ହାଇଦ୍ରାବାଦ: ବେଳେବେଳେ ଥକ୍କା ଲାଗିବା ସାଧାରଣ କଥା । ବିଶେଷକରି ଆଜିକାଲିର ବ୍ୟସ୍ତବହୁଳ ଜୀବନ ଓ ଅତ୍ୟଧିକ କାର୍ଯ୍ୟଭାର ଯୋଗୁଁ ଥକ୍କାପଣ ଅନୁଭବ କରିବା ସ୍ବାଭାବିକ । ହେଲେ ବିନା କୌଣସି ପରିଶ୍ରମରେ କ୍ଲାନ୍ତ ହୋଇପଡିବା, ଦୁର୍ବଳ ଲାଗିବା କିମ୍ବା ବାରମ୍ବାର ଥକ୍କାପଣ ଅନୁଭବ କରିବା ଆଦୌ ସାଧାରଣ ନ ହୋଇପାରେ । ଅନେକ ସମୟରେ ଏହା କୌଣସି ଗମ୍ଭୀର ସ୍ବାସ୍ଥ୍ୟ ସମସ୍ୟାର ସଙ୍କେତ ଦେଇଥାଏ । ତେଣୁ ଏଥିପ୍ରତି ଆପଣଙ୍କୁ ଧ୍ୟାନ ଦେବା ଆବଶ୍ୟକ । ଥକ୍କା ଲାଗିବାର ଅନେକ କାରଣ ଥାଇପାରେ । ଯାହାକୁ ଅଣଦେଖା କରିବା ଦ୍ବାରା ଭବିଷ୍ୟତରେ ଅନେକ ସମସ୍ୟା ହୋଇପାରେ । ଥକ୍କାପଣର କାରଣଗୁଡିକୁ ଚିହ୍ନିବା ଓ ଏହାର ଚିକିତ୍ସା କରିବା ଦ୍ବାରା ଆପଣଙ୍କ ଜୀବନଶୈଳୀରେ ଉନ୍ନତି ଆସିପାରିବ ।
ଥକ୍କାପଣର କାରଣ ?
ନିଦ୍ରା ସମସ୍ୟା: ସୁସ୍ଥ ଜୀବନ ପାଇଁ ପର୍ଯ୍ୟାପ୍ତ ନିଦ ଜରୁରୀ । ଭଲ ନିଦ ନହେବା ବା ନିଦ୍ରାହୀନତା ଥକ୍କାପଣ ଓ ଦୁର୍ବଳତାର କାରଣ ହୋଇପାରେ । ଶରୀରକୁ ସକ୍ରିୟ ରଖିବା ପାଇଁ ପର୍ଯ୍ୟାପ୍ତ ଓ ଆରମଦାୟକ ନିଦ ଅତ୍ୟନ୍ତ କରିବା ଗୁରୁତ୍ବପୂର୍ଣ୍ଣ । ଦୈନିକ 8 ଘଣ୍ଟା ଶୋଇବାକୁ ଡାକ୍ତର ପରାମର୍ଶ ଦିଅନ୍ତି ।
ଅସ୍ବାସ୍ଥ୍ୟକର ଜୀବନଶୈଳୀ: ଖରାପ ଖାଦ୍ୟାଭାସ ଓ ଯୋଗ, ବ୍ୟାୟାମର ଅଭାବ ମଧ୍ୟ ଥକ୍କାପଣର କାରଣ ହୋଇଥାଏ । ଏଥିପାଇଁ ଅନେକ ସମୟରେ ଆମେ ଖୁବ୍ ଦୁର୍ବଳ ଓ କ୍ଲାନ୍ତ ଅନୁଭବ କରୁ । ଏକ ସନ୍ତୁଳିତ ଖାଦ୍ୟ ସହିତ ନିୟମିତ ଶାରିରୀକ କାର୍ଯ୍ୟକଳାପ ମଣିଷକୁ ସୁସ୍ଥ ଓ ସକ୍ରିୟ ରଖିଥାଏ ।
ଶାରିରୀକ ଓ ମାନସିକ ଚାପ: ଅଧିକ କାର୍ଯ୍ୟବ୍ୟସ୍ତତା, ଚିନ୍ତା, ବିଷାଦ ଆଜିକାଲି ଏକ ମୁଖ୍ୟ ସମସ୍ୟା ହୋଇଛି । ଏହା ମଧ୍ୟ ଥକ୍କାପଣ ଓ ଦୁର୍ବଳତାର କାରଣ ହୋଇପାରେ । ତେଣୁ ସବୁବେଳେ ଖୁସି ରହିବାକୁ ଚେଷ୍ଟା କରନ୍ତୁ ।
ହରମୋନ ପରିବର୍ତ୍ତନ: ଋତୁସ୍ରାବ, ଗର୍ଭଧାରଣ ସମୟରେ ହରିମୋନାଲ ପରିବର୍ତ୍ତନ ଶରୀରର ଶକ୍ତିସ୍ତରକୁ ପ୍ରଭାବିତ କରିଥାଏ ଓ ଏହା କାରଣରୁ ଥକ୍କାପଣ ଅନୁଭବ ହୋଇଥାଏ ।
ଅସୁସ୍ଥତା: ଜ୍ବର, କୋଭିଡ-19 ପରି ଭଳି ରୋଗ ଲମ୍ବା ସମୟ ପର୍ଯ୍ୟନ୍ତ ଥକ୍କାପଣର କାରଣ ହୋଇପାରେ । ରକ୍ତହୀନତା ଯୋଗୁଁ ଦୁର୍ବଳ ଲାଗିବା ସହିତ ନିଦ୍ରାହୀନତା ସମସ୍ୟା ଦେଖାଯାଇଥାଏ । ଫଳରେ ଥକ୍କାପଣ, ମାନ୍ଦା ଅନୁଭବ ହୋଇଥାଏ । ଏସବୁ ଆମର ଦୈନନ୍ଦିନ ଜୀବନକୁ ଗଭୀର ଭାବେ ପ୍ରଭାବିତ କରିଥାଏ ।
ଏହିସବୁ ରୋଗର ହୋଇପାରେ ଲକ୍ଷଣ:
ଶରୀରରେ ଆଇରନ ଅଭାବ: ଅତ୍ୟଧିକ ଥକ୍କାପଣ ଅନୁଭବ ହେବା, ହୃଦସ୍ପନ୍ଦନ ବଢିବା, ନିଶ୍ବାସ ପ୍ରଶ୍ବାସରେ ଯନ୍ତ୍ରଣା ହେବା ଏବଂ ସ୍କିନ ଫିକା ପଡିବା ଇତ୍ୟାଦି ଆଇରନର ଅଭାବ ହୋଇପାରେ ।
ମଧୁମେହ: ବର୍ତ୍ତମାନ ସମୟରେ ମଧୁମେହ ବା ଡାଇବେଟିସ୍ ଏକ ପ୍ରମୁଖ ସ୍ବାସ୍ଥ୍ୟ ସମସ୍ୟା ପାଲଟିଛି । ପ୍ରତି ଘରେ ଘରେ ମଧୁମେହ ରୋଗୀ ଅଛନ୍ତି । ଏହି ରୋଗ ହେଲେ ଅଧିକ ଶୋଷ ଲାଗିବା, ବାରମ୍ବାର ପରିସ୍ରା ଲାଗିବା ଏବଂ ଅକାରଣରେ ଓଜନ ହ୍ରାସ ସହିତ ଖୁବ୍ ଥକ୍କା ଅନୁଭବ ହୋଇଥାଏ ।
ଅତ୍ୟଧିକ ଥାଇରଏଡ: ଏହି ରୋଗୀମାନେ ଅଧିକ ଥକ୍କାପଣ ଅନୁଭବ କରିବା ସଙ୍ଗେ ସଙ୍ଗେ ଖୁବ୍ ବିରକ୍ତିଭାବ ଆସିବା, ଚିଡଚିଡା ହେବା ଓ ଅଧିକ ଚିନ୍ତା କରିବା ଭଳି ସମସ୍ୟା ଭୋଗନ୍ତି । ଏହାସହିତ ମାଂଶପେଶୀ ଦୁର୍ବଳ ହୋଇଥାଏ ।
କ୍ଲୋନିକ ଫାଟିଗ୍ ସିଣ୍ଡ୍ରୋମ: ଏଥିରେ ଅତି କମରେ 3 ମାସ ପର୍ଯ୍ୟନ୍ତ ଅତ୍ୟଧିକ ଥକ୍କାପଣ ରହିଥାଏ । ଏଥିସହ ସ୍ମୃତିଶକ୍ତି ସମସ୍ୟା ଓ ଫ୍ଲୁ ଭଳି ସମସ୍ୟା ଦେଖାଯାଏ ।
କେମିତି ଦୂର କରିବେ ଥକ୍କାପଣ ?
ଏକ ସୁସ୍ଥ ଜୀବନଶୈଳୀ ଆପଣାନ୍ତୁ: କୁହାଯାଏ ସ୍ବାସ୍ଥ୍ୟ ହିଁ ସମ୍ପଦ । ଶରୀରର ସୁସ୍ଥ ରହିଲେ ମନ ମଧ୍ୟ ଭଲ ରହିଥାଏ । ଏଥିପାଇଁ ଏକ ସୁସ୍ଥ ଜୀବନଶୈଳୀ ନିହାତି ଜରୁରୀ । ଶରୀରକୁ ସବୁବେଳେ ଆକ୍ଟିଭ ରଖିବା ପାଇଁ ସନ୍ତୁଳିତ ଖାଦ୍ୟ ଏବଂ ନିୟମିତ ବ୍ୟାୟାମ ନିଜର ଦିନଚର୍ଯ୍ୟାରେ ସାମିଲ କରନ୍ତୁ ।
ପର୍ଯ୍ୟାପ୍ତ ସମୟ ଶୁଅନ୍ତୁ: ପ୍ରତ୍ୟେକ ମଣିଷ ପାଇଁ ଅତିକମରେ 6ରୁ 9 ଘଣ୍ଟା ନିଦ୍ରା ଜରୁରୀ । ତେଣୁ ରାତିରେ ପର୍ଯ୍ୟାପ୍ତ ସୁଖ ନିଦ ପାଇଁ ଚେଷ୍ଟା କରନ୍ତୁ ।
ଆରାମଦାୟକ ନିଦ୍ରା ମାହୋଲ ବନାନ୍ତୁ: ଏହା ଦେଖନ୍ତୁ, ଯେମିତି ଆପଣଙ୍କର ବେଡ୍ରୁମ ଶୋଇବା ଅନୁକୂଳ, ଥଣ୍ଡା, ଶାନ୍ତ, ଅନ୍ଧାର ଓ ଆରାମଦାୟକ ହୋଇଥିବ ।
ନିଦ ଖରାପ କରୁଥିବା ସବୁ ଜିନିଷରୁ ଦୂରେଇ ରୁହନ୍ତୁ: ମଦ୍ୟପାନ ଓ ଧୂମ୍ରପାନ ସୀମିତ କରନ୍ତୁ । ଯେତେସମ୍ଭବ ଏଭଳି ମାଦକଦ୍ରବ୍ୟରୁ ଦୂରେଇ ରୁହନ୍ତୁ । ଏଥିସହ ଶୋଇବା ପୂର୍ବରୁ ମୋବାଇଲ, କମ୍ୟୁଟର ବ୍ୟବହାର କରିବା ବନ୍ଦ କରନ୍ତୁ ।
ଯଦି ଆପଣଙ୍କୁ କୌଣସି ସ୍ପଷ୍ଟ କାରଣ ବିନା ବାରମ୍ବାର ଥକ୍କା ଓ ଦୁର୍ବଳ ଅନୁଭବ ହେଉଛି, ତାହେଲେ ଡାକ୍ତରଙ୍କ ସହ ପରାମର୍ଶ ନିଅନ୍ତୁ ।
