ହାଇଦ୍ରାବାଦ: ଏବେ ବର୍ଷା ଦିନ ଯୋଗୁଁ ଚାରିଆଡେ କାୟା ମେଲାଇଛି ଡେଙ୍ଗୁ । ରାଜଧାନୀ ଭୁବନେଶ୍ବର ସମେତ ଓଡ଼ିଶାର ବିଭିନ୍ନ ଜିଲ୍ଲାରେ ଡେଙ୍ଗୁ ରୋଗୀଙ୍କ ସଂଖ୍ୟା ବଢିଚାଲିଛି । ଏମିତିରେ ମେଡିକାଲ ଏକ୍ସପର୍ଟ ଡେଙ୍ଗୁ ରୋଗୀଙ୍କ ଶରୀରରେ ପ୍ଲାଜମା ଲିକେଜ ନେଇ ସତର୍କ କରାଇଛନ୍ତି, ଯାହାକୁ ପ୍ଲେଟଲେଟ୍ ହ୍ରାସ ଠାରୁ ମଧ୍ୟ ଅଧିକ ବିପଦଜ୍ଜନକ ବୋଲି ମନେକରାଯାଏ । ଏପରି ସ୍ଥିତିରେ ରୋଗୀ ମୃତ୍ୟୁମୁଖରେ ମଧ୍ୟ ପଡିଥାଏ । ଏଥିପାଇଁ ପ୍ରଥମେ ଜାଣିବାକୁ ହେବ ପ୍ଲାଜମା ଲିକେଜ କ'ଣ ଓ ଏହାକୁ କେମିତି ଜାଣିବେ
ପ୍ଲାଜମା ଲିକେଜ:
ପ୍ଲାଜମା ହେଲା ରକ୍ତର ତରଳ ଭାଗ । ଡେଙ୍ଗୁ ଭାଇରସ୍ ରକ୍ତବାହିକାର ଆଭ୍ୟନ୍ତରୀଣ ସ୍ତର ଏଣ୍ଡୋଥେଲିୟମରେ ଫୁଲିବା ସମସ୍ୟା ସୃଷ୍ଟି କରେ । ଏହି ଫୁଲା ରକ୍ତବାହିକା ମଧ୍ୟରେ ଅନ୍ତରାଳ ସୃଷ୍ଟି କରେ, ଯେଉଁଥିରେ ଆଖପାଖର ଟିସୁରେ ପ୍ଲାଜମା ଲିକେଜ ହୁଏ । ଏହି ପ୍ଲାଜମା ଲିକେଜ ହେଲେ ଡେଙ୍ଗୁ ରୋଗୀଙ୍କ ସ୍ବାସ୍ଥ୍ୟବସ୍ଥା ଗୁରୁତର ହୋଇପଡେ ।
କେମିତି ଜାଣିବେ: ପ୍ଲାଜମା ଲିକେଜର ଲକ୍ଷଣଗୁଡିକ ହେଲା, ଗୋଡ ଓ ଆଖି ଚାରିପଟେ ଫୁଲିଯିବା, ହେମାଟ୍ରୋକ୍ରାଇଟ ସ୍ତର ହ୍ରାସ (ରକ୍ତରେ ଲାଲ ରକ୍ତକଣିକା ଅନୁପାତ), ପଲ୍ସ ଓ ବ୍ଲଡପ୍ରେସର କମିବା, ହାତଗୋଡ ଥଣ୍ଡା ଲାଗିବା, ବାନ୍ତି ଓ ପେଟ ଯନ୍ତ୍ରଣା ହେବା । ଏସବୁ ଲକ୍ଷଣ ପ୍ଲାଜମା ଲିକେଜର ସଙ୍କେତ ଦିଏ । ଏପରି ସ୍ଥଳେ ଠିକ୍ ସମୟରେ ରୋଗୀର ଚିକିତ୍ସା ଅତ୍ୟନ୍ତ ଜରୁରୀ । ଯଦି ଠିକ୍ ସମୟରେ ଚିକିତ୍ସା କରାନଯାଏ, ତାହେଲେ ଏହି ଅବସ୍ଥା ହେମୋରାଜିକ ସକ୍ ସିଣ୍ଡ୍ରୋମକୁ ଗତିକରେ, ଯାହା ଅତି ଘାତକ ହୋଇପାରେ । ତେଣୁ ଏବେ ଚାରିଆଡେ ଡେଙ୍ଗୁ ମାମଲା ବଢୁଥିବାବେଳେ ଡାକ୍ତର ପ୍ଲାଜମା ଲିକେଜକୁ ନେଇ ସତର୍କ କରାଇଛନ୍ତି ।
ଏକ୍ସପର୍ଟଙ୍କ ପରାମର୍ଶ:
ଏନେଇ ବରିଷ୍ଠ ଡାକ୍ତର ଡ. ରାଜା ରାଓ ରୋଗୀକୁ ସତର୍କ ରହିବା ଉପରେ ଅଧିକ ଜୋର୍ ଦେଇଛନ୍ତି । ସେ କହିଛନ୍ତି, ଯଦି ଡେଙ୍ଗୁ ଚିହ୍ନଟ ହେଉଛି ତାହେଲେ ଭୟ କରିବାର କିଛି ନାହିଁ । କିନ୍ତୁ ଏହାକୁ ଅବହେଳା କରିବା ଘାତକ ହୋଇପାରେ । ଡେଙ୍ଗୁ ପାଇଁ କୌଣସି ନିର୍ଦ୍ଧିଷ୍ଟ ଔଷଧ ନାହିଁ । ପାରାସିଟାମୋଲ ଦ୍ବାରା ଜ୍ବର ନିୟନ୍ତ୍ରଣ କରିବା ଏବଂ ଅଧିକ ତରଳ ପଦାର୍ଥ ସେବନ କରିବା ଜରୁରୀ । ଡେଙ୍ଗୁର 10 ପ୍ରତିଶତ ରୋଗୀଙ୍କ କ୍ଷେତ୍ରରେ ପ୍ଲାଜମା ଲିକେଜ ବିପଦ ରହିଥାଏ । ଏହାର ଲକ୍ଷଣ ଦେଖାଯିବା ମାତ୍ରେ ସଙ୍ଗେ ସଙ୍ଗେ ଚିକିତ୍ସା କରାଯିବା ଜରୁରୀ । ନଚେତ୍ ରୋଗୀ ମୃତ୍ୟୁମୁଖରେ ପଡିଥାଏ ।
