଅଞ୍ଚଳରେ ଆକ୍ରମଣ କରିଥିଲା । ଏହି ଆକ୍ରମଣରେ ହମାସ୍ ମିଲିଟାରୀ ମୁଖ୍ୟ ମହମ୍ମଦ ଡେଫଙ୍କ ମୃତ୍ୟୁ ହୋଇଥିଲା । ହେଲା ଏହା ସ୍ପଷ୍ଟ ହେବାକୁ ସମୟ ଲାଗିଥିଲା । ସେଦିନ ଏୟାରଷ୍ଟ୍ରାଇକରେ ଡେଫଙ୍କ ମୃତ୍ୟୁ ହୋଇଥିବା ଏବେ ଗୁଇନ୍ଦା ସୂତ୍ରରୁ ସ୍ପଷ୍ଟ ହୋଇଛି । ହମାସ୍ ନେତାମାନେ ହାନିୟେଙ୍କ ଅନ୍ତିମ ସଂସ୍କାର କାର୍ଯ୍ୟକ୍ରମରେ ଯୋଗ ଦେବାକୁ ଏବେ ତେହେରାନରେ ଥିବାବେଳେ ଇସ୍ରାଏଲ ଏହି ଘୋଷଣା କରିଛି । ତେବେ ଇସ୍ରାଏଲର ଏହି ସୂଚନା ଉପରେ ହମାସ୍ ତୁରନ୍ତ କିଛି ପ୍ରତିକ୍ରିୟା ଦେଇନି ।
ମହମ୍ମଦ ଡେଫ ଅକ୍ଟୋବର ୭ରେ ଇସ୍ରାଏଲ ଉପରେ ହୋଇଥିବା ଆକ୍ରମଣର ମାଷ୍ଟର ମାଇଣ୍ଡ ଥିଲେ । ଏଥିରେ ଇସ୍ରାଏଲର ପ୍ରାୟ ୧୨୦୦ ନାଗରିକଙ୍କ ମୃତ୍ୟୁ ହୋଇଥିଲା । ଆଉ ଏହି ଆକ୍ରମଣରୁ ଇସ୍ରାଏଲ-ଗାଜା ଯୁଦ୍ଧର ସୂତ୍ରପାତ ହୋଇଥିଲା, ଯାହା ଦୀର୍ଘ ୩୦୦ ଦିନ ହେଲା ଜାରି ରହିଥିବାବେଳେ ରକ୍ତପାତ ଥମିବାର ନାଁ ନେଉନି । ଇସ୍ରାଏଲ ଗାଜା ଉପରେ ବାରମ୍ବାର ପ୍ରଚଣ୍ଡ ଆକ୍ରମଣ ଜାରି ରଖିଛି । ଏଥିସହ ହମାସ୍ର ଜଣକ ପରେ ଜଣେ ବଡ ଲିଡରକୁ ନିପାତ କରୁଛି ।
ଉଲ୍ଲେଖଯୋଗ୍ୟ ଯେ, ମହମ୍ମଦ ଡେଫ ୧୯୯୦ ଦଶକରେ ହମାସର ମିଲିଟାରୀ ୱିଙ୍ଗ କସାମ ବ୍ରିଗେଡର ପ୍ରତିଷ୍ଠାତାଙ୍କ ମଧ୍ୟରୁ ଜଣେ ଥିଲେ । ତାଙ୍କ ନେତୃତ୍ବରେ ହମାସ୍ ଇସ୍ରାଏଲରେ ଏକାଧିକ ଆତ୍ମଘାତୀ ବିସ୍ଫୋରଣ କରିଥିଲା । ମୁଖ୍ୟତଃ ବସ୍ ଏବଂ କାଫେ ଗୁଡିକୁ ଟାର୍ଗେଟ କରାଯାଉଥିଲା ।
କହିରଖୁଛୁ କି, ଜୁଲାଇ ୩୦ରେ ହସାସ୍ ଟପ୍ ଲିଡର ତଥା ଏହାର ରାଜନୈତିକ ମୁଖ୍ୟ ଇସମାଇଲ ହାନିୟେଙ୍କୁ ଇରାନରେ ହତ୍ୟା କରିଥିଲା ଇସ୍ରାଏଲ । ସେ ରହୁଥିବା ଘରକୁ ମିସାଇଲ ମାଡ କରିଥିଲା । ହାନିୟେ ଇରାନ ରାଷ୍ଟ୍ରପତି ମସୁଦ ପଜଶକିୟାନଙ୍କ ଶପଥ ଗ୍ରହଣ ସମାରୋହରେ ଯୋଗଦେବାକୁ ଯାଇଥିବା ବେଳେ ଇସ୍ରାଏଲ ଏହି ଆକ୍ରମଣ କରିଥିବାରୁ ଇରାନ କ୍ଷୁବ୍ଧ ହୋଇଛି । ଯାହାକୁ ନେଇ ଇସ୍ରାଏଲ ଓ ଇରାନ ମଧ୍ୟରେ ଯୁଦ୍ଧ ଆଶଙ୍କା ଆହୁରି ଘନାଇଛି ।
