ହାଇଦ୍ରାବାଦ: ଓଜନ ହ୍ରାସ କରିବାକୁ ସବୁଠୁ ସହଜ ଉପାୟ ହେଉଛି ଚାଲିବା । ଯାହାକୁ ଆମେ ମର୍ଣ୍ଣିଂ ୱାକ୍ ବା ଇଭିନିଂ ୱାକ୍ ବୋଲି କହିଥାଉ । କେହି କେହି ଓଜନ ହ୍ରାସ କରିବାକୁ ଜିମ୍ ମଧ୍ୟ ଯାଇଥାନ୍ତି । ତେବେ କେବଳ ଯେ, ଟଙ୍କା ଖର୍ଚ୍ଚ କରି ଜିମ୍ ଗଲେ କିମ୍ବା ଏଥିପାଇଁ ଔଷଧ ସେବନ କଲେ ଓଜନ ହ୍ରାସ ହେବ ତା ନୁହେଁ । ସଠିକ୍ ସମୟରେ ଚାଲିବା ଦ୍ବାରା ଜଣେ ବ୍ୟକ୍ତି ସହଜରେ ନିଜର ଓଜନ ହ୍ରାସ କରିପାରିବେ । ବିଶେଷଜ୍ଞଙ୍କ କହିବା ଅନୁସାରେ, ଚାଲିବା ହେଉଛି ଓଜନ ହ୍ରାସ କରିବାର ସଫଳ ଉପଚାର । ହେଲେ ପ୍ରଶ୍ନ ଉଠୁଛି ଯେ, ଚାଲିବା ପାଇଁ କେଉଁ ସମୟ ଉପଯୁକ୍ତ ? ଆସନ୍ତୁ ଜାଣିବା
ମର୍ଣ୍ଣିଂ ୱାକର ଉପକାରିତା:
ସକାଳୁ ସକାଳୁ ପାର୍କରେ କିମ୍ବା ଖାଲି ରାସ୍ତାରେ ଚାଲନ୍ତୁ । ଏହା ଦ୍ବାରା ଉଭୟ ଶାରିରୀକ ଓ ମାନସିକ ଶାନ୍ତି ମିଳିଥାଏ । ଏହା ଥକାପଣ ଓ ଚିନ୍ତାରୁ ମୁକ୍ତି ଦିଏ । ଏହାସହ ଡିପ୍ରେସନ ଦୂର କରିବାରେ ମଧ୍ୟ ଏହା ସହାୟକ ହୋଇଥାଏ ।
କେତେ ସମୟ ଚାଲିବା ଉଚିତ?
ଗୋଟିଏ ସପ୍ତାହରେ ଅତିକମରେ 5 ଦିନ ଚାଲିବା ନିହାତି ଜରୁରୀ। ଦୈନିକ 20ରୁ 30 ମିନିଟ୍ ମର୍ଣ୍ଣିଂ ୱାକ୍ କରିବା ଦ୍ବାରା ଅନେକ ଲାଭ ମିଳିଥାଏ।
ଇଭିନିଂ ୱାକର ଉପକାରିତା:
ସନ୍ଧ୍ୟାରେ ଅଧିକ ସମୟ ଧରି ଚାଲିବା ଦ୍ବାରା ଆରାମଦାୟକ ଅନୁଭବ ହୋଇଥାଏ । ସନ୍ଧ୍ୟାରେ ଚାଲିବା ଦ୍ବାରା ମାଂସପେଶୀ ମଧ୍ୟ ମଜବୁତ ହୋଇଥାଏ । ଏହାସହ ରାତିରେ ନିଦ ମଧ୍ୟ ଭଲ ହୋଇଥାଏ । ସାଧାରଣତଃ ପୂରା ଦିନ କମ୍ପ୍ୟୁଟର ସାମନାରେ ବସି କାମ କରୁଥିବା ବ୍ୟକ୍ତିବିଶେଷ ଅଣ୍ଟା ଦରଜ ବା ବ୍ୟାକ୍ ପେନର ସମସ୍ୟା ଭୋଗିଥାନ୍ତି । ସନ୍ଧ୍ୟାରେ କିଛି ସମୟ ଚାଲିବା ଦ୍ବାରା ସେମାନଙ୍କୁ ମଧ୍ୟ ଉପଶମ ମିଳିଥାଏ ।
ମର୍ଣ୍ଣିଂ ୱାକ ବନାମ ଇଭିନିଂ ୱାକ:
ଝାନସି ମେଡିକାଲ କଲେଜର ଡାକ୍ତର କୁଳଦୀପ ଚନ୍ଦେଲ କହିଛନ୍ତି, "ଉଭୟ ମର୍ଣ୍ଣିଂ ୱାକ ଓ ଇଭିନିଂ ୱାକର ଉପକାରିତା ରହିଛି। ଏହି ଦୁଇ ପ୍ରକାରର ୱାକ୍ ଓଜନ ହ୍ରାସ କରିବାରେ ସହାୟକ ହୋଇଥାନ୍ତି। ଆପଣଙ୍କ ଲାଇଫଷ୍ଟାଇଲ ଉପରେ ନିର୍ଭର କରେ ଯେ, ଆପଣଙ୍କ କ୍ଷେତ୍ରରେ ଫଳପ୍ରଦ କ'ଣ ହେବ।"
