ହାଇଦ୍ରାବାଦ: ମଦ ଆମ ଶରୀର ପାଇଁ କେତେ ହାନିକାରକ, ସମସ୍ତେ ଅଳ୍ପ ବହୁତେ ଜାଣନ୍ତି । ପ୍ରତିଦିନ ମଦ ପିଇବା ଦ୍ବାରା ଗମ୍ଭୀର ସ୍ବାସ୍ଥ୍ୟ ସମସ୍ୟା ସୃଷ୍ଟି ହେବା ସହ ଆୟୁଷ କମିଥାଏ । ଏମିତିକି ପ୍ରତିଦିନ ମଦ ପିଉଥିବା ଲୋକେ ବୟସ ପୂର୍ବରୁ ଅକାଳରେ ପ୍ରାଣ ହରାଉଥିବା ଏକ ଅଧ୍ୟୟନରୁ ଜଣାପଡିଛି । ସେଥିପାଇଁ ଡାକ୍ତର ଅତ୍ୟଧିକ ମଦ୍ୟପାନ ନକରିବାକୁ ପରାମର୍ଶ ଦିଅନ୍ତି । ମାତ୍ର ଲୋକମାନେ ଏହାର ମାରାତ୍ମକ ପ୍ରଭାବ ଜାଣି ମଧ୍ୟ ମଦଠାରୁ ଦୂରେଇ ପାରନ୍ତି ନାହିଁ ।
ଅକାଳ ମୃତ୍ୟୁ ଆଶଙ୍କା ଅଧିକ:
JAMA Network Openରେ ପ୍ରକାଶିତ ଏକ ଅଧ୍ୟୟନରେ ବୟସାଧିକ ବ୍ୟକ୍ତିଙ୍କ ଠାରେ ମଦପାନ ଜନିତ ବିପଦକୁ ଦର୍ଶାଯାଇଛି । ରିପୋର୍ଟରେ କେତେ ମଦ ପିଇଲେ ସ୍ବାସ୍ଥ୍ୟ ଉପରେ କେମିତି ପ୍ରଭାବ ପଡେ, ତାହା କୁହାଯାଇଛି । ଏହି ଅଧ୍ୟୟନରେ, ୟୁକେ ବାୟୋବ୍ୟାଙ୍କରେ ହାରାହାରି 64 ବର୍ଷ ବୟସର 135,000 ଲୋକଙ୍କ ସ୍ବାସ୍ଥ୍ୟ ତଥ୍ୟର ବିଶ୍ଲେଷଣ କରାଯାଇଥିଲା । ଏଥିରୁ ଜଣାପଡିଥିଲା ଯେ, ପ୍ରତିଦିନ ମଦ୍ୟପାନ ଦ୍ବାରା 60 ବର୍ଷରୁ ଅଧିକ ବୟସର ଲୋକଙ୍କ ମଧ୍ୟରେ ଅକାଳ ମୃତ୍ୟୁ ଆଶଙ୍କା ବୃଦ୍ଧି ପାଇଥାଏ ।
ଅଳ୍ପ ପିଇଲେ ପ୍ରଭାବ ପଡେନି ଭାବିବା ଭୁଲ୍:
ଅନେକ ଭାବନ୍ତି ଦିନକୁ ଅଳ୍ପ ମଦ ପିଇବା ବା ଗୋଟିଏ କି ଦୁଇଟି ଡ୍ରିଙ୍କ୍ସ କରିବା ଦ୍ବାରା ସ୍ବାସ୍ଥ୍ୟ ଉପରେ ବିଶେଷ ପ୍ରଭାବ ପଡେନି । ହେଲେ ଅଧ୍ୟୟନରେ ଏହାକୁ ଖଣ୍ଡନ କରାଯାଇଛି । ଏଥିରେ କୁହାଯାଇଛି ଯେ, ଦିନକୁ ଅଳ୍ପ ମାତ୍ରାରେ ମଦ୍ୟପାନ ମଧ୍ୟ ଗମ୍ଭୀର ସ୍ବାସ୍ଥ୍ୟ ସମସ୍ୟା ସୃଷ୍ଟି କରିଥାଏ । କେବେ କେବେ ପିଉଥିବା ଲୋକଙ୍କ ତୁଳନାରେ ଦିନକୁ ତିନିରୁ ଅଧିକ ଡ୍ରିଙ୍କ୍ସ କରୁଥିବା ଲୋକଙ୍କ ଅକାଳ ମୃତ୍ୟୁ ଆଶଙ୍କା 33 ପ୍ରତିଶତ ଅଧିକ ରହିଥାଏ । ସେହିପରି ଏଥିରେ କ୍ୟାନ୍ସର ଜନିତ ମୃତ୍ୟୁ 39 ପ୍ରତିଶତ ଓ ହୃଦରୋଗ ବିପଦ 21 ପ୍ରତିଶତ ଅଧିକ ଅଟେ ।
ପ୍ରତିଦିନ ଗୋଟିଏରୁ କମ୍ ଡ୍ରିଙ୍କ୍ସ କରୁଥିବା ଲୋକମାନେ ବି ସମ୍ପୂର୍ଣ୍ଣ ସୁରକ୍ଷିତ ନୁହଁନ୍ତି । ଅଧ୍ୟୟନରୁ ଜଣାପଡିଛି ଯେ, ଏହି ଲୋକମାନଙ୍କ ମଧ୍ୟରେ କ୍ୟାନ୍ସର ଆଶଙ୍କା 11 ପ୍ରତିଶତ ବଢିଥାଏ । ତେଣୁ କମ୍ ମଦ ପିଉଥିବା ଲୋକଙ୍କ ଠାରେ କୌଣସି ସ୍ବାସ୍ଥ୍ୟ ସମସ୍ୟା ହୁଏ ନାହିଁ ବୋଲି ଥିବା ଧାରଣା ଏହି ଅଧ୍ୟୟନ ଭୁଲ୍ ପ୍ରମାଣିତ କରିଛି । ବିଶେଷକରି ବୟସାଧିକ ବର୍ଗଙ୍କ କ୍ଷେତ୍ରରେ ଏହା ଅଧିକ ମାରତ୍ମକ ହୋଇଥାଏ । Ref- https://jamanetwork.com/journals/jamanetworkopen/fullarticle/2822215
